ޣައްޒާގައި ހިނގަމުންދާ ނުރައްކާތެރި ހަނގުރާމައިގެ ސަބަބުން އާންމު ރައްޔިތުންނަށާއި ސިއްހީ ނިޒާމަށް ބޮޑެތި ގެއްލުންތަކެއް ލިބިފައިވާއިރު، އޭގެ ނޭދެވޭ އަސަރު މެޑިކަލް ދަރިވަރުންގެ މުސްތަގުބަލަށް ވެސް ވަނީ ވަރަށް ބޮޑަށް ކޮށްފައެވެ. ނަމަވެސް، މި ހިތްދަތި ހާލަތުގައި ތުރުކީގެ އިސްތަންބޫލް މެޑެނިޔެޓް ޔުނިވާސިޓީން ވަނީ ތަފާތު އަދި އުންމީދީ އިސްނެގުމެއް އިސްނަގައި، ހަނގުރާމައިގެ ސަބަބުން ކިޔެވުން މެދުކެނޑިފައިވާ ޣައްޒާގެ މެޑިކަލް ދަރިވަރުންނާއި ގްރެޖުއޭޓް ޑޮކްޓަރުންނަށް އެ ޔުނިވާސިޓީން ފުރުސަތު ދީ، އެމީހުންގެ ތައުލީމާއި ތަމްރީނު ފުރިހަމަކުރުމުގެ މަގު ފަހިކޮށްދީފައެވެ.
މި މުހިންމު ޕްރޮގްރާމް ލީޑް ކުރައްވަނީ އެ ޔުނިވާސިޓީގެ ފެކަލްޓީ އޮފް މެޑިސިންގެ ޑިޕާޓްމަންޓް އޮފް ޖެނެރަލް ސާޖަރީގެ ވެރިޔާ ޕްރޮފެސަރު އޮރްހާން އަލޭމް އޮގްލޫ އެވެ. އޭނާ އާއި ޣައްޒާގެ ސިއްހީ ދާއިރާއާ ދެމެދު އޮތް ގުޅުން ފެށުނީ މީގެ ދިހަ ވަރަކަށް އަހަރު ކުރިން، ޚާއްސަކޮށް 2014 ވަނަ އަހަރުގައެވެ. އޭރުއްސުރެ ޣައްޒާއިން ސީރިއަސް ބަލިމީހުން ފަރުވާއަށް ތުރުކީއަށް ގެންދިއުމުގައްޔާއި، ޣައްޒާގެ ޑޮކްޓަރުންނާއި ސިއްހީ އަދި ތައުލީމީ އިދާރާތަކާ ގުޅުން ބަދަހިކުރުމުގައި އޮގްލޫ ވަނީ އިސް ދައުރެއް އަދާކުރައްވާފައެވެ. އެންމެ ފަހުން ހަނގުރާމަ ފެށުމާއެކު، މި ގުޅުން ބަދަލުވެގެން ދިޔައީ ބުރޫއަރާފައިވާ މެޑިކަލް ތައުލީމީ ޕްރޮގްރާމްތައް ސަލާމަތް ކުރުމުގެ ބޮޑު މަޝްރޫއަކަށެވެ.
