ރާއްޖޭގެ ރައީސް ޑރ. މުހައްމަދު މުއިއްޒު އިންޑިޔާއަށް ކުރެއްވުމަށް ހަމަ ޖައްސަވާފައިވާ ދަތުރުފުޅު އަންނަ އާދިއްތަ ދުވަހު ކުރައްވާ ގޮތަށް ހަމަ ޖައްސަވާފިއެވެ.
މި ދަތުރުފުޅު ކުރެއްވުމަށް ނިންމަވާފައިވަނީ އެ ގައުމުގެ ރައީސް ދުރޫޕަދީ މުރުމޫގެ ދަޢުވަތަކަށެވެ. ރައީސް އޮފީހުގެ ތަރުޖަމާނު ހީނާ ވަލީދު “އެކްސް”ގައި ކުރެއްވި ޕޯސްޓެއްގައި ވިދާޅުވި ގޮތުގައި ރައީސް ޑރ. މުއިއްޒު އިންޑިއާއަށް ވަޑައިގަންނަވަނީ ފުރަމާނަ ދަތުރުފުޅެއްގައި އާދިއްތަ ދުވަހުން ފެށިގެން ބުރާސްފަތި ދުވަހުގެ ނިޔަލަށެވެ. މި ދަތުރުފުޅުގައި އިންޑިއާގެ ރައީސާއި، ބޮޑު ވަޒީރާއި، އަދި އެ ޤައުމު އިސް މަސްއޫލުވެރީންނާއި ބައްދަލުކުރައްވައި، ދެ ޤައުމުގެ ގުޅުން އިތުރަށް ބަދަހިކުރެއްވުމަށް މަޝްވަރާކުރެއްވުމަށް ހަމަޖެހިފައިވެއެވެ. މި ދަތުރުފުޅުގައި، އެމަނިކުފާނުގެ އަރިހުގައި ދިވެހި ސަރުކާރުގެ މަތީ ފެންވަރުގެ ވަފްދެއް ބައިވެރިވެވަޑައިގަންނަވާނެއެވެ. އަދި މި ދަތުރުފުޅުގައި، ދިވެހި ވަފްދުގެ މެހްމާންދާރީގެ ހުރިހާ ކަންކަންވެސް ހަމަޖައްސަވައިދެއްވާނީ އިންޑިއާ ސަރުކާރުގެ ފަރާތުން ކަމަށް ރައީސް އޮފީހުން ހާމަކޮށްފައިވެއެވެ.
ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަމުގައި އިންޑިއާ އާއި ރާއްޖެއާ ދެމެދު ވަރަށް ވަރުގަދަ ގުޅުމެއް އުފެދިގެން ދިޔައެވެ. އެ ވެރިކަމުގައި ރާއްޖެ އަށް އެންމެ ބޮޑެތި އެހީތަކެއް ދިން އެއް ގައުމަކަށްވީ ވެސް އިންޑިއާއެވެ. އެކަމަކު، މި ސަރުކާރުގެ ތިން ޑެޕިއުޓީ މިނިސްޓަރަކު އިސްކޮށް ތިއްބަވައި އިންޑިއާއަށާއި އިންޑިއާގެ ބޮޑުވަޒީރު ނަރެންދުރަ މޯދީ އަށް ފުރައްސާރަކޮށް، ބަދު ބަސް ވިދާޅުވި މައްސަލަ ހޫނުވެ، ދެ ގައުމުގެ ގުޅުން ހީނަރުވެގެން ދިޔައެވެ. އެގުޅުން ހީނަރުވެފައި ވަނިކޮށް އަލުން ގުޅުން ބަދަހިވާން ފެށީ ދިވެހި ސަރުކާރުން ތިން ޑެޕިއުޓީ މިނިސްޓަރުންނާ މެދުގައި ފިޔަވަޅު އެޅުމުންނާއި ގުޅުން ބަދަހި ކުރަން ދެ ގައުމުން ވެސް ކުރި މަޝްވަރާތަކާ ގުޅިގެންނެވެ.
Leave a Reply