ވެރިކަމަކީ، ދުރުވާން ދަތި، ދެވި ހިފާ ކަމެއް!

އިބްރާހީމް ޙަސަން

ކުރިއަށް އޮތް އެމެރިކާގެ ރިޔާސީ އިންތިޚާބުގައި މިހާރުގެ ރައީސް ބައިޑަން ގެ އުމުރުފުޅާ އަދި އެމަނިކުފާނުގެ ޞިއްޚީ ޙާލަތަކީ ދުނިޔޭގެ ސުޕަރ ޕަވަރ ވެރިކަމަށް ކުފޫ ހަމަ ނުވާ ސަބަބެއް ކަމަށް އެމެރިކާގެ ރައްޔިތުން ޤަބޫލު ނުކުރެއްވި،  ނަމަވެސް ބައިޑަން ހުންނެވީ ވެރިކަމުގެ ދަހިވެތި ކަމުގައެވެ. މިކަހަލަ އެތައް މިސާލެއް ދުނިޔޭގެ ގިނަ ގައުމު ތަކުން އަދި ކީއްތޯ ދިވެހި ރާއްޖެއިން ވެސް ފެންނަމުން ދެއެވެ.

ރައީސް މައުމޫން 30އަހަރު ދުވަހު ވެރިކަން ކުރެއްވުމުން ވެސް އިތުރު 5އަހަރު ބޭނުން ފުޅުވިއެވެ.  އެމަނިކުފާނު މުޅި އުމުރުފުޅު ވެރިކަމުގެ ހޭދަ ކުރެއްވުނު ނަމަވެސް އަމިއްލަ ފުޅަށް ވެރިކަމުން ދުރަށް ވަޑައިގަތުމަށް ބޭނުންފުޅެއް ނުވިއެވެ.  ގިނަ ޕާޓީތައް އެކުލެވޭ ގޮތަށް ބޭއްވުނު ފުރަތަމަ ރިޔާސީ އިންތިޚާބުގައި އެމަނިކުފާނު ވާދަ ކުރެއްވިއެވެ. 30އަހަރު ވެރިކަން ކުރެއްވުމަށްފަހު، އެހެން ލީޑަރ އަކު ރައްޔިތުންނަކަށް ދައްކަވާކަށް ނުކެރުނެވެ. ގޮތް ނިންމީ ރައްޔިތުންނެވެ. ދެން އައީ ރައްޔިތުންގެ ނުހަނު ތާއިދާއި އެކު ރައީސް ނަޝީދުގެ ވެރިކަމެވެ. އެމަނިކުފާނަށް ދިމާވީ ވަރަށް ދެރަ ގޮތެކެވެ. ދައުރު ހަމަ ނުކުރެވި ވެރިކަމުން އަލްވަދާއު ކިޔަން ޖެހުނީ މާ އަވަހަށެވެ. ވެރިކަން ލިބި ދައުރު ހަމަ ކުރައްވަން އެނގި ވަޑައި ނުގަތް ނަމަވެސް،  އަނެއްކާވެސް  2013ގައި ބޭއްވި އިންތިޚާބުގައި ރައީސް ނަޝީދު އަނެއްކާ ވެސް ވެރިކަމަށް ވާދަ ކުރެއްވިއެވެ. ރައްޔިތުންގެ ޖަވާބު އޮތީ ނޫނެކެވެ. ދެން މަނިކުފާނަށް ދެއްވިއްޖޭ! މަޑުކޮށްލައްވާށޭ! 2013ގެ އިންތިޚާބަކީ އަދި ވަރަށް އާދަޔާ ޚިލާފު އިންތިޚާބެކެވެ. އެވަގުތު ރައީސުލް ޖުމުހޫރިއްޔާގެ މަޤާމުގައި ހުންނެވި ޑޮކްޓަރ ވަހީދު ރިޔާސީ އިންތިޚާބަށް ކުރިމަތި ލައްވާ، ލަދުވެތި ގޮތަކަށް ނާކާމިޔާބީއާ ކުރިމަތި ލައްވަން ޖެހި ވަޑައި ގަތުމެވެ. އެއީ  ރާއްޖޭގައި