ޑިސްޕްލޭސްމަންޓުން ފެށިގެން ސްކޫލް ޑެސްކްތަކާ ހަމައަށް
ހަނގުރާމަ ގަދަވަމުން ދިޔަ ވަރަކަށް މެޑިކަލް ދަރިވަރުންނަށް މަޖުބޫރުވީ ގެދޮރު ދޫކޮށް ދާށެވެ. ޔުނިވާސިޓީތަކާއި ހޮސްޕިޓަލް ތަމްރީނުތަކުން އެ ދަރިވަރުން އެއްކޮށް ވަކިވެގެން ދިޔައެވެ. މި ދަރިވަރުން ސަލާމަތްކުރުމަށް މަސައްކަތްކުރި ފަރާތްތަކަށް މާލީ، ބިއުރޯކްރެޓިކް އަދި ލޮޖިސްޓިކަލް ގޮތުން ބޮޑެތި ހުރަސްތަކާ ކުރިމަތިލާން ޖެހުނެވެ. އެހެންނަމަވެސް، މެޑެނިޔެޓް ޔުނިވާސިޓީގެ ޓީމުން އެހެން ޖަމިއްޔާތަކާއި ހެޔޮއެދޭ ފަރާތްތަކާ ގުޅިގެން މި ހުރަސްތައް ގިރާކޮށް، ދަރިވަރުން ތުރުކީއަށް ގެނެސް، އެމީހުންގެ ތިބުމުގެ އިންތިޒާމުތައް ހަމަޖެއްސިއެވެ. މިއާއެކު، ޓެންޓްތަކާއި ޑިސްޕްލޭސްމަންޓް ކޭމްޕްތަކުގެ ދަތި ހާލަތުގެ ބަދަލުގައި، އެ ދަރިވަރުންނަށް އަލުން ކްލާސްރޫމްތަކާއި ޒަމާނީ ލެބޯޓްރީތަކާއި ހޮސްޕިޓަލްތަކުން ޖާގަ ލިބުނެވެ.
ޕްރޮފެސަރު އޮގްލޫ ވިދާޅުވި ގޮތުގައި، ދަރިވަރުން ކެމްޕަހަށް އައި މަންޒަރަކީ އޭނާގެ ހަޔާތުގައި ލިބުނު އެންމެ ބޮޑު އެއް އުފަލެވެ. އަދި ފުރަތަމަ ބެޗްގެ ގްރެޖުއޭޝަން ހަފްލާއަކީ ޣައްޒާގައި ތިބި އާއިލާތަކަށް ވީޑިއޯ ލިންކް މެދުވެރިކޮށް ބައިވެރިވެވުނު، ނުހަނު ފަޚުރުވެރި ވަގުތުކޮޅެކެވެ. ފުރަތަމަ ބެޗުގައި ފަލަސްތީނުގެ 16 ޑޮކްޓަރަކު ދަސްވެނިވެފައިވާއިރު، މި އަހަރު ނިމުމުގެ ކުރިން އިތުރު 17 ދަރިވަރަކު ގްރެޖުއޭޓްވާނެ ކަމަށް ބެލެވެއެވެ.
އަމާޒަކީ ޣައްޒާއަށް 100 ޑޮކްޓަރުން ބިނާކުރުން
މި މަޝްރޫއަކީ ހަމައެކަނި ގެއްލުނު އަހަރުތަކުގެ ކިޔެވުން ފުރިހަމަކޮށްދިނުމަކުން ނިންމާލާ ކަމެއް ނޫނެވެ. މީގެ އަމާޒަކީ މަދުވެގެން ޣައްޒާގެ 100 ޑޮކްޓަރުން ތަމްރީނުކޮށް، ފަލަސްތީނުގެ ސިއްހީ ނިޒާމަށް ކޮންމެހެން ބޭނުންވާ މެޑިކަލް ސްޕެޝަލައިޒޭޝަންތައް އެމީހުންނަށް ހޯދައިދިނުމެވެ.
ޕްރޮފެސަރު އޮގްލޫ ފާހަގަކުރެއްވި ގޮތުގައި، ޣައްޒާގެ ސިއްހީ ނިޒާމު އަލުން އާރާސްތު ނުކޮށް، އެ ސަރަހައްދުގެ އިންސާނީ ހާލަތު ރަނގަޅެއް ނުކުރެވޭނެއެވެ. އެހެންކަމުން މުސްތަގުބަލުގައި ޣައްޒާގައި ދެމެހެއްޓެނިވި ސިއްހީ ނިޒާމެއް ބިނާކުރެވޭނީ މިފަދަ ގާބިލު ކެޑޭޓުންތަކެއް އުފައްދައިގެންނެވެ. މި މަޝްރޫއުގެ މައިގަނޑު ބޭނުމަކީ އަސާސީ މެޑިކަލް ތައުލީމުގެ އިތުރުން، އެކި ދާއިރާތަކުން ޚާއްސަ ތަމްރީނުތައް ޑޮކްޓަރުންނަށް ފޯރުކޮށްދިނުމެވެ.
