އާލިން ހާލަންޑަކީ މިއަދު ފުޓްބޯޅަ ދުނިޔޭގައި އެންމެ ގަދައަށް އިވޭ އެއް ނަމެވެ. ނަމަވެސް މި ކާމިޔާބީގެ ފަހަތުގައި އޮތީ ބުރަ މަސައްކަތާއި، އާދައިގެ ފެށުމެކެވެ. 2000 ވަނަ އަހަރު އިންގްލެންޑްގެ ލީޑްސް ޔުނައިޓެޑަށް އުފަންވި ހާލަންޑަކީ، އޭރު އެ ކްލަބަށް ކުޅެމުންދިޔަ ނޯވޭގެ ކުރީގެ ކުޅުންތެރިޔާ އަލްފް-އިންޖް ހާލަންޑްގެ ދަރިއެކެވެ.
ހާލަންޑްގެ އުމުރުން އެންމެ ތިން އަހަރުގައި، އޭނާގެ ބައްޕަ އަލްފް-އިންޖް އަށް ލިބުނު އަނިޔާއެއްގެ ސަބަބުން އުމުރުން 30 އަހަރުގައި ފުޓްބޯޅައިން ރިޓަޔާކުރަން ޖެހުނެވެ. ބައްޕަގެ ކެރިއަރު ނިމުމަކަށް އައުމުން އާއިލާ އެނބުރި ނޯވޭއަށް ބަދަލުވިއެވެ. ބައްޕަ ފުޓްބޯޅަ ދޫކޮށް ޕްރޮޕަޓީ ޑިވެލޮޕަރަކަށް ބަދަލުވި ނަމަވެސް، ހާލަންޑަށް ހިތްވަރު ދިނީ ބްރައިންގެ ޔޫތު އެކެޑަމީއާ ގުޅިގެން ކުރިއަށް ދިއުމަށެވެ.
ހާލަންޑްގެ ފުރަތަމަ ކޯޗު އަލްފް އިންގްވޭ ބާންޓްސަން ބުނި ގޮތުގައި، ހާލަންޑް އުމުރުން ފަސް އަހަރުގައި ފުރަތަމަ ފެނުނު ދުވަހުވެސް އޭނާގެ ހުނަރުވެރިކަން ފާހަގަކުރެވުނެވެ. “އޭނާގެ ފުރަތަމަ ދެ ޓަޗުންވެސް ގޯލް ޖެހި. އޭނާ އެހެން ކުދިންނަށްވުރެ މާ މޮޅުވުމުން، ވަގުތުން ދޮށީ އުމުރުފުރާގެ ޓީމުތަކަށް ބަދަލުކުރަން ޖެހުނު،” ބާންޓްސަން ކިޔައިދިނެވެ.
ހާލަންޑް ބައިނަލްއަގުވާމީ ފުޓްބޯޅައިގެ ތެރެއަށް ވަނީ 2015-16 ވަނަ އަހަރު ނޯވޭގެ 15 އަހަރުން ދަށުގެ ޓީމުންނެވެ. އޭރު އޭނާގެ ހަށިގަނޑު ކުޑަވެފައި ބަލިކަށި ނަމަވެސް، އޭނާގެ ކިބައިގައި ހުރި ގޯލް ޖެހުމުގެ ގާބިލްކަން ސްކައުޓުންގެ ސަމާލުކަމަށް އައެވެ. ކުރީގެ ކުޅުންތެރިޔާ ގުނަރ ހާލޭ ބުނި ގޮތުގައި، ހާލަންޑަކީ އެއްވެސް ކަމަކަށް ބިރުގަންނަ ކުޅުންތެރިއެއް ނޫނެވެ.
އުމުރުން އެންމެ 15 އަހަރުގައި ބްރައިންގެ ސީނިއާ ޓީމަށް ކުޅެން ފެށި ހާލަންޑް، އޭގެ ފަހުން ބަދަލުވީ ނޯވޭގެ މޯލްޑޭ އަށެވެ. އެތަނުގައި އޮލެ ގުނަ ސޯލްޝެއާގެ އިރުޝާދުގެ ދަށުން ތަމްރީންވެ، އޭނާގެ ހުނަރު އިތުރަށް ތަރައްގީކުރިއެވެ. މޯލްޑޭގައި ދެއްކި މޮޅު ކުޅުމާއެކު، 2019 ވަނަ އަހަރު އޮސްޓްރިއާގެ ސަލްޒްބާގަށް ބަދަލުވިއެވެ.
ސަލްޒްބާގްގެ ސްޕޯޓިން ޑައިރެކްޓަރު ކްރިސްޓޮފް ފްރޮއިންޑް ވިދާޅުވި ގޮތުގައި، ހާލަންޑަކީ ހަމައެކަނި މޮޅު ކުޅުންތެރިއެއް ނޫނެވެ. އޭނާއަކީ އަބަދުވެސް ހިނިތުންވުމާއެކު ހުންނަ، ޓީމަށް އުފާވެރިކަން ގެނެސްދޭ ޕޮޒިޓިވް ކުޅުންތެރިއެކެވެ. މިއަދު އާލިން ހާލަންޑަކީ ދުނިޔޭގެ އެންމެ ނުރައްކާތެރި ފޯވާޑެވެ. އޭނާގެ މި ދަތުރަކީ ހުވަފެނެއް ހަގީގަތަކަށް ހެދުމަށް ކުރާ ބުރަ މަސައްކަތުގެ ނަމޫނާއެކެވެ.
Leave a Reply