ނިއުޔޯކް، އެމެރިކާ: ކުޅިވަރުގެ މައިދާނުގައި އިންސާފު ގާއިމުކުރުމަށް ބޭނުންކުރާ “ވީޑިއޯ އެސިސްޓަންޓް ރެފްރީ” (ވީއޭއާރް) ޓެކްނޮލޮޖީގެ ފުރިހަމަކަމާ މެދު ބަހުސްކުރާއިރު، ދުނިޔޭގެ ސިޔާސީ މަސްރަހުގައި، ޚާއްޞަކޮށް ޣައްޒާގެ މައްސަލައިގައި ދުނިޔޭގެ ޟަމީރު އޮތީ ނިދާފައިކަމަށް ބުނެ ގިނަ ބައެއްގެ ފާޑުކިޔުން އަމާޒުވެއްޖެއެވެ.
ފުޓްބޯޅަ މެޗެއްގެ ގޯލެއްގެ ޞައްޙަކަން ކަށަވަރުކުރުމަށް އެތައް އޭންގަލަކުން މަންޒަރުތައް މުރާޖަޢާކުރާއިރު، ޣައްޒާގައި ހިނގަމުންދާ ލޭއޮހޮރުވުންތަކާއި އިންސާނީ ކަރާމާތަށް އަރައިގަންނަ މަންޒަރުތައް ދުނިޔެއަށް ސާފުކޮށް ފެންނަން ހުރި ނަމަވެސް، އެކަން ހުއްޓުވުމަށް ބައިނަލްއަޤްވާމީ ނަޒާހަތްތެރިކަމެއް ނެތްކަން މިވަނީ ހާމަވެފައެވެ.
ކުޅިވަރުގެ އިންސާފާއި އިންސާނީ ވަޒަންކުރުން
ކުޅިވަރުގެ ދުނިޔޭގައި ވީއޭއާރް ބޭނުންކުރަނީ ރެފްރީގެ ނިންމުންތަކުގައި ހުންނަ އިންސާނީ އުނިކަންތައްތައް ރަނގަޅުކުރުމަށެވެ. ނަމަވެސް، އެންމެ ޒަމާނީ ޓެކްނޮލޮޖީއާއެކުވެސް، ރެފްރީގެ ޖަޒުބާތާއި އަމިއްލަ ތަޞައްވުރުގެ ސަބަބުން އިންސާފުވެރި ނިންމުންތަކާ މެދު އަދިވެސް ސުވާލު އުފެދެއެވެ. މިއީ އިންސާނީ ލޮލަށް ހުރިހާ ތަފްސީލެއް ނުފެންނާތީ އުފެދޭ ހާލަތެއް ކަމަށްވިޔަސް، ސިޔާސީ މައިދާނުގައި ކަންކަން ފެންނަން އޮންނަނީ މިއަށްވުރެ ހިތިކޮށެވެ.
އެމެރިކާއާއި އީރާން: ނާޒުކު ސުލްހައެއްގެ ތެރޭގައި
ސިޔާސީ މަސްރަހަށް ބަލާއިރު، އެމެރިކާއާއި އީރާނާ ދެމެދު އޮތް ހަނގުރާމައިގެ ނުރައްކަލާއި، އެއްބަސްވުންތައް ފުނޑުފުނޑުވުމަކީ ބައިނަލްއަޤްވާމީ ނަޒާހަތްތެރިކަން ކުޑަވެފައިވާ މިންވަރު ހާމަކޮށްދޭ ކަމެކެވެ. ކުރީގެ ރައީސް ޓްރަމްޕްގެ ދައުރުން ފެށިގެން މިހާތަނަށްވެސް، މަޝްވަރާތަކާއި އިންޒާރުތައް އެއްވަރަކަށް ކުރިއަށްދާއިރު، މިސައިލްގެ ހިޔަނި ދަށުގައި ކުރެވޭ ޑިޕްލޮމެސީއަކީ އަޚްލާޤީ ގޮތުން ކިހާވަރެއްގެ ކަމެއްތޯ ވަނީ ސުވާލު އުފެދިފައެވެ.
ޣައްޒާ: ތަސްވީރުން ބޭރުކޮށްލެވިފައިވާ އިންސާފު
ޣައްޒާގެ ހާލަތަކީ މިއަދު ދުނިޔޭގެ އެންމެ ބޮޑު ހިތާމައެވެ. ހަނގުރާމަ ހުއްޓާލުމުގެ ވާހަކަތައް ދެކެވުނު ނަމަވެސް، ޝަހީދުންގެ އަދަދު ދަނީ އިތުރުވަމުންނެވެ. ކަފުން މަދުވުމާއި، ބަނޑުހައިހޫނުކަމާއި، ގެދޮރު ދޫކޮށް ދާންޖެހުމުގެ ތަަކުލީފު ފަލަސްތީނުގެ ރައްޔިތުން އުފުލަމުންދާއިރު، ބައިނަލްއަޤްވާމީ މުޖުތަމަޢުން ދަނީ ހަމައެކަނި މަރުވާ މީހުންގެ އަދަދު ގުނަމުންނެވެ.
އިސްރާއީލުން ހިންގާ ލާދީނީ އަމަލުތަކާއި، ބައިނަލްއަޤްވާމީ ޤާނޫނުތަކާ ޚިލާފު އަމަލުތައް މުޅި ދުނިޔެއަށް ފެންނަން ހުރިއިރު، އެކަން ހުއްޓުވުމުގެ ބަދަލުގައި ބައެއް ބޮޑެތި ބާރުތަކުން ދަނީ އެކަމަށް ލައިސަންސް ދެމުންނެވެ. މިއީ “ވީއޭއާރް” ސްކްރީނުން ކުށް ސާފުކޮށް ފެންނަން އޮތް ނަމަވެސް، ރެފްރީ އެކަމަށް ފިޔަވަޅު އަޅަން ބޭނުން ނުވާ ފަދަ ހާލަތެކެވެ.
ނިންމުން: ނަޒާހަތްތެރިކަމަކީ ކޮބައިތަ؟
ނަޒާހަތްތެރިކަމަކީ ބަހާއި ޢަމަލާ ދެމެދުގައިވާ ދުރުމިނެވެ. ފުޓްބޯޅަ މެޗެއްގެ ކުދިކުދި ކަންކަމުގައި އިންސާފު ހޯދަން ވަކާލާތުކުރާ ދުނިޔެ، އެތައް މިލިއަން ބައެއްގެ ޙައްޤުތައް ފޭރިގަނެ، މުޅި ސަރަހައްދުތައް ސުންނާފަތި ކުރަމުންދާއިރު ހިމޭނުން އޮތުމަކީ ބޮޑުވެގެންވާ ފުށުއެރުމެކެވެ.
ސިޔާސީ ގޮތުން ބާރުވެރި ފަރާތްތައް “ރިވިއު ސްކްރީން” ތަކުގެ ކުރިމައްޗަށް ހާޒިރުކޮށް، ވީޓޯގެ ބާރު ނެތި އިންސާފުވެރިކަމާއެކު މަންޒަރުތައް ބަލާނެ ދުވަހެއް އައުމަކީ މިއަދު އިންސާނިއްޔަތު އެދޭ އެދުމެވެ. ނަމަވެސް، ބާރުގެ ބެލެންސް އަކީ ފައިނަލް ރެފްރީ ކަމުގައި ވާހާ ހިނދަކު، ޣައްޒާގެ ހަގީގަތްތައް ހުންނާނީ ދުނިޔޭގެ ލޮލަށް “އޮފްސައިޑް” ވެފައެވެ.
Leave a Reply