ފިނިފެންމާ

އިރުގެ ރަން ދޯދިތަކުން މުޅި ރަށް އަލިކޮށްލާފައިވަނީ ހިތްގައިމު ގޮތަކަށެވެ. އުޑުމަތި އޮތީ ސާފު، ނޫކުލައިގެ ރީތި ދުވަހެކެވެ. މަޑުމަޑުން ޖެހެމުންދިޔަ ފިނި ރޯޅިތަކާއެކު، ރަށުތެރޭގައި ހުރި ގަސްތަކުގެ ތެރެއިން ގޮވަމުންދިޔަ ކާޅާއި ކޮވެލީގެ އަޑު އިވެމުން ދިޔައީ ހިތްގައިމު މިޔުޒިކީ ރާގެއް ފަދައިންނެވެ. މުޅި ތިމާވެށި ބުނެދެނީ އަމާން، އުފާވެރި ދުވަހެއްގެ ވާހަކައެވެ.

ނަމަވެސް، އެ ހިތްގައިމު މަންޒަރުތަކުން އަހަރެންގެ ހިތަކަށް އެއްވެސް ހަމަޖެހުމެއް ނުލިބުނެވެ. އަހަރެންގެ ހިތުގައި ވަނީ ބިރުވެރިކަމާއި ނާމާންކަމެވެ. ހަށިގަނޑުން ފިނި ދަލެއް ހިއްލަމުން ދިޔައީ، ކުރިން ރޭ އަހަންނަށް ދިމާވި ބިރުވެރި ކަންތައްތައް ހަނދާންވުމުންނެވެ. އެ ހަނދާންތަކުން މުޅި މީހާ ބިރުން ފިތްކަނޑައިގެން ދިޔަ ކަހަލައެވެ.

އެއީ ހުވަފެނެއް ބާއޭ ނުވަތަ ހަގީގަތެއް ބާއޭ ވެސް އަހަރެންގެ ހިތަށް އެރިއެވެ. އެކަމަކު އަހަރެންގެ ކުރިމަތީގައި، މޭޒުމަތީގައި އޮތް ކަޅުވެފައިވާ، މިލާމޯޅިވެފައިވާ ރަތް ފިނިފެންމަލުން ހެކިދެނީ އެއީ ހަމަ ހަގީގަތެއް ކަމެވެ.

އެރެއަކީ އާދަޔާ ޚިލާފަށް ނާމާން، ބިރުވެރި ރެޔެކެވެ. މުޅި އަވަށުތެރެ އޮތީ މަރުހިމޭންކަމެއްގައެވެ. މަގުމަތިން އެއްވެސް މީހެއްގެ ހިލަމެއް، އަޑެއްބަޑެއް ނެތެވެ. ގަޑިން ދަންވަރު ތިނެއް ޖަހަން އުޅެނިކޮށް، އަހަރެންގެ ކޮޓަރީގެ ކުޑަދޮރު ކައިރިން މީހަކު ގިސްލާ ރުއި އަޑު އިވުނެވެ. ބިރުން ތުރުތުރު އަޅަމުން ގޮސް ދޮރުފޮތިގަނޑު ކަހާލި ވަގުތު، ދޮރުމަތީގައި ބަހައްޓާފައި ހުރީ އެންމެ ފިނިފެންމަލެކެވެ. ލެއިން ތެމިފައިވާ ފަދަ ގަދަ ރަތްކުލައިގެ އެ ފިނިފެންމާ ނަގަން އަތް ދިއްކޮށްލި ވަގުތު، ކަންފަތްދޮށުން އިވުނީ ވަރަށް ބިރުވެރި އަޑެކެވެ. “ދުނިޔޭގެ ދަޅައަށް ނުހެއްލޭށެވެ! މިއަދު ފެންނަ ރީތިކަމަކީ މާދަމާގެ ވިހައަކަށް ވެދާނެއެވެ.”

އެ އަޑާއެކު އެ މާ ކުއްލިއަކަށް މިލައި، ކަޅުވެގެން ދިޔައެވެ. ބިރުންގޮސް އަހަރެން ހޭނެތުނީއެވެ.

އިރު އަރައިގެން އައިއިރު، އެ ބިރުވެރި ތަޖުރިބާއިން އަހަންނަށް ލިބުނީ ވަރަށް ބޮޑު އިބުރަތެކެވެ. ބޭރުފުށުން ފެންނަ ކޮންމެ ރީތި ކަމަކީ، ނުވަތަ ހިތްގައިމު ކަމަކީ އޭގެ ހަގީގީ ސިފައެއް ނޫނެވެ. ދުނިޔޭގެ ޒީނަތްތެރިކަމާއި ރީތިކަމުގެ ފަހަތުގައި ފޮރުވިފައިވާ ނުރައްކާތަކަށް އަބަދުވެސް ހޭލުންތެރިވެ، ދުންޔަވީ ދަޅަތަކަށް ނުހެއްލި ހެޔޮމަގުގައި ސާބިތުވެ ތިބުމަކީ ކޮންމެ އިންސާނަކަށްމެ ކޮންމެހެން މުހިންމު ކަމެއެވެ

ހަސަން އަރީން ( އެޑީ )