2026 ވަނަ އަހަރުގެ ވޯލްޑް ކަޕްގެ 32 ވަނަ ބުރުގައި ކޭޕް ވަރޑޭއާ ދެކޮޅަށް ކުޅުނު ފޯރިގަދަ މެޗު 3-2 އިން ކާމިޔާބުކޮށް، އެންމެ ފަހުގެ ޗެމްޕިއަން އާޖެންޓީނާ މުބާރާތުގެ 16 ވަނަ ބުރުން ޖާގަ ކަށަވަރުކޮށްފިއެވެ. އިތުރު ވަގުތަށް ދިޔަ މި މެޗުގައި އާޖެންޓީނާގެ ކެޕްޓަން ލިއޮނަލް މެސީ ވަނީ އާދަޔާ ހިލާފު މޮޅު ކުޅުމެއް ދައްކާފައެވެ.
މެޗުގެ ފުރަތަމަ ލަނޑު ޖަހައި އާޖެންޓީނާއަށް ކުރިހޯދައިދިނީ 29 ވަނަ މިނެޓުގައި މެސީއެވެ. އޭނާ ވަނީ މި މެޗުގައި ލަނޑެއް ޖެހުމުގެ އިތުރުން، ޓީމުގެ އެހެން ލަނޑުތައް ޖެހުމުގައިވެސް މުހިންމު ދައުރެއް އަދާކޮށްފައެވެ. ނަމަވެސް، މެޗުގެ 59 ވަނަ މިނެޓުގައި ކޭޕް ވަރޑޭގެ ޑެރޯއީ ޑޫއާޓޭ ޖެހި ލަނޑާއެކު އެ ޓީމުން ނަތީޖާ ހަމަހަމަކުރިއެވެ.
ފުރިހަމަ ވަގުތު ހަމަވިއިރު 1-1 އިން އެއްވަރުވެފައި އޮތުމުން ކުޅުނު އިތުރު ވަގުތުގެ ތެރޭގައި، 93 ވަނަ މިނެޓުގައި ލިސަންޑްރޯ މާޓިނޭޒް ވަނީ އާޖެންޓީނާއަށް އަލުން ލީޑު ނަގައިދީފައެވެ. އެހެންނަމަވެސް، ކޭޕް ވަރޑޭއިން ހިތްވަރު އެލުވާނުލައި މަސައްކަތްކޮށް 103 ވަނަ މިނެޓުގައި ސިޑްނީ ކެބްރަލް ޖެހި ލަނޑުން ދެވަނަ ފަހަރަށް ނަތީޖާ ހަމަހަމަކުރިއެވެ.
މެޗުގެ ނަތީޖާ އާޖެންޓީނާ ކޮޅަށް އެނބުރުނީ 111 ވަނަ މިނެޓުގައި ކޭޕް ވަރޑޭގެ ޑިފެންޑަރު ޑެނީ އެޑިލްސަން އަތުން ބައިކޮޅަށް ވަން ލަނޑުންނެވެ. މި ލަނޑާއެކު އާޖެންޓީނާ މެޗުން މޮޅުވެ، މުބާރާތުގެ ކުރިއަށް އޮތް ބުރަށް ދަތުރުކުރީއެވެ.
16 ވަނަ ބުރުގައި އާޖެންޓީނާ ނުކުންނާނީ މިސްރާ ދެކޮޅަށެވެ. މިސްރު ވަނީ ހުކުރު ދުވަހު އޮސްޓްރޭލިއާއާ ބައްދަލުކޮށް 1-1 އިން އެއްވަރުވުމުން ޖެހި ޕެނަލްޓީގައި އޮސްޓްރޭލިއާ ބަލިކޮށް ދެވަނަ ބުރުގެ ޖާގައެއް ހޯދާފައެވެ. އާޖެންޓީނާ އާއި މިސްރު ބައްދަލުކުރާ މެޗު އޮންނާނީ އަންނަ ހަފުތާގައެވެ.
Leave a Reply