ހުޅުމާލޭގައި ފުޑް ޓްރަކް ހިންގަން ފުރުސަތު ހުޅުވާލައިފި!

ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހުޅުމާލޭގައި ކާބޯތަކެތީގެ ޓްރަކްތައް އޮޕަރޭޓް ކުރާނެ ޑިވެލޮޕަރުން ހޯދަން އިއުލާންކޮށްފި އެވެ.

އެޗްޑީސީއިން ބުނީ އެކަމަށް ޝައުގުވެރިވާ ހުރިހާ ފަރާތްތަކަށް އެކްސްޕްރެޝަން އޮފް އިންޓްރެސްޓް (އީއޯއައި) ލިޔުން ހުށަހެޅުމަށް ދައުވަތު ދީފައިވާ ކަމަށާއި އޭގެ އަމާޒަކީ ޝައުގުވެރިވާ ހުރިހާ ފަރާތްތަކަށް ހަމަހަމަ ފުރުސަތެއް ފަހިކޮށްދިނުން ކަމަށެވެ.

ފުޑް ޓްރަކް ހިންގަން އީއޯއައި ހުށަހަޅަން ހުޅުވާލައި، އެޗްޑީސީން ކުރި އިއުލާނުގައި ބުނީ ފުޑް ޓްރަކްތައް ހިންގާނީ “ފިކްސްޑް ފީ” މޮޑެލްއަކަށް ކަމަށާއި ނަމަވެސް، އެ ނޫން މޮޑެލްތަކަށް ވެސް އީއޯއައި ހުށަހަޅަން ފުރުސަތު އޮންނާނެ ކަމަށެވެ.

އެއް ފަރާތަށް ވުރެ ގިނައިން އީއޯއައި ހުށަހަޅައިފި ނަމަ، އެޗްޑީސީގެ މާސްޓާޕްލޭނާ އެއްގޮތަށް އެ ހިދުމަތް ފޯރުކޮށްދެވޭނެ ބަޔަކު ހޮވާނެ ކަމަށް އިއުލާނުގައިވެއެވެ. އިއުލާނުގައިވާ ގޮތުން ފުޑް ޓްރަކްތައް ހިންގަން ހަމަޖެހިފައިވަނީ ހުޅުމާލޭގެ 12 ސަރަހައްދެއްގަ އެވެ.

އޭގެ ތެރޭގައި، ފެރީ ޓާމިނަލާއި އެސްޓީއޯ ހޮޓެލް ސަރަހައްދާއި ސެންޓްރަލް ޕާކާއި ފެހިރެސް ޕާކާއި ވޯޓާ ތީމް ޕާކާއި ފުޓްބޯޅަ ސްޓޭޑިއަމް ސަރަހައްދާއި ފަހިވެނި ކޮމިއުނިޓީ ސެންޓަރާއި އެޗްޑީސީ ހެޑް އޮފީސް ހިމެނެ އެވެ.

ޕްރޮޕޯސަލް ޑޮކިއުމަންޓް ހުށަހަޅަން ޖެހޭނީ އެޗްޑީސީން ލިބެން ހުންނަ “އެކްސްޕްރެޝަން އޮފް އިންޓްރެސްޓް (އީއޯއައި) އެޕްލިކޭޝަން ފޯމް” ގައި ބަޔާންކޮށްފައިވާ ގައިޑްލައިންތަކާ އެއްގޮތްވާ ގޮތުގެ މަތިންނެވެ.

މިކަމަށް ޝައުގުވެރިވާ ފަރާތްތަކުން 6 އޮގަސްޓް 2024 ވާ ބުރާސްފަތި ދުވަހުގެ 14:00 ގެ ކުރިން އީމެއިލް މެދުވެރިކޮށް ނުވަތަ އެޗްޑީސީގެ ހެޑްކުއާޓަރަށް އީއޯއައި ހުށަހެޅުމަށް ވަނީ އިލްތިމާސްކޮށްފައެވެ.

ޝިނާ