2015 ވަނަ އަހަރުގެ އޮކްޓޯބަރު މަހުން ފެށިގެން އަމަލުކުރަމުންދާ ހަނގުރާމަ ހުއްޓާލުމުގެ އެއްބަސްވުމާ އިސްރާއީލުން ތަކުރާރުކޮށް ޚިލާފުވަމުންދާ މި ދަނޑިވަޅުގައި، ޣައްޒާގެ ދެކުނުގައި އޮންނަ ރަފާހު ސިޓީއަށް އިސްރާއީލުން ދިން ޑްރޯން ހަމަލާއެއްގައި ފަލަސްތީނުގެ ރައްޔިތަކު ޝަހީދުވެއްޖެއެވެ.
މެޑިކަލް މަސްދަރުތަކުން މައުލޫމާތުދޭ ގޮތުގައި، މި ހަމަލާގައި ޝަހީދުވެފައިވަނީ އުމުރުން 42 އަހަރުގެ ރަފާތު އާދިލް ބްރޭކާ އެވެ. ރަފާހުގެ ހުޅަނގު ސަރަހައްދުގައިވާ އަލްޝަކޫޝް ސަރަހައްދުގައި ހިނގި މި ހާދިސާ ފެނުނު މީހުން ބުނި ގޮތުގައި، އިސްރާއީލުގެ ކުއަޑްކޮޕްޓަރު ޑްރޯނަކުން އަމާޒުކުރީ ކުއްތާ ބެލެހެއްޓުމުގައި އުޅުނު މީހަކަށެވެ. އޭނާ ވަނީ ހަމަލާގެ ވަގުތުގައި މަރުވެފައެވެ.
މީގެ އިތުރުން، އިސްރާއީލުގެ އާޓިލަރީން ވަނީ ޚާން ޔޫނިސްގެ އިރުމަތީ ސަރަހައްދުތަކަށް ދޭ ބޮމުގެ ހަމަލާތައް ވަރުގަދަކޮށްފައެވެ. އަދި ޣައްޒާ ސިޓީގެ އަލް ސަފާތާވީ މަގު ކައިރިން ދަތުރުކުރި ފުލުހުންގެ ވެހިކަލަކަށް މަތިންދާބޯޓުން ދިން ހަމަލާއެއްގައި އާންމު ރައްޔިތަކު ވަނީ ޒަޚަމްވެފައެވެ.
ފަލަސްތީނުގެ ހެލްތު މިނިސްޓްރީން ބުރާސްފަތި ދުވަހު ނެރުނު ރިޕޯޓެއްގައިވާ ގޮތުން، ހަނގުރާމަ ހުއްޓާލުމުގެ އެއްބަސްވުމަށް އަމަލުކުރަން ފެށި ފަހުންވެސް އިސްރާއީލުގެ ހަމަލާތަކުގައި ފަލަސްތީނުގެ 883 މީހުން ވަނީ ޝަހީދުވެފައެވެ. އަދި 2,648 މީހުން ވަނީ ޒަޚަމްވެފައެވެ. މި ހަނގުރާމަ ހުއްޓާލުމުގެ އެއްބަސްވުމަކަށް އާދެވުނީ 2023 އޮކްޓޯބަރު 8 ގައި ފެށި، ދެ އަހަރު ދުވަހަށް ދެމިގެންދިޔަ ނައްތާލުމުގެ ހަނގުރާމައަށް ފަހުގައެވެ. އެ ހަނގުރާމައިގައި 72,000 އަށް ވުރެ ގިނަ މީހުން ޝަހީދުވެ، 172,000 އަށް ވުރެ ގިނަ މީހުން ޒަޚަމްވިއިރު، ޣައްޒާގެ މަދަނީ އިންފްރާސްޓްރަކްޗަރުގެ 90 އިންސައްތަ ވަނީ ސުންނާފަތިވެފައެވެ.
