އިސްލާމިކް މިނިސްޓްރީން މިރޭ ފަލަސްތީނުގެ ތާރީޚާ ބެހޭ ފޯރަމެއް ބާއްވަން ނިންމައިފިއެވެ.
މިނިސްޓްރީން ބުނީ “ފަލަސްތީނަކީ އުއްމަތުގެ އެއްބައިވަންތަކަން” ގެ ނަމުގައި ބާއްވާ މި ފޯރަމަކީ އިސްރާ އެސޯސިއޭޝަނާ ގުޅިގެން ބާއްވާ ފޯރަމެއް ކަމަށެވެ.
މި ފޯރަމް އޮންނާނީ މިރޭ 20:30 ގައި އިސްލާމީ މަރުކަޒުގެ ހޯލްގައެވެ. މި ފޯރަމްގައި ވާހަކަފުޅު ދައްކަވާނީ ދީނީ އިލްމުވެރިން ކަމަށްވާ ޑރ އަބްދުއްސައްތާރު އަބްދުއްރަހުމާނާއި ޑރ އަބްދުލް ހަންނާން ވަހީދެވެ.
ފަލަސްތީނަށް އެހީތެރިވުމުގެ ގޮތުން ވޭތުވެދިޔަ މަސްތަކުގައި ސަރުކާރުން ވަނީ އެކިއެކި މަސައްކަތްތައް އިސްކޮށް ހަރަކާތްތެރިވެފައެވެ. އަދި ފަލަސްތީނުގައި ހާލުގައި ޖެހިފައިވާ މީހުންނަށް އެހީތެރިވުމުގެ ގޮތުން ޒަކާތު ފަންޑުން 100،000 ޑޮލަރު ހަދިޔާ ކުރުމަށް ވެސް ވަނީ ނިންމާފަ އެވެ.
ސަރުކާރާއި ދައުލަތުގެ ޕަބްލިކް ސަރވިސް މީޑިއާއިން މިދިޔަ މަހު ބޭއްވި ޓެލެތޯންގައި އެކި މުއައްސަސާތަކާއި އާންމު ރައްޔިތުންގެ ފަރާތުން 19 މިލިއަން އެމްވީއާރު ލިބިފައިވެއެވެ.
މިއަހަރުގެ މޯލްޑިވްސް އިން ޔޫއެންއާރުޑަބްލިއުއޭ އަށް ދޭ ހަދިޔާ ވެސް ވަނީ 5000 ޑޮލަރުން 50،000 ޑޮލަރަށް އިތުރުކޮށްފަ އެވެ.
Leave a Reply