ދެކުނު ކޮރެއާގެ ރައީސް ޔޫން ސުކް ޔޯލް އެ ގައުމުގެ އާންމު ރައްޔިތުންގެ ކިބައިން މާފަށް އެދިވަޑައިގެންފި އެވެ.
އެއީ ދެކުނު ކޮރެއާގައި އެ ފަދަ ހާލަތެއް ނެތި ހަމަ ކުއްލި ގޮތަކަށް އަސްކަރީ ގާނޫނަށް އަމަލުކުރެއްވުމަށް ނެރުއްވި އަމުރަކާ ގުޅިގެންނެވެ.ރައީސް ޔޫންއަށް ގާނޫނުން ލިބިވަޑައިގަންނާ ހާއްސަ ބާރުތައް ނަހަމަ ގޮތުގައި ބޭނުންހިއްޕަވައި، އަސްކަރީ ގާނޫން އިއުލާންކުރެއްވުމާ ގުޅިގެން މުޅި ދެކުނު ކޮރެއާ މިހާރު އޮތީ ވަރަށް ބޮޑު ނުތަނަވަސްކަމެއްގަ އެވެ.
ޔޫންގެ މި އަމަލު އިދިކޮލު ލީޑަރުންގެ އިތުރުން އޭނާގެ އަމިއްލަ ޕާޓީން ވެސް އޮތީ ކުށްވެރިކޮށްފަ އެވެ.
ދެކުނު ކޮރެއާގައި ވެރިކަންކުރާ ޕީޕަލް ޕަވާ ޕާޓީން ވަނީ ރައީސް ޔޫންއަށް ހާއްސަކުރެވިފައި ހުރި ބާރުތައް ހިފެއްޓުމަށް ދައުލަތުގެ ތަންފީޒީ ބާރުތަކަށް ގޮވާލައްވާފަ އެވެ.
ޕީޕަލް ޕަވާ ޕާޓީގެ ލީޑަރު ހޭން ޑޮން ހޫން ތަންފީޒީ ބާރުތަކަށް މިފަދައި ގޮވާލެއްވި ސަބަބަކީ ރައީސް ޔޫން ރިޔާސީ ބާރުތައް ނާޖާއިޒު ގޮތުގައި އަދިވެސް ބޭނުންހިއްޕަވަފާނެތީ އެވެ.
ޔޫންއަށް އޮތް ބާރުތައް ނުހިފަހައްޓައިފި ނަމަ، އަސްކަރީ ގާނޫން އިއުލާންކުރެއްވުން ފަދަ ހަރުކަށި ފިޔަވަޅުތަކެއް އެޅުއްވުމުގެ ފުރުސަތު އޮތް ކަމަށް ހޫން ވިދާޅުވި އެވެ.
ރައީސް ޔޫން މާފަށް އެދިވަޑައިގެން ޓީވީގައި ދެއްވި ބަޔާނުގައި ވިދާޅުވީ އޭނާ މަގާމުން ދުރުކުރުމަށް ގާނޫންހަދާ މަޖިލީހަށް ހުށަހަލާފައި އޮތް ހުށަހެލުމާ މެދު އެއްވެސް މައްސަލައެއް ނެތް ކަމަށެވެ.
އަދި އެފަދައިން މަގާމުން ދުރުކުރުމަށް އިދާރީ ބާރުތަކުން ނިންމިނަމަވެސް، ނުކިޔަމަންތެރިކަން ނުދައްކަވާނެ ކަމަށެވެ. އޭނާއަށް އޮތީ ސުލްހަވެރި ގޮތުގައި އެ ނިންމުން ބަލައިގަތުން ކަމަށް ޔޫން ވިދާޅުވި އެވެ.
ގައުމުގައި އަސްކަރީ ގާނޫން އިއުލާންކުރެއްވުމާ ގުޅިގެން އޭނާއާ މެދު ކޮންމެ ގޮތަކަށް އަމަލުކުރެއްވި ނަމަވެސް ރުހިވަޑައިގަންނަވާނެ ކަމަށް ވިދާޅުވި އެވެ. މިފަދަ ނިންމެވުމެއް މަޝްވަރާކުރުމެއް ނެތި ނިންމެވުނީތީ ވަރަށް ބޮޑަށް މާފަށް އެދޭ ކަމަށް ވެސް ޔޫން ވިދާޅުވި އެވެ.
އޭނާގެ އަމިއްލަ ޕާޓީން އޭނާއާ މެދު ކޮންމެ ގޮތެއް ނިންމި ނަމަވެސް، އެ ގޮތްވެސް ގަބޫލުކުރައްވާނެ ކަމަށް ވިދާޅުވި އެވެ. އަދި ގައުމުގައި ނުތަނަވަސްކަން އުފެދިދާނެ އެއްވެސް ކަމެއް ނުކުރައްވާނެ ކަމަށް ވެސް އޭނާ ވިދާޅުވި އެވެ.
Leave a Reply