ބޭންކް އޮފް މޯލްޑިވްސްގެ ކުރީގެ ސީއީއޯ ކާލް ސްޓަމްކޭ އިސްތިއުފާ ދެއްވުމާ ގުޅިގެން އެ ބޭންކުގެ ޗީފް އެގްޒެކެޓިވް އޮފިސަރުގެ މަގާމަށް ކުރިމަތިލުމުގެ ފުރުސަތު މިހާރު ވަނީ ހުޅުވާލައިފަ އެވެ.
އެ ބޭންކުން ކުރި އިއުލާނެއްގައި ބުނެފައި ވަނީ ފޯމު ހުށަހެޅުމުގެ ސުންގަޑިއަކީ އޮކްޓޯބަރު މަހުގެ ހަތް ވަނަ ދުވަސް ކަމަށެވެ.
މި މަގާމަށް ކުރިމަތިލާ ފަރާތްތަކަކީ ބޭންކިން ދާއިރާއިން މަދުވެގެން 15 އަހަރު ދުވަހުގެ ތަޖުރިބާ ލިބިފައިވާ އަދި ސީނިއާ މެނޭޖްމަންޓުގެ ދާއިރާއިން ފަސް އަހަރަށް ވުރެ ގިނަ ދުވަހުގެ ތަޖުރިބާ ލިބިފައިވުން ހިމެނެ އެވެ. އަދި މާލީ ދާއިރާއިން މަތީ ތައުލީމު ހާސިލްކޮށްފައިވުން ވެސް ހިމެނެ އެވެ.
އެ މަގާމަށް ދޭ އުޖޫރަ ކަނޑައަޅާނީ ހޮވޭ ފަރާތުގެ ސަނަދާއި ތަޖުރިބާއަށް ބަލައިގެންނެވެ. މުސާރައިގެ އިތުރުން ބޯހިޔާވަހިކަމާއި ކާރާއި މެޑިކަލް އިންޝުއަރެންސް ލިބޭނެ އެވެ. އަދި ރާއްޖެއިން ބޭރުން ވަޒީފާ އަދާކުރާނަމަ އެފަރާތްތަކަށް ހާއްސަ ހިލޭ އެހީއެއް ދީ، އަހަރީ ވައިގެ ދަތުރުފަތުރުގެ އަގު ވެސް ހިމަނާނެ އެވެ.
އެ މަގާމަށް ބޭފުޅަކު އައްޔަން ކުރާނީ ތިން އަހަރުގެ މުއްދަތަކަށެވެ.
ކުރީގެ ސީއީއޯ ކާލް ސްޓަމްކޭ މަގާމާ ހަވާލުވެވަޑައިގަތީ 2022 ވަނަ އަހަރުގެ އޮކްޓޯބަރު މަހުގެ ތެރޭގަ އެވެ. މިވަގުތު ބޭންކުގެ މެނޭޖްމަންޓާ ވަގުތީ ގޮތުން ހަވާލުވެ ހުންނެވީ ޑެޕިއުޓީ ސީއީއޯ އައިޝަތު ނޫރައްދީނެވެ.
Leave a Reply