ލުބުނާނުގެ ވެރިރަށް ބެއިރޫތުގެ ދެކުނުގައި އޮންނަ، ހިޒްބުالله އަށް ބޮޑު ތާއީދެއް އޮންނަ ދާހިއްޔާ ސަރަހައްދަށް ހަމަލާދޭނެ ކަމަށް އިސްރާއީލުން ބުނުމާ ގުޅިގެން، އެ ސަރަހައްދުން ގިނަ އަދަދެއްގެ ބަޔަކު ރައްކާތެރި ހިސާބުތަކަށް ދާން ފަށައިފިއެވެ.
މި ހިޖުރަކުރުންތައް ފެށިފައިވަނީ ހޯމަ ދުވަހު އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާއި ޑިފެންސް މިނިސްޓަރު ގުޅިގެން ނެރުނު ބަޔާނެއްގައި، ބެއިރޫތުގެ ދެކުނު ސަބަރބްތަކަށް ހަމަލާދިނުމަށް އަސްކަރިއްޔާއަށް އަމުރުކުރުމާ ގުޅިގެންނެވެ. މީގެ އެއް ދުވަސް ކުރިން އިސްރާއީލު ސިފައިން ވަނީ ލުބުނާނުގެ އެންމެ ފުން ހިސާބުތަކަށް ވަދެފައެވެ.
އަލްޖަޒީރާގެ ރިޕޯޓަރު ޒެއިނާ ޚޯދްރު ބެއިރޫތުން މަޢުލޫމާތު ދެއްވި ގޮތުގައި، ހޯމަ ދުވަހު އިސްރާއީލުން މި އަމުރު ނެރުމާއެކު ޖީއެމްޓީ ގަޑިން ހެނދުނު 7:00 ހާއިރުން ފެށިގެން މީހުން ވަނީ ވަގުތުން ތަކެތި ފަތިޖަހައިގެން އެ އަވަށްތަކުން ނުކުންނަން ފަށާފައެވެ. ނަމަވެސް ސަރުކާރުން ހިންގާ ހިޔާތައް ފުރިފައި ހުރުމުގެ ސަބަބުން، ގިނަ ބަޔަކު ތިބީ ކާރުތަކުގައި ވާނުވާ ބަލަން މަގުމަތީގައެވެ.
އިސްރާއީލުގެ ޑިފެންސް މިނިސްޓަރު އިސްރާއީލް ކަޓްޒް ވިދާޅުވީ، އިސްރާއީލުގެ އުތުރުގެ ސަރަހައްދުތަކުގައި ހަމަޖެހުމެއް ނެތް ނަމަ ބެއިރޫތުގައި ވެސް ހަމަޖެހުމެއް ނޯންނާނެ ކަމަށެވެ. އަދި ލުބުނާނުގެ ދެކުނުގައި އޮންނަ ލިތާނީ ކޯރުގެ ސަރަހައްދަކީ ހަތިޔާރާއި ހަނގުރާމަވެރިން ނެތް، އިސްރާއީލުގެ އަސްކަރީ ކޮންޓްރޯލްގެ ދަށުގައި އޮންނަ ޒޯނަކަށް ހަދާނެ ކަމަށް އޭނާ ވައުދުވެވަޑައިގެންނެވިއެވެ.
މިދިޔަ ހުކުރު ދުވަހު އިސްރާއީލުން ވަނީ ލިތާނީ ކޯރުގެ އުތުރުގައި އޮންނަ ތާރީޚީ ބީއޯފޯޓް ކަސްޓަލް (ގަލާތުލް ޝަޤީފް) ހިފާފައެވެ. މިއީ މީގެ 25 އަހަރު ކުރިންވެސް އިސްރާއީލުން ހިފާފައިވާ ތަނެކެވެ. ބޮޑުވަޒީރު ނަތަންޔާހޫ ވިދާޅުވީ މި އޮޕަރޭޝަނަކީ ހިޒްބުالله އާ ދެކޮޅަށް ކުރާ ހަނގުރާމައިގައި އައި “ބޮޑު ބަދަލެއް” ކަމަށެވެ.
އެމެރިކާގެ އާ ހުށަހެޅުމެއް
މި ހަމަނުޖެހުންތައް ކުޑަކުރުމަށްޓަކައި އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވަނީ ލުބުނާނުގެ ރައީސް ޖޯސެފް އައުން އާއި އިސްރާއީލުގެ ބޮޑުވަޒީރާ މަޝްވަރާ ކުރައްވާފައެވެ. އެމެރިކާގެ އޮފިޝަލަކު ވިދާޅުވި ގޮތުގައި، ހުށަހަޅާފައިވާ “ރޯޑްމެޕް” ގެ ދަށުން ހިޒްބުالله އިން ހަމަލާތައް ހުއްޓާލަން ޖެހެއެވެ. އެމެރިކާއިން މި ހަނގުރާމައިގެ ޒިންމާ އަޅުވަނީ ހިޒްބުالله އާއި އީރާނުގެ ބޮލުގައެވެ.
މަރުވި މީހުންގެ އަދަދު އިތުރުވުން
މިދިޔަ މާޗް މަހުން ފެށިގެން އިސްރާއީލުން ދެމުންދާ ހަމަލާތަކުގައި މިހާތަނަށް 3,412 އަށް ވުރެ ގިނަ މީހުން މަރުވެ، 10,269 މީހުން ވަނީ ޒަޚަމްވެފައެވެ. އަދި އެއް މިލިއަނަށް ވުރެ ގިނަ މީހުން ވަނީ ގެދޮރު ދޫކޮށް ގޮސްފައެވެ. ހުކުރު ދުވަހު އެކަނި ދިން ހަމަލާތަކުގައިވެސް 12 މީހުން މަރުވެފައިވާ ކަމަށް އަލްޖަޒީރާގެ ތަފާސްހިސާބުތަކުން ދައްކައެވެ.
ބައިނަލްއަގްވާމީ ކުށްވެރިކުރުން
އިސްރާއީލުގެ މި އަމަލުތައް ދުނިޔޭގެ ގިނަ ގައުމުތަކުން ދަނީ ކުށްވެރިކުރަމުންނެވެ. ފްރާންސްގެ ރައީސް އިމަނުއެލް މެކްރޮން ވިދާޅުވީ މި ހަމަލާތަކަށް އެއްވެސް އުޒުރެއް ނުދެއްކޭނެ ކަމަށެވެ. ގަތަރުން މި ކެމްޕޭނަކީ ބައިނަލްއަގްވާމީ ގާނޫނުތަކާ ހިލާފު ކަމެއްގެ ގޮތުގައި ސިފަކޮށްފައިވާއިރު، މިސްރުން ވަނީ ލުބުނާނުގެ ހުރިހާ ސަރަހައްދަކުން އިސްރާއީލު ސިފައިން ވަގުތުން ފޭބުމަށް ގޮވާލާފައެވެ.
Leave a Reply