އީރާނާއެކު އުފެދިފައިވާ އަސްކަރީ ނުތަނަވަސްކަމުގެ ތެރެއިން ދުނިޔޭގެ ވިޔަފާރި ހިމާޔަތްކުރުމަށްޓަކައި، ހޮރްމުޒް ކަނޑުއޮޅީގެ ސަލާމަތީ ކަންކަން ކަށަވަރުކުރާނެ ބައިނަލްއަޤްވާމީ ނިޒާމެއް ހޯދުމުގެ މަސައްކަތް އެމެރިކާއާއި އިނގިރޭސިވިލާތުން ފަށައިފިއެވެ.
މި ފިޔަވަޅަކީ ދުނިޔޭގެ އެންމެ މުހިންމު އެއް ކަނޑުގެ މަގުގައި ހަމަޖެހުން ގާއިމުކުރުމަށް ސަރަހައްދީ ޑިޕްލޮމެޓިކް މަސައްކަތްތައް ކުރިއަށްދާ ދަނޑިވަޅެއްގައި އެޅި ފިޔަވަޅެކެވެ. ޔޫރަޕްގެ ޑިޕްލޮމެޓުންނާއި ‘އެކްސިއޯސް’ އާ ހަވާލާދީ ލިބިފައިވާ މައުލޫމާތުތަކަށް ބަލާއިރު، ހޮރްމުޒް ކަނޑުއޮޅީގައި ދަތުރުފަތުރު ހިމާޔަތްކުރުމަށް ބައިނަލްއަޤްވާމީ ކޯލިޝަނެއް އެކުލަވާލުމާ ބެހޭ މަތީ ފެންވަރުގެ ބައްދަލުވުމެއް އަންނަ ހަފްތާގައި ލަންޑަންގައި ބޭއްވުމަށް ވަނީ ރާވާފައެވެ.
މި ބައްދަލުވުމުގައި އެމެރިކާ، އިނގިރޭސިވިލާތް އަދި ހުޅަނގުގެ ބައެއް ގައުމުތަކުގެ އިތުރުން ސަރަހައްދީ ގައުމުތަކުގެ ޑިފެންސް މިނިސްޓަރުންނާއި އަސްކަރީ އިސް ލީޑަރުން ބައިވެރިވެވަޑައިގަންނަވާނެ ކަމަށް ބެލެވެއެވެ. ވައިޓް ހައުސްގެ އޮފިޝަލަކު ކަށަވަރުކޮށްދެއްވި ގޮތުގައި، ހޮރްމުޒް ކަނޑުއޮޅި ރައްކާތެރިކުރުމަކީ އެމެރިކާގެ އެންމެ އިސް އެއް ސްޓްރެޓެޖިކް އަމާޒެވެ. އެއީ ދުނިޔޭގެ ތެލާއި ހަކަތައިގެ މާކެޓަށް ކުރިމަތިވެފައިވާ ހަލަބޮލިކަން ހުއްޓުވުމަށް އާންމު ވިޔަފާރީގެ ދަތުރުތައް އަމާންކުރުން ކޮންމެހެން ބޭނުންތެރި ކަމަކަށް ވާތީއެވެ.
މި ކޯލިޝަން އެކުލަވާލުމުގައި އެމެރިކާއިން ބުރަވަނީ ފާއިތުވި މަސްތަކުގައި ފްރާންސާއި އިނގިރޭސިވިލާތުން ކުރި މަޝްވަރާތަކުގެ މައްޗަށެވެ. އެމެރިކާއިން ބޭނުންވަނީ މައިން ސާފުކުރާ ބޯޓުތަކާއި، އަސްކަރީ އުޅަނދުތަކާއި ޑްރޯންތައް ބޭނުންކޮށްގެން ކަނޑުގެ މަގުތައް ބެލެހެއްޓުމަށެވެ. ޔޫރަޕްގެ ޑިޕްލޮމެޓަކު ފާހަގަކުރެއްވި ގޮތުގައި، އެމެރިކާއިން މިކަމުގައި އެދެނީ އެ ގައުމުތަކުގެ އެހީތެރިކަމަށެވެ.
