ރައްޔިތުންގެ މަޖިލީހުގެ ގަވާއިދުގެ ދަށުން މަޖިލީހުގެ ދާއިމީ ކޮމިޓީއެއްގެ ގޮތުގައި “ގެދޮރުވެރިކަމުގެ ކޮމިޓީ” ގެ ނަމުގައި އާ ކޮމިޓީއެއް އުފައްދައިފި އެވެ.
މަޖިލީހުގެ ގަވާއިދުގެ ދަށުން ކުރިން މަޖިލީހުގައި އޮތީ ދާއިމީ ތިން ކޮމެޓީއާއި، ދައުލަތުގެ އިދާރާތަކާ ބެހޭ ދާއިމީ 15 ކޮމެޓީއެވެ.
“ގެދޮރުވެރިކަމާ ބެހޭ ކޮމެޓީ” ދައިމީ ކޮމެޓީއެއްގެ ގޮތުގައި ކަނޑައަޅާފައިވަނީ ދައުލަތުގެ އިދާރާތަކާ ބެހޭ ދާއިމީ ކޮމެޓީތަކުގެ ލިސްޓަށެވެ. މި ކޮމެޓީ އުފެއްދީ މަޖިލީހުގެ ގަވައިދުގެ 115 ވަނަ މާއްދާއަށް އަކުރެއް އިތުރުކޮށްގެންނެވެ.
މިއަދުގެ މަޖިލިސް ފައްޓަވަމުން ރައްޔިތުން މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ އަލަށްް އެކުލަވާލި “ގެދޮރުވެރިކަމާ ބެހޭ ކޮމެޓީ” އަށް މެމްބަރުން ހޮވާނީ މިއަދު ވޯޓުގެ ގަޑީގައިކަމަށެވެ.މިކޮމެޓީގެ މަސްއޫލިއްޔަތުތަކަކީ، ސަރުކާރުން ހިންގާ އިޖްތިމާއީ ބޯހިޔާވަހިކަމުގެ މަޝްރޫއުތައް ކުރިއަށްދާ ގޮތް ބަލައި، އެ މަޝްރޫއުތަކާ ގުޅިގެން ފާހަގަކުރެވޭ މައްސަލަތައް ދިރާސާކޮށް، އެކަންކަން ހައްލުކުރުމަށް ސަރުކާރަށް ލަފާދިނުމާއި، އެ މަޝްރޫއުތައް އަވަހަށް ނިންމަން ސަރުކާރަށް ލަފާދިނުމެވެ.
ސަރުކާރުން ދޫކުރާ ފްލެޓްތަކާއި ގުޅިގެން މައްސަލަތައް ދެން ބަލާނީ މި ކޮމެޓީންނެވެ.
Leave a Reply