އެޑިއުކޭޝަން މިނިސްޓަރގެ ނިންމުން – އުގެނުމުގެ ޝައުޤުވެރިކަމަށް ބުރަކި ޖެއްސުން

އިބްރާހީމް ޙަސަން

ޔުނިވަރސިޓީ ތައުލީމް ޙާސިލް ކުރާނެ  2500 ދަރިވަރުންވެސް  މިހާރު ނުލިބޭ ކަމަށް ވިދާޅުވެ އެޑިއުކޭޝަން މިނިސްޓަރ ދާދި ފަހުން އިއުލާން ކުރެއްވި،  ގްރޭޑް 11 ށް ވަނުމަށް ފާސް ވާން ޖެހޭ މިންގަނޑު ދަށް ކޮށްލުމަކީ  ދަރިވަރުން ކިޔެވުމަށް ކުރާ މަސައްކަތުގެ ޝައުޤުވެރިކަން ގެއްލިގެން ދާނެ ކަމެއްކަމަށް ފެނެއެވެ. އަދި ޢިލްމީ ޤާބިލް ޖީލެއް ބިނާ ކުރުމަށް ކުރާ މަސައްކަތަށް އެޅުނު ހުރަހެއް ކަމުގައި ދެކެމެވެ.

މީގެ އަހަރު ތަކެއްގެ  ކުރީން އެއް ގްރޭޑުން އަނެއް ގްރޭޑަށް ބަދަލް ވުމަށް ދަރިވަރު ފާސްވާން ޖެހެއެވެ. ވީމާ  ބެލެނިވެރިންނާއި ޓީޗަރުން ވެސް ދަރިވަރުން  ފާސްވޭތޯ މަސައްކަތް ކުރެއެވެ. ރެއާ ދުވާލު ބެލެނިވެރިން މަސައްކަތް ކުރެއެވެ. ނަމަވެސް މިހާރު އަމަލު ކުރާ އުޞޫލުގައި ވާ ގޮތުން   އެންމެ ކުޑަމިނުން ލިޔަން ކިޔަން ނޭގުނު ނަމަވެސް  އައު ދިރާސީ އަހަރާ އެކު ގްރޭޑް ބަދަލް ވެގެން ދާ ގޮތަށް ހަމަ ޖެހިފައި އޮތުމުން ދަރިވަރުން ވެސް އަދި މުދައްރިސުން އިތުރަށް ކުރަން ޖޭހެނެ މަސައްކަތެއް ނެތެވެ. އަދި ދަރިވަރުންގެ ފެންވަރު ދުވަހުން ދުވަހަށް ބަލާ މޮނިޓަރ ކުރެވުނު ނަމަވެސް ދަރިވަރުންގެ އިލްމީ ޤާބިލް ކަން އިތުރު ކުރުމަށްޓަކައި މާބޮޑަށް ވިސްނުމެއް އެއްވެސް ފަރާތަކުން ގެންގުޅޭކަށް މަޖުބޫރެއް ނޫނެވެ.  ކޮންމެ ގްރޭޑެއް ނިންމާ އިރު ދަރިވަރު ޙާސިލް ކުރަން ޖެހޭ ބައިތައް ޙާސިލް ވި ކަމަށް މުދައްރިސުން ޔަޤީން ކުރާ ގޮތަށް އޮތްނަމަވެސް، ހާސިލް ނުވާ ދަރިވަރުންނަށް އިތުރަށް ކުރާނެ ކަމެއް އަހަރު ނިމޭއިރުވެސް އޮންނަ ކަމަކަށް ނުވެއެވެ. ޙާސިލް ނުވާ ދަރިވަރުން ޙާސިލް ނުވީއެވެ.  މިހާރު ރާއްޖޭގައި ކޮންމެ އަހަރަކު އެތައް ދަރިވަރުންނެއް ޘާނަވީ އިމްތިހާނުގައި ބައިވެރިވި ނަމަވެސް ފެއިލް ވި ނިސްބަތް ޢާއްމު ވަމުން ނުދާތީ ފާސް ނުވަނީ ކިތައް ކުދިން ކަމެއް ނޭގެއެވެ.

ޔުނިވަރސިޓީ ތައުލީމު ޙާސިލް ކުރުމަށް 2500 ކުދިން ނުލިބެނީ ގިނަ ކުދިންނަށް މަތީ ޘާނަވީ އަށް ފުރުޞަތު ނުދޭތީ ތޯއެވެ. އެހެންވެއްޖެނަމަ، މިހާރު ދުނިޔޭގެ ޔުނިވަރސިޓީތަކުން ޖާގަ ދިނުމަށް ކުއްޖާގެ ތައުލީމީ ފެންވަރު ބެލުމެއް ނެތީ ތޯއެވެ. ހަމަ އެކަނި ގްރޭޑް 12 ނިންމި ކަމުގެ ސްކޫލު ލީވިންގ ސަޓިފިކެޓް އަކުން ފުދެނީތޯއެވެ. މިހާރު ދަރިވަރުންގެ އަމަޒަކީ  ކޮންމެ ހެން ކިޔަވަން މަސައްކަތް ކުރާނެ ކަމެއް ނެތެވެ. ގްރޭޑް 12 ނިންމާލެވޭނެއެވެ. ކޮންމެހެން ރަގަޅު ނަތީޖާއަކަށް މަސައްކަތް ކުރާނެ ކަމެއް ނެތެވެ. އެޑިއުކޭޝަން މިނިސްޓަރ ގެ މިނިންމެވުމަކީ ކިޔެވުމަށް އޮތް ޝައުޤަށް އޮތް ބުރަކި ޖެހުން ނޫން އެހެން ކަމެއް ނޫނެވެ.

ކުރާނެ ކަމެއް ނެތެވެ.  ރާއްޖޭގައި އެންމެ މަތީ މުސާރަ އާއި އިނާޔަތާއި ބަނޑު ހަނޑު ލިބޭ މަޤާމު ތަކަކީ  ތައުލީމު އާއި ހުނަރު ކޮންމެހެން ބޭނުންވާ މަޤާމު ތަކެއް ނޫނެވެ.  އޮންނަން ޖެހޭނީ ހަމަ އެކަނި “އަނގަ” އެކެވެ. އަސްތާ އެއީ އެހެން މަޢުޟޫޢު އެއް ކަމަށް ވާތީ މިވަގުތަށް އަޅުގަނޑުވެސް ބުރަކި ޖައްސާލީ އެވެ.

އިބްރާހިމް ޙަސަން