ޒަކާތު ފަންޑަށް 6 މަސްތެރޭ 50 މިލިއަނަށްވުރެ ގިނަ ރުފިޔާ ޖަމާވެފައިވާކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ދައުލަތުގެ މީޑިއާއަށް މައލޫމާތުދެއްވަމުން އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ މިއަހަރުގެ ފުރަތަމަ 6 މަސް ދުވަހުގެ ތެރޭގައި ޒަކާތު ފަންޑަށް 50 މިލިއަނަށްވުރެ ގިނަ ރުފިޔާ ޖަމާވެފައިވާކަމަށާއި އަދި މިއަހަރު ނިމޭއިރު މި ޢަދަދު ދެގުނަވެ 100 މިލިޔަނާ ގާތްކުރާނެ ކަމަށާއި އެއީ އަމާޒެއްކަމަށެވެ. އަދި މިއީ ތާރީޚީ ކަމަކަށް ވެގެންދާނެ ކަމަށް ވެސް ޑރ.ޝަހީމް ފާހަގަކުރެއްވިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވެރިކަމުގެ އެންމެ ކުރީކޮޅު ޒަކާތާބެހޭ ކަންކަމަށް ޚާއްސަކޮށްގެން ވަކި އިދާރާއެއް ވުޖޫދަށް ގެނައުމަކީ ރާއްޖޭގެ ޒަކާތުގެ ނިޒާމު އިތުރަށް ފުޅާކޮށް ފުރިހަމަކުރެއްވުމަށް އެމަނިކުފާނު ގެންގުޅުއްވާ ތަޞައްވުރު ރަމްޒުކޮށްދޭ ކަމެއްގެ ގޮތުގައި ބެލެވެއެވެ. މި އިދާރާ ހިންގަނީ އިސްލާމީ ކަންތައްތަކާ ބެހޭ ވުޒާރާގެ ދަށުންނެވެ.
“ދިވެހިރާއްޖޭގެ ޒަކާތު ހައުސް” ގެ ނަމުގައި ސަރުކާރުގެ ޚާއްސަ އިދާރާއެއް ޤާއިމުކުރެއްވީ މިދިޔަ އަހަރުގެ 18 ޑިސެމްބަރުގައެވެ. މި އިދާރާ ރަސްމީކޮށް އިފްތިތާޙްކޮށްފައިވަނީ މިއަހަރުގެ ޖެނުއަރީ 2 ގައެވެ.
Leave a Reply