ދެކުނު ކޮރެއާގެ ކޮރަޕްޝަން އިންވެސްޓިގޭޝަން އޮފިސަރުން ވަނީ ކުރީގެ ރައީސް ޔޫން ސުކް ޔޮލް ހައްޔަރުކުރުމުގެ އަމުރެއް ނެރެދިނުމަށް އެދިފައެވެ. މި އެދުން ހުށަހެޅީ ޔޫން އަސްކަރީ ގާނޫނު އިއުލާނުކުރުމާ ގުޅިގެންނެވެ.
ރިޕޯޓުތަކުން ދައްކާ ގޮތުގައި ޖޮއިންޓް އިންވެސްޓިގޭޝަން ޓީމަކުން ކޯޓު އަމުރަށް އެދުނީ ޔޫން، ސަރުކާރާ ދެކޮޅަށް ބާޣާވާތެއް ގެނައުމަށް މަސައްކަތްކުރުމާއި ނަހަމަ ގޮތުގައި ބާރުގެ ބޭނުން ހިފި ކަމުގެ ތުހުމަތުގައި ސުވާލުކުރަން ހާޒިރުވުމަށް ފޮނުވި ތިން ޗިޓަކަށް އިޖާބަ ނުދެއްވުމުންނެވެ.
މި މަހުގެ ހަތަރުވަނަ ދުވަހު ޔޫން އަސްކަރީ ގާނޫނު އިއުލާނުކުރެއްވުމާ ގުޅިގެން ދެކުނު ކޮރެއާގައި ވަރަށް ބޮޑު ސިޔާސީ ހަމަނުޖެހުމެއް އުފެދުނެވެ. އޭގެ ނަތީޖާއެއްގެ ގޮތުން:
1. ޔޫން މަގާމުން ދުރުކުރުމަށް ގާނޫނު ހަދާ މަޖިލީހުގެ އަޣުލަބިއްޔަތުން ފާސްވިއެވެ.
2. މި މަހުގެ 14 ވަނަ ދުވަހުން ފެށިގެން ޔޫން ހުންނެވީ މަގާމުން ދުރުކުރައްވާފައެވެ.
3. ރައީސްގެ ބާރުތަކާއި ޒިންމާތައް ވަނީ އަތުލައި، ބޮޑުވަޒީރު ހާން ޑަކް ސޫއާ ހަވާލުކޮށްފައެވެ.
ރައީސްގެ އިތުބާރު ނެތްކަމުގެ މައްސަލަ ދެން ފޮނުވާނީ ގައުމުގެ ދުސްތޫރީ ކޯޓަށެވެ. އެ ކޯޓަށް ޔޫން މަގާމުން ދުރުކުރުމާ ގުޅޭ ގޮތުން ގޮތް ނިންމަން 180 ދުވަސް ލިބޭނެއެވެ. ކޯޓުން ވެސް ރައީސް މަގާމުން ދުރުކުރަން ނިންމައިފިނަމަ، ޔޫން ވާނީ ދެކުނު ކޮރެއާގެ ތާރީޚުގައި އިތުބާރު ނެތްކަމުގެ ވޯޓަކުން މަގާމުން ދުރުކުރެވުނު ދެވަނަ ރައީސަށެވެ.
ޔޫން އަސްކަރީ ގާނޫނު އިއުލާނުކުރެއްވީ އިދިކޮޅުން ބަޣާވާތެއް ކުރަން އުޅޭ ކަމަށާއި އުތުރު ކޮރެއާއާ ގުޅިގެން މަސައްކަތް ކުރާ ކަމަށް ތުހުމަތު ކުރައްވައެވެ. ނަމަވެސް، ގާނޫނު ހަދާ މަޖިލީހުން ފާސްނުވުމުން އަސްކަރީ ގާނޫނު ދެތިން ގަޑިއިރުތެރޭގައި ވަނީ އަނބުރާ ގެންދަވާފައެވެ.
Leave a Reply