ސޫދާނުގެ އެލް އޮބެއިދު ސިޓީގެ ވަށައިގެން އަސްކަރީ ކުރިމަތިލުންތައް އިތުރުވެ، އިންސާނީ ބޮޑު ކާރިސާއަކަށް މަގުފަހިވަމުންދާތީ، އދ. ގެ ސަލާމަތީ މަޖިލީހުން މިކަމާ ގުޅޭގޮތުން އަވަސް މަޝްވަރާތަކެއް ބޭއްވުމަށް ބައިނަލްއަޤްވާމީ މުޖުތަމަޢުން ގޮވާލައިފިއެވެ.
އިނގިރޭސިވިލާތާއި ޖަރުމަނު ހިމެނޭ ގޮތަށް ބައެއް ޤައުމުތަކުން މިކަމަށް އެދިފައިވަނީ، ސޫދާނުގެ ރެޕިޑް ސަޕޯޓް ފޯސަސް (އާރް.އެސް.އެފް) އާއި އެ ފޯސްތަކާ ގުޅިފައިވާ ހަނގުރާމަވެރިން އެލް އޮބެއިދު ސިޓީގެ ވަށައިގެން ބާރުތައް ޖަމާކުރަމުންދާ ކަމުގެ ރިޕޯޓްތައް ލިބުމާ ގުޅިގެންނެވެ. އެލް އޮބެއިދަކީ ގާތްގަނޑަކަށް ބައި މިލިއަން މީހުންގެ އާބާދީއެއް އޮންނަ، އަދި ހަނގުރާމައިގެ ސަބަބުން ގެދޮރު ގެއްލިފައިވާ ލައްކައެއްހާ މީހުން ހިޔާވަހިކަން ހޯދަމުންދާ ސްޓްރެޓެޖިކް ގޮތުން މުހިންމު ސިޓީއެކެވެ.
ސޫދާނުގެ ސަރަހައްދީ އަދި ބައިނަލްއަޤްވާމީ 46 ޖަމިއްޔާއަކުން ނެރުނު ގުޅިފައިވާ ބަޔާނެއްގައި، ހަނގުރާމަކުރާ ފަރާތްތަކުން މުޅި ޤައުމުގައި ވަގުތުން އަދި ޝަރުޠުތަކާ ނުލައި އިންސާނީ ހަނގުރާމަ ހުއްޓާލުމަށް ވަނީ ގޮވާލާފައެވެ. “އިމަޖެންސީ ލޯޔަރސް ގްރޫޕުން” ޝާއިއުކުރި މި ބަޔާނުގައި އިންޒާރު ދީފައިވަނީ، އުތުރު ކޮރްޑޯފާން ސްޓޭޓްގައި އަސްކަރީ ހަރަކާތްތައް ހަލުވިވަމުންދާތީ، މިއީ އެލް ފަޝަރ ސިޓީގައި ފެނުނު ފަދަ ނުރައްކާތެރި އިންސާނީ ކާރިސާއެއް ތަކުރާރުވެދާނެ ކަމުގެ ނިޝާނެއް ކަމަށެވެ.
މި ޖަމިއްޔާތަކުން ފާހަގަކުރި ގޮތުގައި، އެލް އޮބެއިދު ސިޓީއަށް އަމާޒުކޮށް މީގެ ކުރިން ވެސް ޑްރޯން ހަމަލާތަކެއް ދީފައިވެއެވެ. މި ހަމަލާތައް އަމާޒުވެފައިވަނީ ތެޔޮ ގުދަންތަކާއި، އިންޖީނުގެތަކަށް ކަމަށްވާއިރު، މީގެ ސަބަބުން ކަރަންޓާއި ފެނުގެ ޚިދުމަތް މެދުކެނޑި، އަސާސީ މުދަލާއި ބޭހުގެ އަގުތައް ވަނީ އިންތިހާއަށް އުފުލިފައެވެ. މީގެ އިތުރުން، ސިޓީގެ އާބާދީގެ ތެރޭގައި ބޮޑު ބިރުވެރިކަމެއް ފެތުރި، ގިނަ ބަޔަކު ގެދޮރު ދޫކޮށް ދާން ފަށާފައިވާކަން ވެސް ބަޔާނުގައި ފާހަގަކޮށްފައިވެއެވެ.
2023 ވަނަ އަހަރުގެ އޭޕްރީލް މަހުން ފެށިގެން ސޫދާނުގެ އަސްކަރިއްޔާއާއި ރެޕިޑް ސަޕޯޓް ފޯސަސްއާ ދެމެދު ކުރިއަށްދާ މި ހަނގުރާމައިގައި މިހާތަނަށް އެތައް ހާސް ބަޔަކު މަރުވެ، 12 މިލިއަނަށްވުރެ ގިނަ މީހުން ވަނީ ގެދޮރު ގެއްލި ހާލުގައި ޖެހިފައެވެ. އދ. އިން މި ހަމަނުޖެހުން ސިފަކޮށްފައިވަނީ ދުނިޔޭގެ އެންމެ ބޮޑު އިންސާނީ މުސީބާތުގެ ގޮތުގައެވެ.
ބައިނަލްއަޤްވާމީ ޖަމިއްޔާތަކުން ވަނީ، މާ ލަސްވުމުގެ ކުރިން އެލް އޮބެއިދުގެ އާންމުން ރައްކާތެރިކުރުމަށްޓަކައި އދ. އިން ހަރުދަނާ ފިޔަވަޅުތަކެއް އެޅުމަށް ބާރުއަޅާފައެވެ. މިހާތަނަށް ސުލްހަ ގާއިމުކުރުމަށް ކުރެވުނު ހުރިހާ މަސައްކަތެއް ނާކާމިޔާބުވެފައިވަނީ ދެފަރާތުގެ ދެމެދުގައި އުފެދިފައިވާ ބޮޑެތި ޚިލާފުތަކުގެ ސަބަބުންނެވެ.
Leave a Reply