‘ސްޕައިޑަރ މޭން: ބްރޭންޑް ނިއު ޑޭ’ އިން ‘އެވޭންޖާސް: އެންޑްގޭމް’ ފަހަތަށް ޖައްސާލައި، ޑޮމެސްޓިކް ބޮކްސް އޮފީހުގެ 2 ވަނަ ހޯދައިފި

ސޮނީ ޕިކްޗާސް އާއި މާވެލް ގުޅިގެން ނެރުނު ކާމިޔާބު ފިލްމު ‘ސްޕައިޑަރ މޭން: ބްރޭންޑް ނިއު ޑޭ’ އިން، މާވެލްގެ ތާރީޚީ ފިލްމު ‘އެވޭންޖާސް: އެންޑްގޭމް’ ފަހަތަށް ޖައްސާލުމަށްފަހު، އުތުރު އެމެރިކާގެ ޑޮމެސްޓިކް ބޮކްސް އޮފީހުގައި ދެވަނައަށް އެންމެ ބޮޑު އާމްދަނީއެއް ހޯދި ފިލްމުގެ ޝަރަފު ހޯދައިފިއެވެ.

މި ފިލްމަށް މިހާތަނަށް ޑޮމެސްޓިކް ބޮކްސް އޮފީހުގައި 858.4 މިލިއަން ޑޮލަރު ލިބިފައިވާއިރު، މީގެ ކުރިން ދެވަނައިގައި އޮތް ‘އެވޭންޖާސް: އެންޑްގޭމް’ ގެ މުޅި އުމުރުގެ ޑޮމެސްޓިކް އާމްދަނީއަކީ 858.3 މިލިއަން ޑޮލަރެވެ. ފިލްމު ރިލީޒްކުރިތާ ހަތަރު ވަނައަށް ވީ ހޯމަ ދުވަހު އެކަނިވެސް ‘ބްރޭންޑް ނިއު ޑޭ’ އަށް ވަނީ 3.4 މިލިއަން ޑޮލަރުގެ އާމްދަނީއެއް ލިބިފައެވެ.

އަންނަ ސެޕްޓެމްބަރު މަހުގެ 25 ގައި ޑިޒްނީ އިން ރޫސޯ ބްރަދާސްގެ ‘އެވޭންޖާސް: އެންޑްގޭމް: އެންކޯ’ ގެ ނަމުގައި އަލުން ސިނަމާތަކަށް ގެންނަން ނިންމާފައިވީ ނަމަވެސް، ‘ސްޕައިޑަރ މޭން’ ގެ ސިނަމާ ދަތުރު އަދި ނިމުމަކާ ގާތްވެސް ނުވެއެވެ. ބެލެވޭ ގޮތުގައި މި ފިލްމު ވަރަށް އަވަހަށް 900 މިލިއަން ޑޮލަރުގެ އާމްދަނީ ފަހަނައަޅައި ދާނެއެވެ. އަދި މިއާއެކު މި ފިލްމު ވެގެންދާނީ، ‘ސްޓާ ވޯސް: ދަ ފޯސް އެވޭކެންސް’ އަށް ފަހު ޑޮމެސްޓިކް ބޮކްސް އޮފީހުގައި އެއް ބިލިއަން ޑޮލަރާ އެންމެ ގާތްކުރާ ދެވަނަ ފިލްމަށެވެ. ފިލްމަށް 900 މިލިއަން ޑޮލަރުގެ ލަނޑުދަނޑި ހާސިލްކުރުމަށް މިހާރު ބޭނުންވަނީ އެންމެ 41.6 މިލިއަން ޑޮލަރެވެ.

ބޮކްސް އޮފީސް ތަޖުރިބާކާރުން ލަފާކުރާ ގޮތުގައި، ކުރިއަށް އޮތް ފަސްވަނަ ހަފްތާ ބަންދުގައި 18 މިލިއަން ޑޮލަރުގެ އާމްދަނީއަކާއެކު ‘ބްރޭންޑް ނިއު ޑޭ’ އޮންނާނީ އެއްވަނައިގައެވެ.

މި ހަފްތާ ބަންދުގައި އެހެން ފިލްމުތަކަށް ބަލާއިރު، ވޯނަރ ބްރޯސް އިން ދޫކޮށްލުމުން ކެޗަޕް އެންޓަޓެއިންމަންޓުން ނެރޭ ‘ކޮޔޯޓް ވްސް އެކްމޭ’ އަށް ގާތްގަނޑަކަށް 15 މިލިއަން ޑޮލަރު ލިބޭނެ ކަމަށް ލަފާކުރެވެއެވެ. މި ފިލްމަށް މިހާތަނަށް ސްނީކް ޕްރިވިއުތަކުން 400،000 ޑޮލަރު ލިބި، އެޑްވާންސް ޓިކެޓް ވިއްކުން ރަނގަޅުވި ނަމަވެސް، ސޯޝަލް މީޑިއާގެ ތަރުހީބު ނިއުޔޯކާއި ލޮސް އެންޖެލިސް ފިޔަވައި އެހެން ސަރަހައްދުތަކަށް ފޯރާނެ މިންވަރެއް އަދި ސާފެއް ނުވެއެވެ.

މީގެއިތުރުން، ސޮނީގެ ‘އިންސިޑިއަސް: އައުޓް އޮފް ދަ ފަރދަރ’ ގެ ވިޔަފާރި ދެވަނަ ހަފްތާގައި 60 އިންސައްތަ ދަށަށް ގޮސް، ލިބޭނީ ގާތްގަނޑަކަށް 10 މިލިއަން ޑޮލަރެވެ. އަދި މި ހަފްތާ ބަންދުގައި އަލަށް ރިލީޒްކުރާ ފިލްމުތަކުގެ ތެރޭގައި 20 ވަނަ ސެންޗުރީ ސްޓޫޑިއޯސްގެ ރިޑްލީ ސްކޮޓް ޑައިރެކްޓްކުރި ‘ޑޮގް ސްޓާސް’ އަދި ސަންޑޭންސް ފެސްޓިވަލުން ފާހަގަވި ރޯޑްސައިޑް އެޓްރެކްޝަންސްގެ ‘ބަޑީ’ ހިމެނެއެވެ.

ހަސަން އަރީން ( އެޑީ )