ޣައްޒާ، ފަލަސްތީން – އިސްރާއީލުގެ އަނިޔާވެރި ހަމަލާތަކުގެ ސަބަބުން ސުންނާފަތިވެފައިވާ ޣައްޒާގެ ބިމުން މިއަދު ފެންނަނީ ހިތްދަތި މަންޒަރުތަކެއް ނަމަވެސް، އެ ތަދުތަކުގެ ތެރެއިންވެސް އުންމީދީ ހިތްވަރުގަދަ ލެޔެއް ދައުރުވާކަން މިވަނީ ސާބިތުވެފައެވެ. ސޯޝަލް މީޑިއާގައި މިހާރު ދައުރުވަމުންދާ ވީޑިއޯއަކުން ފެންނަނީ، ދެފައި ގެއްލިފައިވާ ފަލަސްތީނުގެ ކުޑަކުއްޖަކު އިންތިހާ ދަރަޖައިގެ ހުނަރުވެރިކަމާއެކު ފުޓްބޯޅަ ކުޅެމުންދާ ހިތްގައިމު މަންޒަރެވެ.
މުޙައްމަދު ސަޢީދު އަޙްމަދު ޝާބާން ނަމަކަށް ކިޔާ މި ކުއްޖާއަކީ އުމުރުން އެންމެ 9 އަހަރުގެ ކުއްޖެކެވެ. އުމުރުން އެންމެ 40 ދުވަހުގެ ތުއްތު އިރުއްސުރެ އޭނާގެ ދެފައިގެ އިތުރުން އެއް އަތް ވަނީ ގެއްލިފައެވެ. ނަމަވެސް، ވީޑިއޯއިން ފެންނަ ގޮތުގައި މުޙައްމަދު ބޯޅަ ކޮންޓްރޯލްކޮށް، ދުވެ ހަރަކާތްތެރިވަނީ ހުނަރުވެރި ކުޅުންތެރިއެއް ފަދަ އަޖައިބު ކުރުވަނިވި ސްޕީޑެއްގައެވެ.
މި މަންޒަރު ފެނިގެންދަނީ ތައްޔާރުކޮށްފައިވާ ފެންވަރު ރަނގަޅު ދަނޑެއްގައެއް ނޫނެވެ. އުތުރު ޣައްޒާގެ ޖަބަލިއާ ކޭމްޕްގެ ބާކީ އޮތް ތަނުގައި ގާއިމްކޮށްފައިވާ ވަގުތީ ހިޔާ ކޭމްޕެއްގެ ތެރޭގައެވެ. ގެދޮރު ގެއްލިފައިވާ މީހުން ދިރިއުޅޭ ޓެންޓުތަކުގެ ހަނި ގޯޅިތަކުގެ ތެރޭގައި، ނިކަމެތިކަމާއި ބިރުވެރިކަމުގެ ތެރޭގައިވެސް މުޙައްމަދު އޭނާގެ ހުނަރު ދައްކާލަނީ އޭނާގެ ހިތުގައިވާ ކުޅިވަރުގެ ލޯބި ދިރުވުމަށެވެ.
ޖަބަލިއާ ޓައުންގައި ހުރި އޭނާގެ އާއިލާގެ ގެ އިސްރާއީލުން ތަޅާލުމާއެކު، އޭނާ އެންމެ ގަޔާވާ ކުޅޭ އެއްޗެހިތަކާއި އޭނާގެ ފައިގެ ބަދަލުގައި ބޭނުންކުރި ކަރަންޓު ފުރޮޅުލީ ގޮނޑިވެސް ވަނީ ކޮންކްރީޓްތަކުގެ ދަށުވެ ގެއްލިފައެވެ. އެހެންކަމުން، މިހާރު އޭނާގެ ހިތްދަތި ހަގީގަތުން ސަލާމަތްވެ، ހިތްހަމަޖެހުމެއް ހޯދުމަށް އޮތް އެންމެ ފަހުގެ ވަސީލަތަކީ ފުޓްބޯޅަ ކުޅުމެވެ.
މުޙައްމަދުގެ ތަކުލީފުތައް މިވަރުން ނިމެނީއެއް ނޫނެވެ. އޭނާގެ ސްކޫލް ހަލާކުވެ، ތައުލީމުން މަހުރޫމްވެފައިވާތާ މިހާރު 3 އަހަރު ވެއްޖެއެވެ. ކަރަންޓު ފުރޮޅުލީ ގޮނޑި ނެތުމުގެ ސަބަބުން، ދާދި ފަހުން ހުޅުވި ބައެއް ތައުލީމީ މަރުކަޒުތަކަށް ދިއުމުގެ ފުރުސަތުވެސް އޭނާއަށް ވަނީ ބަންދުވެފައެވެ.
އާއިލާގެ ހަތަރުވަނަ ދަރިފުޅު މުޙައްމަދުގެ ބައްޕަ އަޙްމަދަކީވެސް ހަނގުރާމައިގެ ޝިކާރައެކެވެ. އިސްރާއީލް ސިފައިންގެ ބަޑީގެ ވަޒަން ހިތާ ދާދި ކައިރިއަށް އަރާފައިވުމުގެ ސަބަބުން، އޭނާއަށް މިހާރު އެއްވެސް މަސައްކަތެއް ނުކުރެވެއެވެ. އާމްދަނީ ހޯދާނެ އެއްވެސް މަގެއް ނެތުމުން، މި އާއިލާގެ ދިރިއުޅުން މިހާރު ބިނާވެފައިވަނީ ހިޔާ ސެންޓަރުގެ ސޫޕް ބަދިގެއިން ލިބޭ މަދު ކާބޯތަކެތީގެ އެހީގެ މައްޗަށެވެ.
މުޙައްމަދުގެ މި ވީޑިއޯއަކީ ފަލަސްތީނުގެ ކުޑަކުދިން ތަހައްމަލު ކުރަމުންދާ އަނިޔާވެރިކަމާއި، އެކުދިންގެ ހިތްވަރުގަދަކަން މުޅި ދުނިޔެއަށް ހާމަކޮށްދޭ ދިރިހުރި ހެއްކެކެވެ.
Leave a Reply