ރޭގަނޑުގެ ހަމަހިމޭން ވަގުތެވެ. މުޅި މާހައުލަށް ވެރިވެފައިވަނީ ފުން ހިމޭންކަމެކެވެ. ކޮޓަރީގެ ތެރެއިން އިވެމުންދަނީ ހަމައެކަނި އެނބުރެމުންދާ ފަންކާގެ އަޑެވެ. ނަމަވެސް، އެ ހިމޭންކަމުގެ ތެރޭގައި ޒަކުވާންގެ ހިތުގެ ތެޅުމުގެ އަޑު އޭނާއަށް އިވޭ ކަހަލައެވެ.
ގޭގެ ގޭޓާ ހަމައަށް ފޯރުނުއިރު، ޒަކުވާން ހުރީ ބިރުން ގޮސް މުޅިން ހަފުސްވެފައެވެ. ސައިކަލުން ފޭބިއިރު އޭނާގެ ދެފައި ތަޅަނީއެވެ. މުޅި މީހާ ވަނީ ދާހިތްލާ ފޯވެފައެވެ. މަގުމަތިން ފެނުނު އެ ނާމާން މަންޒަރު ހިތަށް ސިފަވި ކޮންމެ ފަހަރަކު މުޅި ހަށިގަނޑު ރޫޅިގެންދާ ފަދަ އިހުސާސެއް ކުރެވެއެވެ. ގޭގެ ތެރެއަށް ވަދެ، ދޮރު ތަޅުލުމަށްފަހު، އެނދުމައްޗަށް އޭނާ އުކާލެވުނެވެ. އެވަގުތު އޭނާގެ ހަށިގަނޑު ހީވަނީ އަލިފާންގަނޑެއް ހެންނެވެ. ބިރުގަތްވަރުންނާއި ކުރެވުނު ނާމާން ތަޖުރިބާގެ ސަބަބުން އޭނާ ހުރީ ގަދަޔަށް ހުން އައިސްފައެވެ.
އެ ނާމާން ކަޅު ހިޔަނި އޭނާގެ ލޮލަށް ފެނުނު ހިސާބުން ފެށިގެން، އޭނާގެ ހިތަކަށް ހަމަޖެހުމެއް ނުލިބުނެވެ. އެއީ އޭނާގެ ދިރިއުޅުމުގައި ދުވަހަކުވެސް ހަނދާނުން ފޮހެލެވޭނެ ރެއެއް ނޫނެވެ. އަނދިރި ގޯޅިގަނޑެއްގެ ތެރެއިން ފެނުނު އެ ދިގު، ކަޅު، ބިރުވެރި ހިޔަނި އޭނާގެ ފަހަތުން އައި ކަހަލަ އިހުސާސެއް އަދިވެސް ކުރެވެނީއެވެ.
އެނދުމަތީގައި އޮށޯވެލައިގެން އޮއްވައި، ޒަކުވާންއަށް އެތަކެއް ބިރުވެރި އިހުސާސްތަކެއް ކުރެވެން ފެށިއެވެ. ކޮޓަރީގެ ކަނަކުން މީހަކު ބަލަން ހުރިހެން ހީވެ، މުޅި ގައިން ހީބިހި ނަގައިގެން ދިޔައެވެ. ކޮޓަރީގައި އޭނާ ފިޔަވައި އިތުރު މީހަކު އުޅޭ ކަމުގެ އިހުސާސް ކުރެވެން ފެށުމުން، ލޯ މަރާލައިގެން އޮންނަންވެސް އޭނާއަށް ނުކެރުނެވެ. ނަމަވެސް، ކޮޓަރީގެ އެކި ދިމަދިމާއަށް ނަޒަރު ހިންގާލުމުން އެއްވެސް އެއްޗެއް ފެންނާކަށް ނެތެވެ.
ޒަކުވާން އަމިއްލަ ނަފްސަށް ވިސްނައިދޭން މަސައްކަތް ކުރިއެވެ. އެއީ އޭނާއަށް ކުރެވުނު ކުށް ހީއަކަށް ވެދާނެ ކަމަށް ގަބޫލުކުރަން ބޭނުންވިއެވެ. ބިރުގަތްލެއް ބޮޑުކަމުން ސިކުނޑި ކުޅެމުންދާ ކުޅިވަރެއް ކަމަށް އޭނާ އުންމީދު ކުރިއެވެ. އެހެންނަމަވެސް، އެ ފިނިފިނި ރޭގައިވެސް އޭނާގެ ނިތްކުރިން ފައިބަމުންދިޔަ ދާތިކިތަކާއި، ހިތުގެ ނުތަނަވަސްކަން ބުނެދެނީ އެހެން ވާހަކައެކެވެ. އެ ކަޅު ހިޔަނީގެ ހިޔަނި އަދިވެސް އޭނާއާ ވަކިނުވާ ކަހަލައެވެ.
Leave a Reply