ރައީސް އޮފީހުން މިއަދު ކުރި އިޢުލާނެއްގައި ބުނެފައިވަނީ އެންޓި-ކޮރަޕްޝަން ކޮމިޝަން (އޭސީސީ) ގެ ދެ މެންބަރަކު އިސްތިއުފާ ދެއްވާފައިވާތީ، ހުސްވެފައިވާ ދެ މަޤާމަށް ކުރިމަތިލުމުގެ ފުރުސަތު ހުޅުވާލާފައިވާ ކަމަށެވެ. މި ފުރުސަތު މި މަހުގެ 16 ވަނަ ދުވަހުގެ މެންދުރު 12:00 އާ ހަމައަށް ހުޅުވާލާފައިވާ ކަމަށް އިޢުލާނުގައި ބަޔާންކޮށްފައިވެއެވެ.
އޭސީސީގެ މެންބަރުކަމުން އިސްތިއުފާ ދެއްވާފައިވަނީ ކޮމިޝަންގެ ނައިބު ރައީސް އަބްދުލްސަލާމާއި މެމްބަރު ތޯހާ މުހައްމަދެވެ. މި ދެ މެންބަރުން އިސްތިއުފާ ދެއްވާފައިވަނީ އެ ފަރާތްތަކާ މެދު ނުފޫޒު ފޯރުވުމާއި ކޮރަޕްޝަންގެ ބޮޑެތި ތުހުމަތުތަކެއް ކުރެވި، ދެ މެންބަރުން ވަކި ކުރަން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ނިންމާފައިވަނިކޮށެވެ.
އިސްތިއުފާ ދެއްވި ދެ މެންބަރުން ފޮނުއްވި ސިޓީގައި ބުނެފައިވަނީ އެ ފަރާތްތަކުން އެމީހުންގެ ޒިންމާތައް މިނިވަންކަމާއި ނަޒާހަތްތެރިކަމާ އެކު ޤާނޫނުއަސާސީ އަދި ޤާނޫނުގައި ބުނާގޮތަށް ތެދުވެރިކަމާއި އިޚްލާޞްތެރިކަމާ އެކު ކުރަމުން ދަނިކޮށް، އެ ފަރާތްތަކާ މެދު ކޮށްފައިވަނީ އެއްވެސް އަސާސެއް ނެތް ތުހުމަތުތަކެއް ކަމަށެވެ. އަދި އިތުބާރު ނެތްކަމުގެ މައްސަލަ ބެލުމަކީ، ޤާނޫނުން ހަވާލުކޮށްފައިވާ ޒިންމާތައް މިނިވަންކަމާ އެކު އަދާކުރުމަށް ހުރަސް އެޅޭނެ ކަމެއް ކަމަށްވެސް ބަޔާންކޮށްފައިވެއެވެ.
މި ދެ މެންބަރުން އިސްތިއުފާ ދެއްވުމާ ގުޅިގެން، އޭސީސީގައި މިހާރު ތިއްބެވީ އެ ކޮމިޝަންގެ ރައީސް އާދަމް ޝާމިލާއި ޝިޔާމާ މުހައްމަދުގެ އިތުރުން ޝަޒްނާ ހާޝިމެވެ.
މި ހުސްވެފައިވާ މަޤާމުތަކަށް ޤާބިލު ފަރާތްތަކެއް ހޮވުމަކީ އޭސީސީގެ މަސައްކަތްތައް ހަރުދަނާކޮށް، ކޮރަޕްޝަން ހުއްޓުވުމަށް ކުރެވޭ މަސައްކަތްތައް އިތުރަށް ހަރުދަނާކުރުމަށް މުހިންމު ކަމެއް ކަމުގައި ބެލެވެއެވެ.
Leave a Reply