ހަމާސްގެ ސިޔާސީ ލީޑަރު، އީރާނު ސަރުކާރުގެ ރަނގަޅަށް ހިމާޔަތްކޮށްފައިވާ ގެސްޓް ހައުސްއެއްގައި އަވަހާރަކޮށްލެވުނީ ކިހިނެއް ކަން އަދިވެސް އޮތީ ސިއްރެއްގެ ގޮތުގަ އެވެ.
އިޒްރޭލުގެ ފޮރިން އިންޓެލިޖެންސް ސާވިސް މޮސާޑުން ހަމާސްގެ ސިޔާސީ ލީޑަރު އިސްމާއިލް ހަނިއްޔާ ހުންނެވި ކޮޓަރީގައި ބޮމް ހަރުކުރުމަށް އީރާންގެ އެޖެންޓުން ބޭނުން ކުރި ކަމަށް މީޑިއާ ރިޕޯޓްތައް ބުނެ އެވެ.
އީރާނުގެ ދެ އޮފިޝަލަކާ ހަވާލާދީ އިނގިރޭސި ކޮންޒަވޭޓިވް ޑެއިލީ ނޫހެއް ކަމަށްވާ “ދަ ޓެލެގްރާފް” އިން ރިޕޯޓްކޮށްފައިވާ ގޮތުގައި ހަނިއްޔާ ދިރިއުޅެމުން ދިޔަ އިމާރާތެއްގެ ތަފާތު ތިން ކޮޓަރީގައި ބޮމް ހަރުކުރުމަށް މޮސާޑުން އީރާނުގެ އެޖެންޓުންނަށް އަންގާފައިވެ އެވެ.
ހަމާސް އާއި އީރާނުން އިސްރާއީލަށް ތުހުމަތުކޮށް ބަދަލު ހިފާނެ ކަމުގެ އިންޒާރު ދީފައިވެއެވެ. ނަމަވެސް އެ ތުހުމަތުތަކަށް އިޒްރޭލުން އަދި ރަސްމީކޮށް ޖަވާބެއް ދީފައެއް ނުވެ އެވެ.
ފުރަތަމަ ހަނިއްޔާ މަރާލުމަށް ރާވާފައިވާ ޕްލޭނަކީ މިދިޔަ މެއި މަހު ހެލިކޮޕްޓަރު ވެއްޓި މަރުވި ކުރީގެ ރައީސް އިބްރާހިމް ރައީސީގެ ޖަނާޒާގައި ހާނިޔާ ބައިވެރިވެވަޑައިގަތުމުން އޭނާ މަރާލުމެވެ. ނަމަވެސް ގިނަ ބަޔަކު އެއްވެ، ފެއިލްވުމުގެ ފުރުސަތު ބޮޑުކަމުން އެ ޕްލޭން ވަނީ ހުއްޓާލައިފަ އެވެ.
އޭގެ ބަދަލުގައި މޮސާޑުން އީރާންގެ ދެ އެޖެންޓުން ބޭނުންކޮށްގެން ހަނިއްޔާ މަރާލީއެވެ. ސަވައިލަންސް ކެމެރާ ފުޓޭޖުން ފެންނަ ގޮތުގައި އެޖެންޓުން މަދު މިނެޓެއްގެ ތެރޭގައި ގިނަ ކޮޓަރިތަކަކަށް ވަދެ ނިކުންނަ ތަން ވެސް ފެނިފައިވެއެވެ.
Leave a Reply