އޮމާންގެ މިސްކިތެއްގައި ދިން ބަޑީގެ ހަމަލާތަކުގައި ޕާކިސްތާނުގެ ހަތަރު މީހަކާއި ފުލުހަކު މަރުވެ، 30 މީހުން ޒަޚަމްވެފައިވާ ކަމަށް ޕާކިސްތާނުގެ އޮފިޝަލުން ބުނެފި އެވެ.
އޮމާންގެ ދައުލަތުގެ މީޑިއާއިން އަންގާރަ ދުވަހު ރިޕޯޓްކޮށްފައިވާ ގޮތުގައި މި ހަމަލާގައި ބައިވެރިވި ތިން މީހަކު ވަނީ މަރުވެފަ އެވެ.
ޕާކިސްތާނުގެ ޚާރިޖީ ވުޒާރާއިން އަންގާރަ ދުވަހު ބުނެފައިވަނީ މި ހަމަލާ ދީފައިވަނީ އޮމާންގެ ޝީޢީ މިސްކިތެއް ކަމަށްވާ ޢަލީ ބިން އަބީ ޠާލިބު މިސްކިތުގައި ކަމަށެވެ.
އޮމާންގެ ވެރިރަށް މަސްކަޓްގެ ވާދީ އަލް ކަބީރު ޑިސްޓްރިކްޓްގައި ހިނގި މި ހާދިސާއަކީ ޓެރަރިސްޓް ހަމަލާއެއްގެ ގޮތުގައި ސިފަކޮށް ޕާކިސްތާނުގެ ވުޒާރާއިން ބުނީ ޒަހަމްވި 30 މީހުން ހޮސްޕިޓަލުގައި އެބަތިބި ކަމަށެވެ.
އޮމާންގެ ފުލުހުން ވެސް ވަނީ މި ހާދިސާގައި ހަތަރު މީހަކު މަރުވެފައިވާ ކަމަށް ރިޕޯޓްކޮށްފަ އެވެ.
މި ހަމަލާ ދީފައި މިވަނީ ރަސޫލާ މުޙައްމަދު (ﷺ) ގެ ކާފަދަރި އިމާމް ޙުސައިން އަވަހާރަވުމުގެ މުނާސަބަތުގައި ކޮންމެ އަހަރަކު ވެސް ހިތާމައިގެ ދުވަސްވަރެއް ކަމުގައިވާ އާޝޫރާ ޝިއާ މުސްލިމުން ފާހަގަކުރަމުން ދަނިކޮށެވެ.
ޕާކިސްތާނުގެ ވުޒާރާއިން ބުނީ ހަމަލާ ދިން މީހުން އޮމާންގެ ސަރުކާރުން ނައްތާލާފައިވާތީ އުފާކުރާ ކަމަށެވެ.
މި ހަމަލާއާއި ގުޅިގެން މަސްކަޓްގައި ހުންނަ އެމެރިކާ އެމްބަސީން ވަނީ ސެކިއުރިޓީ އެލާޓް ނެރެފައެވެ. އެމްބަސީން އެކްސްގައި ލިޔެފައި ވަނީ އެމެރިކާގެ ރައްޔިތުން ސަމާލުވެ، ލޯކަލް ހަބަރުތައް މޮނިޓާކޮށް، ލޯކަލް އޮތޯރިޓީގެ އިރުޝާދުތަކަށް ސަމާލުކަން ދޭން ޖެހޭ ކަމަށެވެ.
Leave a Reply