ދަސްވެނިވުމުގެ އުފަލާއި އާއިލާއާ ދުރުގައިވުމުގެ ހިތާމަ
ޣައްޒާގެ ފަލަސްތީން މެޑިކަލް ކޮލެޖުން ކިޔަވަމުންދިޔަ ޑރ. ނޫރާ ބޮއުކްލިންއަށް ހަނގުރާމައާ ކުރިމަތިލާން ޖެހުނީ އޭނާގެ ކިޔެވުމުގެ އެންމެ ފަހު އަހަރުގައެވެ. ހުރިހާ އުންމީދެއް ގެއްލެން ދަނިކޮށް، އޭނާ އިސްތަންބޫލް މެޑެނިޔެޓް ޔުނިވާސިޓީއާ ގުޅުމުން އެ ފުރުސަތު ލިބުނެވެ. ނަމަވެސް ގްރެޖުއޭޝަން ހަފްލާގެ އުފާވެރިކަމާއެކު ވެސް، ޣައްޒާގައި ތިބި އާއިލާއާއި ރަހުމަތްތެރިންނާ ދުރުގައި ހުންނަން ޖެހުމުން އޭނާގެ ހިތުގައި ވަނީ ބޮޑު ހިތާމައެކެވެ.
ހަމައެފަދައިން، ޣައްޒާގެ އަލް އަޒްހަރު ޔުނިވާސިޓީގެ ދަރިވަރެއް ކަމަށްވާ ހުސެއިން އިސްމާއިލް ވެސް ވަނީ އުތުރުން ދެކުނަށް ހިޖުރަކޮށް، މެދު ސަރަހައްދުގެ ހޮސްޕިޓަލްތަކުގައި ވޮލަންޓިއަރެއްގެ ގޮތުގައި މަސައްކަތްކޮށްފައެވެ. އެހެންނަމަވެސް ހޮސްޕިޓަލްތަކަށް އޮތް ބޮޑު ބާރުބޮޑުވުމުގެ ސަބަބުން އަމަލީ ތަމްރީނު ފުރިހަމައެއް ނުކުރެވުނެވެ. ފަހުން ތުރުކީއަށް ބަދަލުވެ، ބަހުގެ ހުރަސްތަކާއި އާ ތައުލީމީ ނިޒާމަށް ހޭނުމަށް ޔުނިވާސިޓީގެ އެހީތެރިކަމާއެކު އޭނާ ވަނީ އަލުން ތައުލީމީ ހަޔާތް ފަށާފައެވެ.
އޮގްލޫ ފާހަގަކުރެއްވި ގޮތުގައި، މި ދަރިވަރުންގެ ކިބައިން ފެނުނު އެންމެ ހައިރާންކުރުވަނިވި ކަމަކީ އެމީހުންގެ އަޒުމެވެ. ހަނގުރާމައިގެ ބިރުވެރިކަމުގެ ތެރެއިން އައި ނަމަވެސް، އެމީހުން ތައުލީމު ދެކުނީ ޣައްޒާއަށް އެނބުރި ގޮސް އަމިއްލަ މުޖުތަމައަށް ޚިދުމަތް ކުރުމަށް އޮތް ހަމައެކަނި ވަސީލަތުގެ ގޮތުގައެވެ.
ޣައްޒާގެ އިމާރާތްތަކާއި ހޮސްޕިޓަލްތައް ބިމާހަމަވެފައިވާ ދަނޑިވަޅެއްގައި، އިސްތަންބޫލުގައި މި ފެށުނު މަސައްކަތަކީ ސިއްހީ ޖީލެއް ނެތިގެން ދިޔުމުން ސަލާމަތްކުރުމަށް އެޅުނު ވަރަށް މުހިންމު ފިޔަވަޅެކެވެ. މި ދަރިވަރުންގެ އެންމެ ފަހުގެ އަމާޒަކީ ވެސް، ޑިގްރީތަކާއި ޚާއްސަ ތަމްރީނުތައް ހިފައިގެން، އެނބުރި ގައުމަށް ގޮސް ފަލަސްތީނުގެ ރައްޔިތުންނަށް ޚިދުމަތް ކުރުމެވެ.
Leave a Reply