ޒިނެދިން ޒިދާން: ފުޓްބޯޅައިގެ ދަނޑުމަތީގެ ޖާދޫގަރެއް

ޒިނެދިން ޒިދާން އަކީ ފްރާންސްގެ ފުޓްބޯޅައިގެ ތާރީޚުގައި ވެސް އުފެދުނު އެންމެ މޮޅު އަދި އެންމެ ނުފޫޒުގަދަ އެއް ކުޅުންތެރިޔާއެވެ. އޭނާއަކީ އޭނާގެ ފަންނީ ހުނަރާއި، ބޯޅަ ކޮންޓްރޯލް ކުރުމުގެ ތަފާތު ސިފަތަކުގެ ސަބަބުން ދުނިޔޭގެ ފުޓްބޯޅައިގައި ވަރަށް މުހިންމު ދައުރެއް އަދާކުރި “ޖީނިއަސް” އެކެވެ.

1972 ވަނަ އަހަރުގެ ޖޫން މަހުގެ 23 ވަނަ ދުވަހު ފްރާންސްގެ މާސޭ އަށް އުފަން ޒިދާން ބޮޑުވީ ލަ ކެސްޓެލޭންގެ އަވަށެއްގައެވެ. އަލްޖީރިއާ އިން ފްރާންސަށް ހިޖުރަކުރި މީހުންގެ ދަރިއެއްގެ ގޮތުގައި އުފަންވި ޒިދާން، ފުޓްބޯޅައިގެ އަސާސީ ހުނަރުތައް ދަސްކުރީ އެ އަވަށުގެ މަގުމަތިންނާއި ހަނި ގޯޅިތަކުގެ ތެރެއިންނެވެ. އުމުރުން އެންމެ 17 އަހަރުގައި އޭނާ ވަނީ އޭނާގެ އުފަން ސިޓީގެ ޒުވާން ޓީމުތަކާއެކު ކުޅެން ފަށައިފައެވެ.

ޒިދާންގެ ކުޅިވަރު ހަޔާތަށް ބަލާއިރު، އޭނާއަކީ މެދުތެރެއަށް ކުޅޭ (މިޑްފީލްޑަރ) އެކެވެ. އޭނާގެ ކްލަބް ކެރިއަރުގައި ޖުމްލަ 227 މެޗު ކުޅެ 49 ލަނޑު ޖަހާފައިވާއިރު، ފްރާންސްގެ ގައުމީ ޓީމަށް ވަނީ 93 މެޗު ކުޅެދީފައެވެ. 1992 ވަނަ އަހަރު ޖިރޮންޑިންސް ބޯޑޯ އަށް ސޮއިކުރުމާއެކު، އޭނާއަށް ބައިނަލްއަގުވާމީ ފެންވަރުގައި ފާހަގަކޮށްލެވޭ ޝަރަފު ލިބެން ފެށިއެވެ. އޭގެ ފަހުން ޔުވެންޓަސްއާ ގުޅި، 1998 ވަނަ އަހަރުގެ ބެލޮން ޑިއޯރް ކާމިޔާބުކުރިއެވެ.

ޒިދާންގެ އެންމެ ފާހަގަކޮށްލެވޭ ކާމިޔާބީތަކަކީ 1998 ވަނަ އަހަރުގެ ވޯލްޑް ކަޕާއި 2000 ވަނަ އަހަރުގެ ޔޫރޯ ފްރާންސަށް ހޯދައިދިނުމެވެ. އަދި 2001 ވަނަ އަހަރު ރެއާލް މެޑްރިޑާ ގުޅި، 2002 ވަނަ އަހަރުގެ ޗެމްޕިއަންސް ލީގު ފައިނަލުގައި ރޮބާޓޯ ކާލޯސް ދިން ބޯޅައަކުން އޭނާ ޖެހި ތާރީޚީ ވޮލީ ގޯލަކީ މިއަދުވެސް ފުޓްބޯޅަ ދުނިޔޭގައި “ސާފު ޖާދޫއެއް” ގެ ގޮތުގައި ސިފަކުރާ ގޯލެކެވެ.

ކުޅުންތެރިއެއްގެ ގޮތުގައި 2006 ވަނަ އަހަރު ރިޓަޔާ ކުރުމަށްފަހު، ޒިދާން ވަނީ ކޯޗިންގައިވެސް ނުުހަނު ބޮޑު ކާމިޔާބީއެއް ހޯދާފައެވެ. 2013 ވަނަ އަހަރު ރެއާލްގެ އެސިސްޓެންޓް މެނޭޖަރުކަމުން ފެށިގެން ގޮސް، އޭނާ ވަނީ އެ ކްލަބަށް ޖެހިޖެހިގެން ތިން ފަހަރު ޗެމްޕިއަންސް ލީގު ހޯދައިދީފައެވެ. މީގެ އިތުރުން ލަލީގާގެ ތަށިވެސް ދެ ފަހަރެއްގެ މަތިން ކާމިޔާބުކޮށްދިނެވެ. މި ކާމިޔާބީތަކާއެކު 2017 ވަނަ އަހަރު ފީފާގެ އެންމެ މޮޅު ފިރިހެން ކޯޗުގެ އެވޯޑުވެސް އޭނާއަށް ލިބުނެވެ.

ޒިނެދިން ޒިދާން އަކީ ހަމައެކަނި ފުޓްބޯޅަ ކުޅުންތެރިއެއް ނޫނެވެ. އޭނާއަކީ ދަނޑުމަތީގައި ކުޅިވަރުގެ އަޚުލާގާއި، ހުނަރާއި، ލީޑަޝިޕް ދައްކުވައިދިން ހަގީގީ ލެޖެންޑެކެވެ. އޭނާގެ ނަމަކީ ފުޓްބޯޅައިގެ ތާރީޚުގައި އަބަދުވެސް ރަން އަކުރުން ފެވިގެންދާނެ ނަމެކެވެ.

އަރީން ( އެޑީ )