2026 ވަނަ އަހަރު ބޭއްވުމަށް ހަމަޖެހިފައިވާ ފީފާ ވޯލްޑްކަޕަށް ބާސެލޯނާގެ ކުޅުންތެރިން ދޫކޮށްލުމުން އެ ކްލަބަށް ބަދަލުގެ ގޮތުގައި ލިބޭނެ ކަމަށް ބެލެވެނީ 2.89 މިލިއަން ޔޫރޯ ކަމަށް ރިޕޯޓުތައް ބުނެފިއެވެ.
މުންޑޯ ޑިޕޯޓިވޯއިން ރިޕޯޓުކޮށްފައިވާ ގޮތުގައި، ފީފާގެ ‘ކްލަބް ބެނެފިޓްސް ޕްރޮގްރާމް’ ގެ ދަށުން ބާސެލޯނާ އަށް ލިބޭނެ ކަމަށް އަންދާޒާ ކުރެވެނީ ޖުމްލަ 2,893,533 ޔޫރޯއެވެ. މިއީ 2022 ވަނަ އަހަރު ގަތަރުގައި ބޭއްވި ވޯލްޑްކަޕަށް ފަހު އެ ކްލަބަށް ލިބުނު 4.43 މިލިއަން ޔޫރޯއާ އަޅާބަލާއިރު ބޮޑުތަނުން ކުޑަ އަދަދެކެވެ.
މި އާމްދަނީ ދަށްވާން މެދުވެރިވީ ފީފާއިން ކްލަބްތަކަށް ފައިސާ ދޫކުރާ އުސޫލަށް ގެނައި ބަދަލުތަކާ ގުޅިގެންނެވެ. ފީފާއިން މިހާރު ވަނީ ކްލަބް ބެނެފިޓްސް ޕްރޮގްރާމް ދެ ފަންޑަކަށް ބަހާލާފައެވެ. އޭގެ ތެރެއިން އެއް ޕޫލަކީ ކޮލިފިކޭޝަން މަރުހަލާގައި ބައިވެރިވާ ކުޅުންތެރިންގެ ކްލަބްތަކަށް އިނާމު ދިނުމަށް ހާއްސަކޮށްފައިވާ ޕޫލެކެވެ. މި ބަދަލުގެ ސަބަބުން ބައިނަލްއަގުވާމީ ގިނަ ކުޅުންތެރިން ހިމެނޭ ބޮޑެތި ކްލަބްތަކަށް ލިބޭ ޖުމްލަ އަދަދު ވަނީ މަދުވެފައެވެ.
ފީފާގެ އާ ޕޭމަންޓް މޮޑެލް މަސައްކަތް ކުރާ ގޮތަށް ބަލާއިރު، ކޮލިފިކޭޝަން މެޗުތަކުގައި ކުޅޭ ކޮންމެ ކުޅުންތެރިއަކަށް ކްލަބަށް 2,045 ޔޫރޯ ލިބެއެވެ. މިގޮތުން ބާސެލޯނާގެ ބްރެޒިލް ވިންގާ ރަފީންހާ ކޮލިފައިންގައި ކުޅުނު 13 މެޗަށް އެ ކްލަބަށް 26,585 ޔޫރޯ ލިބިފައިވާއިރު، ކޮލިފައިންގެ ހުރިހާ ކުޅުންތެރިންގެ ފަރާތުން ބާސެލޯނާ އަށް ޖުމްލަ 153,375 ޔޫރޯ ލިބިފައިވެއެވެ.
ވޯލްޑްކަޕްގެ ފައިނަލް މުބާރާތުގައި ފައިސާ ދޫކުރަނީ ތަފާތު ފޯމިއުލާއެއްގެ ދަށުންނެވެ. އެއީ މެޗަކަށް ބަލައިގެން ފައިސާ ދިނުމުގެ ބަދަލުގައި، ގައުމީ ޓީމުގެ ޓްރެއިނިން ކޭމްޕް ފަށާ ދުވަހުން ފެށިގެން އެ ގައުމެއް މުބާރާތުން ވަކިވާ ދުވަހުގެ ޖެހިގެން އަންނަ ދުވަހާ ހަމައަށް، ކޮންމެ ދުވަހަކަށް ވަކިވަރެއް ދޭ އުސޫލުންނެވެ. 2026 ގެ ވޯލްޑްކަޕްގައި ކޮންމެ ކުޅުންތެރިއަކަށް ދުވާލަކު 4,330 ޔޫރޯ ދިނުމަށް ވަނީ ނިންމާފައެވެ.
ބާސެލޯނާގެ 16 ކުޅުންތެރިން މިދިޔަ މުބާރާތުގެ ފަހު ބުރުގައި ވާދަކޮށްފައިވީ ނަމަވެސް، ފީފާގެ އާ އުސޫލުގެ ދަށުން އާމްދަނީ ބަހާލެވޭ ގޮތުން، ބޮޑެތި ކްލަބްތަކަށް ލިބޭ ހިއްސާ ވަނީ ކުރިއަށްވުރެ ކުޑަވެފައެވެ. މިއީ މުޅި ޕްރޮގްރާމްގެ ޖުމްލަ އަގު ފީފާއިން އިތުރުކުރި ނަމަވެސް، ޑިސްޓްރިބިއުޝަން މޮޑެލްއަށް ގެނައި ބަދަލުގެ ނަތީޖާއެވެ.
Leave a Reply