ޣައްޒާ “ބޮޑު ޖަލެއްގެ” ގޮތުގައި
ޣައްޒާގެ އެތެރެވުމާއި ބޭރުވުމުގެ ހުރަސްތަކާ ގުޅޭގޮތުން ސަރުކާރުގެ މީޑިއާ އޮފީހުން ނެރުނު ރިޕޯޓެއްގައި ބުނެފައިވަނީ، އިސްރާއީލުން ދަތުރުފަތުރާއި އަސާސީ މުދާ އެތެރެކުރުމަށް ހަރުކަށި ހުރަސްތަކެއް ކުރިމަތިކުރަމުންދާ ކަމަށެވެ. މެއި 15 އާއި 21 އާ ދެމެދު ރަފާހު ހުރަސް ހުޅުވާލި ނަމަވެސް، އެ މުއްދަތުގައި ދަތުރުކުރެވުނީ އެންމެ 403 މީހުންނަށެވެ. މީގެ ތެރޭގައި ހިމެނެނީ ފުރައިގެން ދިޔަ 249 މީހުންނާއި އެނބުރި އައި 154 މީހުންނެވެ.
ދަތުރުފަތުރުގެ މި ހަރުކަށި އުސޫލަކީ ފަލަސްތީނު ރައްޔިތުންގެ މިނިވަންކަން ހަނިކުރުމަށް ގެންގުޅޭ ނިޒާމީ ސިޔާސަތެއްގެ ބައެއްގެ ގޮތުގައި ރިޕޯޓުގައި ފާހަގަކޮށްފައިވެއެވެ. މިއަހަރުގެ ފެބްރުއަރީގައި ރަފާހު ހުރަސް އަލުން ހުޅުވާލި ފަހުން، ބޭރު ގައުމުތަކުން ބޭސްފަރުވާ ހޯދުމަށް ފުރުސަތު ލިބުނީ އެންމެ 700 އެއްހާ ބަލިމީހުންނަށެވެ.
އެހީގެ މުދާ އެތެރެކުރުމަށް ހުރަސްއެޅުން
މުދާ އެތެރެކުރުމުގެ ހާލަތަށް ބަލާއިރު، ޣައްޒާއަށް ވަންނަންޖެހޭ 4,200 ޓްރަކްގެ ތެރެއިން އެތެރެވުމުގެ ހުއްދަ ދީފައިވަނީ އެންމެ 1,287 ޓްރަކަށެވެ. މިއީ ބޭނުންވާ މިންވަރުގެ އެންމެ 30 އިންސައްތައެވެ. މީގެ ތެރޭގައި ހިމެނެނީ އިންސާނީ އެހީގެ 693 ޓްރަކާއި، ވިޔަފާރި މުދަލުގެ 559 ޓްރަކްގެ އިތުރުން ތެޔޮ އެތެރެކުރި 35 ޓްރަކެވެ.
ސަރުކާރުގެ މީޑިއާ އޮފީހުން ބުނި ގޮތުގައި، ކާބޯތަކެއްޗާއި ބޭހާއި ތެޔޮ އެތެރެކުރުން މަދުކުރުމަކީ ޣައްޒާގެ ރައްޔިތުން “ނޭވާހިއްލުވާލައި” ވަށާލުމުގެ ހާލަތު އިތުރަށް ގޯސްކުރުމަށް އިސްރާއީލުން ކުރާ ކަމެކެވެ. އޭޕްރީލް 14 ގެ ނިޔަލަށް އެތެރެވާން ހަމަޖެހިފައިވާ 110,400 ޓްރަކްގެ ތެރެއިން ހުއްދަ ދީފައިވަނީ އެންމެ 41,714 ޓްރަކަށެވެ.
ހަނގުރާމަ ހުއްޓާލުމުގެ އެއްބަސްވުން ކަރުދާހުގައި އޮތް ނަމަވެސް، އިސްރާއީލުގެ މި އަމަލުތަކުގެ ސަބަބުން ޣައްޒާގެ އިންސާނީ ކާރިސާ ދަނީ ދުވަހުން ދުވަހަށް ބޮޑުވަމުންނެވެ.
Leave a Reply