ބޭއްވުނު އިންތިޚާބެއްގައި ވެރިޔަކަށް ހުންނެވި ބޭފުޅަކަށް ނުލިބޭ ވަރުގެ ދަށް ނަތީޖާއަކުން އިންތިޚާބުގައި ރައީސް ޑޮކްޓަރ ވަހީދު ބަލިވުމެވެ. ނަމަވެސް އެމަނިކުފާނު 2023ގައިވެސް ވެރިކަމަށް ކުރިމަތި ލެއްވުމަށްޓަކައި ކުށުގެ ރެކޯޑް ސާފު ކުރެއްވި ކަމަށްވެސް ވެއެވެ. އާދެ 2018ގައި ބޭއްވުނު ރިޔާސީ އިންތިޚާބުގައި ކާމިޔާބު ކުރެއްވި އިބްރާހީމް މުޙަންމަދު ޞާލީހްގެ ވެރިކަމުގެ ދައުރުގެ ގިނަ ދުވަސްތަކުގައި ކުރިން ރައީސްކަން ކުރެއްވި ރައީސް ޔާމީން ބެހެއްޓެވީ ޖަލުގެ ތޭރިތަކުގެ ތެރޭގައެވެ. ނަމަވެސް 2023ގައި ރައީސް ޔާމީން ވެރިކަމަށް ވަޑައިގަތުމަށް މަސައްކަތް ކުރެއްވިއެވެ. އެކަން ހުއްޓުވީ ކޯޓުންނެވެ. ރައީސް ޞާލިޙްގެ ސަރުކާރަކީ “ސްލޯ” ސަރުކާރެއް ކަމަށް ފާޑު ކިޔުން އަމާޒުވުމާއި އަދި އެމަނިކުފާނުގެ އެންމެ އަމިއްލަ ޕާޓީގެ ބައެއް ފަރާތްތައް ވަކިވެ އިދިކޮޅަށް މަސައްކަތް ކުރައްވަމުން ގެންދަވަނިކޮށް ވެރިކަން ލިބޭތޯ ރައީސް ޞާލިޙް 2023ގައި ރިޔާސީ ރޭހަށް ނުކުންނެވިއެވެ. ރައީސް ޞާލީހަށް ޖެހި ވަޑައިގަތީ އެހެން ބޭފުޅުންނަށް ވެސް ޖެހިވަޑައިގެން ދަތުރެވެ. ވެރިކަމަށް އަލްވަދާޢު ކިޔަން ޖެހުމުގެ ހިތް ދަތިކަމެވެ.    2023ން  ފެށިގެން މިދަނީ ޑޮކްޓަރ މުއިއްޒުގެ ރިޔާސީ ދައުރެވެ. އަދި  މިއީ އެމަނިކުފާނުގެ ރިޔާސީ ދައުރުގެ ހަނީމޫން ދުވަސް ވަރެވެ.  އަދި ހަމަ ވެރިކަމުގެ ހަމަ ނޭވާ ނުލެވި އުޅުއްވަނިކޮށް  އެމަނިކުފާނުގެ ސަޕޯޓަރުން އެމަނިކުފާނަށް ދެވަނަ ދައުރެއް ދޭން ދަމާ ފޫގަޅަން ފަށާފިއެވެ.

ވީމާ ވެރިކަމަކީ ވަރަށް ދެވި ހިފާ އަދި ގާތް ވެވިއްޖެނަމަ ދުރުވާން އުދަގޫ ކަމެއްކަން އެނގެއެވެ. މިހާރު އަހާލިއަސް “ބޭނުމެއް  ނޫނޭ”  “ދެން ފުދިއްޖޭ”  ވިދާޅުވާނެ ބޭފުޅަކު ނުހުންނަވާނެކަން މެންދުރުގެ އިރު ފަދައިން ޔަޤީނެވެ. ވެރިކަމަކީ ފާޑެއްގެ ދެވި ހިފާ ކަމެކެވެ. އަމިއްލައަކަށް ދޫކޮށް ނުލާނެ، އެހެން މީހުން ދުރު ކުރަން ޖެހޭ ކަމަކީ ވެރިކަމެވެ.

އިބްރާހިމް ޙަސަން