ރައީސް އެދި ވަޑައިގަންނަވާ ގޮތަށް ފަތިހު ހޭލާ ދިވެހި މުޖުތަމަޢު އަކަށް ބަދަލް ކުރުމަށްޓަކައި ބަދަލްތަކެއް ގެންނަން ޖެހޭ

ދިވެހިންގެ ދިރިއުޅުމުގެ ވައްޓަފާޅިއަށް ކުރީގެ ދިރިއުޅުމާއި އަޅާބަލާއިރު ވަރަށް ބޮޑެތި  ބަދަލްތަކެއް މިހާރު އަތުވެއްޖެއެވެ. މިއަދު ދުވާލުގެ މަސައްކަތަށް އާއްމުކޮށް ނުކުންނަނީ ހެދުނު 8ގެ ފަހުން ނުވަތަ ބިމަށް ހޫނުކަން ލިބި އެތައް އިރެއް ވާ ފަހުންނެވެ. ގިނަ މީހުން  ރޭގަނޑު ނިދަނީ މެންދަމު އަލިވެ އެކެއް ދޭއް ޖަހާ ފަހުންނެވެ. މިއީ އަޅުގަނޑުމެންގެ ކާބަފައިން ދިރިއުޅުނު ގޮތެއް ނޫން ކަމަށް އެންމެންވެސް ޤަބޫލް ކުރެއެވެ.  ދިވެހިންނަކީ ފަތިހު ފަތިސްނަމާދުން ދުވަސް ފަށާ އިރު އޮއްސުމުން ގެއަށް ވަދެ،  އާއިލާ އެކު ކައިބޮއި އުޅުނު ބައެކެވެ. މިއަދު ވެރިރަށް މާލެ އަށް ބަލާއިރު ފެންނަނީ ދަންވި ދަންވިހެން މަގުތަކުގެ ހަލަބޮލިކަން އިތުރުވަމުން ދާތަނެވެ. ސައިކަލްތަކާއި ކާރުތަކުގެ ސްޕީޑް ބާރުވެ ހިނގާ މީހުންނަށާއި ދުއްވާ އެހެން މީހުންނަށް އެތައް އަނިޔާއެއް ލިބެމުން ދާ ކަމީ މިއަދުގެ ހަޤީޤަތެވެ.  ކެފޭތަކާއި ރެސްޓޯރެންޓްތަކުގައި މަޖާ ކުރުމުގައި ކޮފީ ތަކުގައި  ނުނިދާ ވަގުތު ހޭދަ ކުރާތަން ފެނެއެވެ. ދެރަހުމަތްތެރިންނަށް ވެސް ކޮފީ އަކުން ބައްދަލު ކޮށްލާ ޚިޔާލު ބަދަލު ކޮށްލަން ލިބެނީ ރޭގަޑު މެންދަމު 12ގެ ފަހުންނެވެ. މިއީ މިއަދު ދިވެހީން ދިރިއުޅޭ ގޮތެވެ. ޚާއްޞަކޮށް ރާއްޖޭގެ އާބާދީގެ ދެބައި ކުޅައެއްބައި ދިރިއުޅޭ މާލޭގައި ދިރިއުޅުން ހަމަ ޖެހިފައިވާ ގޮތް ކަމަށް ގިނަ ބަޔަކު ޤަބޫލް ކުރާނެއެވެ.

މިއަހަރުގެ ޤައުމީ ދުވަހުގެ މުނާސަބަތުގައި ރައީސުލްޖުމުހޫރިއްޔާ ޑޮކްޓަރ މުހަންމަދު މުޢިއްޒު ދިވެހި ޤައުމާ މުޚާތަބު ކުރައްވާ ދެއްކެވި ވާހަކަފުޅުގައި ފަތިހު ހޭލާ ދިވެހި މުޖުތަމައެއް ބޭނުން ކަމަށް ވިދާޅުވެފައިވެއެވެ. އެމަނިކުފާނު އެވިދާޅުވާ ފަތިހު ހޭލާ މުޖުތަމައު،  ފަތިސްނަމާދަށް ފަހު ރިޒުޤު ހޯދުމަށް މަސައްކަތް ފަށާނެއެވެ. އަޅުގަނޑުމެންގެ މާތްވެގެން ވާ އިސްލާމް ދީނުގައި އަމުރު ކުރަނީ ފަތިހު ހޭލާ ހެދުނު މަސައްކަތް ފެށުމަށެވެ. ރޭގަނޑު ބޭނުމެއް ނެތްގޮތުގައި ހޭލާ ނުތިބުމަށެވެ. ރައީސް އެދި ވަޑައިގަންނަވާ ގޮތަށް ދިވެހި މުޖުތަމައު ބަދަލް ކުރަން ބޭނުންނަމަ މިހާރު ދިވެހި ރާއްޖޭގައި ގެންގުޅޭ އުޞޫލުތަކާއި ދިރިއުޅުމުގެ ވައްޓަފާޅިއަށް ބޮޑެތި ބަދަލްތަކެއް ގެންނަން ޖެހެއެވެ.

މިގޮތުން:

• ސަރުކާރުގެ އޮފީސްތަކުގެ ޚިދުމަތް ދޭ ގަޑިއަކީ ހެދުނު 7.00ން 00 ކަމުގައި ހަމަ ޖެއްސުން.
• ޢާއްމު ވިޔާފާރިތައް ރޭގަނޑު 9.00ގައި ބަންދު ކުރުން. ހޮޓާ ތަކާއި ކެފޭތައް ރޭގަޑު 11.00ގައި ބަންދު ކުރުން
• މަގުތައް ޚާއްސަކޮށް މާލޭގެ މަގުތައް ފުލުހުންނާއި ސިޓީ ކައުންސިލުން ބެލެހެއްޓުން.
• ކުޅިވަރު ހަރަކާތްތައް ދެނަމާދު ދޭތެރެ ވަގުތު ( މަޣުރިބް ނަމާދާއި އިޝާނަމާދު ވަގުތު) ނުހިންގުން. އަދި ޚާއްޞަކޮށް ސްކޫލް ކުދިންގެ އެއްވެސް ހަރަކާތެއް ، އިތުރު ގަޑި އެއް ނަމަވެސް އެގަޑީގައި ނުބޭއްވުން.
• ސަރުކާރުން ބާއްވަވާ ހަރާކާތްތައްވެސް ރޭގަނޑު 11.00ގެ ކުރީން ނިންމާ ގޮތަށް އިންތިޒާމު ކުރުން

އަދިވެސް މިނޫންވެސް ކަންކަން ކަމަށް ބަދަލް ގެނެސްގެން މެނުވީ ރައީސް ޑޮކްޓަރ މުޢިއްޒު ބޭނުންފުޅުވާ ފަތިހު ހޭލާ މުޖުތަމަޢުއް ބިނާ ނުކުރެވޭނެ ކަމަށް ޤަބޫލު ކުރަން ޖެހެއެވެ. ރައީސް އެދިވަޑައިގަންނަވާ ގޮތަށް ދިވެހި މުޖުތަމަޢު ބައްޓަން ކުރުމަށްޓަކައި ސަރުކާރުގެ  ގުޅުން ހުރި އިދާރާތަކުން ގެންނަން ޖެހޭ ބަދަލްތައް ގެންނާނެ ކަމާ މެދު ޝައްކެއްނެތެވެ.

އިބްރާހިމް ޙަސަން