ގަރު ދިޔަ އާއި ބަތާ – ދިވެހިންގެ ދިރިއުޅުމުގެ ޙާލަތު

އިބްރާހީމް ޙަސަން

މިއަދު މުޅި ސޯސަލް މީޑިއާގައި އެންމެ ގިނަ މީހުން ސަމާލުކަށް ހުއްޓިފައި ވަނީ ޕީ އެންސީ ޖަގަހައިގާ ރައީސް އޮފީހުގެ މިނިސްޓަރ ޢަލީ އާރިފް ދެއްކެވި ވާހަކަ ފުޅަކަށެވެ. ޚަރަދު ކުޑަކުރުމުގެ ގޮތުން ޓޭކް އަވޭ ހުއްޓާލާ ގަރު ދިޔަ އާއި ބަތާ ކެއުމަށް މިނިސްޓަރ ގޮވާ ލެއްވުމަކީ ރައްޔިތުންގެ އެކަމަށް ސަމާލުކަން ދޭން ޖެހޭ ވާހަކަ ފުޅަކަށް ވަނީ ވެފައެވެ. ތަފާތު ފަންތީގެ ބޭފުޅުން ވެސް މިނިސްޓަރގެ މިވާހަކަ ފުޅަށް  ޚިޔާލު ފާޅު ކުރައްވާ ސޯސަލް މީޑިއާ ފުރާލާފައި ވެއެވެ.

މިނިސްޓަރގެ ވާހަކަ ފުޅުން އަޅުގަނޑަށް ދޭހަވި ދެކަމެއް ދަންނަވާލާނަމެވެ. ފުރަތަމަ ކަމަކީ ދިވެހިން އަސްލު ދިރިއުޅޭ ޙާލު މިނިސްޓަރަށް ނުވަތަ ސަރުކާރަށް އެނގި ވަޑައި ނުގަންނަވާ ކަމެވެ.  ލިބޭ އާމްދަނީން ދެކޮޅު ނުޖެހޭ ދިރިއުޅުމެއްގައި ގިނަ ދިވެހިން އުޅެނީ، މާ މަތީ ފަންތީ ދިރިއުޅުމެއްގައި އުޅޭތީއެއް ނޫންކަން އެނގި ވަޑައި ނުގަންނަވާ ކަމެވެ. ތަކެތީގެ އަގު އިންތިހާއަށް ބޮޑުވެ، ދިރިއުޅުމުގެ އެންމެ ޒަރޫރީ ބޭނުންތަކަށް ވެސް ކުރަން ޖެހޭ ޚަރަދު ވަނީ އިންތިހާ ބޮޑުވެފާ ކަން ރެއަކާވެސް ނުލާ ކަމުގެ އިޙްސާސެވެ.   ކަރަންޓް ބިލް އިންތިހާއަށް ބޮޑު ވެފައި ކަމަށް ގޮވާ އަޑު އިވި ވަޑައި ނުގަންނަވާ ކަމެވެ.  ކަރަންޓް އާއި ފެނާ ނުލާ ދިވެހިން ދިރިއުޅޭނެ ގޮތެއް ވިދާޅުވެ ދެއްވަފާނަންތޯއެވެ. ނުވަތަ ތިޔަ ވިދާޅުވަނީ ދިވެހިންގެ ދިރިއުޅުން މީގެ 40 ނުވަތަ 50 އަހަރުގެ ފަހަތަށް ސޮއްސާލަން ވީތޯއެވެ. ފުޅި ބައްތި ދިއްލައިގެން ވަޅުން ފެންވަރައިގެން އުޅެން ވީތޯއެވެ. ރަގަޅެވެ. އާސަންދަ ލިބެއެވެ. ނަމަވެސް ބަލި މަޑު ކަމެއް ކުރިމަތި ވެއްޖެ ނަމަ މިއަދުވެސް ސަލާން ޖަހަން ދިވެހިންނަށް މަޖުބޫރު ވެފައި ވާ ކަން އެންމެވެސް ޤަބޫލު ކުރާނެއެވެ.

