އަލިފާނުގެ ހާދިސާއެއް ހިނގައި ދެ މީހަކަށް އަނިޔާވެއްޖެ އެވެ. ފްލޫނިޔާ މަގުގައި ހުންނަ ގެއެއްގެ ތިންވަނަ ފަންގިފިލާގައި އަލިފާން ރޯވެފައިވަނީ ބުރާސްފަތި ދުވަހުގެ މެންދުރުގެ ވަގުތެއްގައެވެ.
މިހާދިސާ ގުޅިގެން އެމްއެންޑީއެފްގެ ފަޔަރ ފައިޓަރުން ދަނީ އެސަރަހައްދުގައި ހަރަކާތްތެރިވަމުންނެވެ.
ފުލުހުންގެ ތަރުޖަމާނު ވިދާޅުވީ މި ހާދިސާގައި ދެ މީހަކަށް އަނިޔާވެފައިވާ ކަމަށެވެ. އެ މީހުން ވަނީ އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އަށް ގެންގޮސްފަ އެވެ.
އެމީހުންނާ ގުޅޭ އިތުރު ތަފްސީލެއް، އަދި އެމީހުންނަށް ލިބުނު އަނިޔާގެ މިންވަރު ފުލުހުން ހާމަކޮށްފައެއް ނުވެ އެވެ. އަދި އަލިފާންގަނޑު މިހާރު ކޮންޓްރޯލް ކުރެވިފައިވާ ކަމަށް މަޢުލޫމާތުލިބިފައިވެވެ. ނަމަވެސް އެ އިމާރާތުން ދުމުގެ ބޯ ވިލާތައް ކުރިއަށް އެބަދެއެވެ.
ފޮޓޯ: އަބްދުﷲ އަޒްމަން
Leave a Reply