މި އާ ކޯލިޝަންގެ މައިގަނޑު މަގުސަދުތަކުގެ ތެރޭގައި ހިމެނެނީ:
- ވިޔަފާރި އުޅަނދުތަކާއި ތެޔޮ ޓޭންކަރުތަކަށް އެސްކޯޓް ދީގެން ސަލާމަތްތެރިކަމާއެކު ކަނޑުއޮޅި ހުރަސްކުރުވުން.
- ކަނޑުގެ މައިންތައް ނައްތާލައި، ދަތުރުފަތުރަށް ހުރަސްއެޅޭ ކަންކަން ހުއްޓުވުން.
- ޝިޕިންގ އަށް ބުރޫއަރާފާނެ ހަމަލާތަކާއި ބަންދުކުރުންތަކުން މަގުތައް ރައްކާތެރިކުރުން.
- ދުނިޔޭގެ ހަކަތަ މާކެޓްތަކުގެ ހަމަޖެހުން ދެމެހެއްޓުން.
ނަމަވެސް، މި ފިޔަވަޅާ މެދު ބައެއް ގައުމުތަކުން ކަންބޮޑުވުން ފާޅުކޮށްފައިވެއެވެ. ‘އެކްސިއޯސް’ އިން ރިޕޯޓްކުރާ ގޮތުގައި ގިނަ ގައުމުތަކުން ބޭނުންވަނީ އަސްކަރީ މިޝަނެއް ފެށުމުގެ ކުރިން ސަރަހައްދީ ހަމަނުޖެހުންތައް ހުއްޓުވުމަށެވެ. ފްރާންސާއި އިނގިރޭސިވިލާތުންވެސް ބުނެފައިވަނީ ދާއިމީ ހަނގުރާމަ ހުއްޓާލުމެއް ގާއިމުނުކުރެވެނީސް މި މިޝަން އަމަލީގޮތުން ނުފެށޭނެ ކަމަށާއި، މިހާރު ކުރިއަށްދަނީ ތައްޔާރުވުމުގެ މަސައްކަތްތައް ކަމަށެވެ.
މި ދަނޑިވަޅަކީ އީރާނުން ބޯޓުތަކަށް ހަމަލާދިނުން ހުއްޓާލާފައިވާތާ ހަތަރު ދުވަސްވެފައިވާ ވަގުތެކެވެ. މީގެ ކުރިން އެމެރިކާގެ އޭރުގެ ރައީސް ޑޮނަލްޑް ޓްރަމްޕް ވަނީ އީރާނުން އިތުރު ހަމަލާއެއް ދީފިނަމަ އެ ގައުމުގެ އެތެރޭގެ އަމާޒުތަކަށް ބޮން އަޅާނެ ކަމުގެ އިންޒާރު ދެއްވާފައެވެ.
އަސްކަރީ ތައްޔާރުވުންތަކާ އެކު، ޑިޕްލޮމެޓިކް މަސައްކަތްތައްވެސް ދަނީ ކުރިއަށެވެ. އޮމާންގެ ވަފުދެއް ތެހެރާނަށް ޒިޔާރަތްކޮށް، ކަނޑުއޮޅި ހުޅުވާލުމުގެ މެކޭނިޒަމާ ބެހޭގޮތުން މަޝްވަރާކޮށްފައިވާއިރު، އީރާނުގެ ފޮރިން މިނިސްޓަރު އައްބާސް އަރާކްޗީ ވަނީ ސަރަހައްދީ ގައުމުތަކާ ގުޅިގެން ސަލާމަތީ ކަންކަން ހަމަޖެއްސުމަށް މަޝްވަރާ ކުރައްވާފައެވެ.
Leave a Reply