މަޖުބޫރީ ހާލަތެއްގައި ގިނަ ދިވެހިން މިއަދު ދިރިއުޅެން މަޖުބޫރު ވެފައިވަނީ މާލޭގައެވެ. ކުލީގެ އަޅުންނަށް ވެގެން  ދިވެހިންގެ ދިރިއުޅެނީ މަތީ ފަންތީގެ ދިރިއުޅުމެއްގައި ތޯއެވެ. ގޭ ކުއްޔާ ފެނާއި ކަރަންޓާ އަދި އެހެނިހެން ބިލްތައް ދެއްކެނީ މުޅި އާއިލާ ކުރަ ބުރަ މަސައްކަތުންކަން އެގިވަޑައި ނުގަތުމަކީ ދެރަވަރުގެ ކަންކަމެވެ. ރެއެކަށް 2000ޑޮލަރ ވުރެ އަގު މަތީގެ ކޮޓަރިތައް ވިއްކައިގެން އާމްދަނީ ހޯދަމުން ދާ ރިސޯޓްތައް ހުރި ގައުމެއްގެ ރައްޔިތު މީހާ ހަތަރު ކުދީންނާ އަނބި މީހާ 12ފޫޓް ގެ ކުޑަ ކޮޓަރި ގަނޑެއްގައި ދިރިއުޅުން ވޭތި ކުރަނީ ކޮންކަހަލަ ވޭނީ ދިރިއުޅުމެއްގައި ކަން އިޙްސާސް ކޮށްލައްވާށެވެ.  ކަންމަތީ ފިހާރައިން ފަންސުރު ބުރިއެއް ގަތަސް ޖީ އެސްޓީގެ ގޮތުގައި ފައިސާ ދައްކާ ތިޔަ ބޭފުޅުންގެ މުސާރަ ދެނީ ތިޔަ ވިދާޅުވާ “މަތީ ފަންތީގެ ދިރިއުޅޭ” އަތް މަތި ދަތި  މީހާއެވެ.  ކުދި ވިޔަފާރިތައް ފުނޑި ބަގުރޫޓް ވެ އަމިއްލަ މަސައްކަތުން އާމްދަނީ ހޯދާ މީހުން މަގުމަތި ވަމުން ދާ ދިއުމަކީ  މުޅި ޤައުމުގެ އިޤްތިޞާދަށް އޮތް ނުރައްކަލެއްކަން ސިޔާސީ ބޭފުޅުންނަށް މޭރުން ނުވިޔަސް އިޤްތިޞާދީ ބޭފުޅުންނަށް އެނގި ވަޑައި ގަންނަވާނެ ކަން ޤަބޫލު ކުރެވެއެވެ.  ތަފާތު ނަންނަމުގައި ބޭންކު ތަކުން ދޫކުރާ ލޯނު ތަކުގެ މަޅީގައި ދިވެހިން ޖެހި ލޯނު ނުދެއްކި ބޭންކުގެ “އަޅު” މަސައްކަތަށް ދިވެހިން ނުކުންނަށް ޖެހި ފައިވާ ވާކަމީ ޙަޤީޤަތެކެވެ. ދަރާ ވިކިގެން ނަމަވެސް ދިވެހިން އުޅެނީ މޯބައިލް  ފޯނާއި، ރިތީ އަންނައުނު ލައިގެންނެވެ.  އެތަކެއްޗާ ވަކިން މިއަދު އުޅެވޭކަށް ނެތެވެ. އެހެން ނަމަވެސް ދައްކަން ޖެހޭ ޓެކްސެއް އޮތްނަމަ، މާމަގެ ކަނޑި ވިއްކާލައިގެން ނަމަވެސް އެޓެކްސް ދައްކައެވެ.  ތިޔަ ބޭފުޅުންގެ ޙައްޤުގައެވެ.

އަޅުގަނޑަށް ފާހަގަ ކުރެވުނު ދެވަނަ ކަމަކީ އިޤްތިޞާދީ ގޮތުން ނަގާ ބޯމަތި ކޮށްފައިވާ  ވިލާގަނޑު ބާރުގަދަ ވާނެ ކަމުގެ މިންވަރެވެ.  ސަރުކާރުން އެވިދާޅުވެ ދެއްވީ އެވިލާގަނޑުން ކޮށްފާނެ އަސަރުގެ ވާހަކައެވެ. އެވިލާތަކުގެ ސަބަބުން އުފެދޭނެ ވައިގެ ބާރު މީނާއި ކަނޑު ގަދަ ވާނެ ކަމުގެ އިންޒާރެވެ.  ވިދާ ގުގުރާ އަދި ބޯކޮށް ވާރޭ ވެހި ގެއްލުން ތަކެއް ވެދާނެ ކަމުގެ ލަފާ ކުރުން ތަކެކެވެ. ވިލާ ތަކުން އުފެދޭނެ ތޫފާނުގެ ބާރު ގަދަކަމުގެ ވާހަކައެވެ. އެކަމަކު ދަންނަވަން އޮތީ އަމާން ކަމުގެ އައްސޭރިއަކަށް ގެންދަވަން މިއަދު ޙަވާލުވެ ތިއްބެވި ބޭފުޅުންނަށް އެވިލާތައް ފެނޭތޯއެވެ. އެތުފާނުގެ ހިލަމެއް ވޭތޯއެވެ. އެވިލާތަކުން ލިބި ދާނެ ގެއްލުން އިޙްސާސް ވޭތޯއެވެ. ތިޔަ ބޭފުޅުން ވިދާޅުވާނީ ކީކޭތޯއެވެ.  އަޅުގަނޑު ދަންނަވަން އޮތީ  ދިވެއްސެއް ވިއްޔާ ގަރުދިޔަ އާއި ބަތާ ދުރެއް ނުވެވޭނެ ވާހަކައެވެ. އެއީ ދިރިއުޅުމުގެ ފަންތި އަކުން ވާކަމެއް ނޫނެވެ.

އިބްރާހިމް ޙަސަން