އިބްރާހީމް ޙަސަން
ސިޔާސީ ޕާޓީތައް ރާއްޖޭގައި އުފެދި ސިޔާސީ ހަރަކާތްތައް ހިންގަން ފެށިތާ މާގިނަ ދުވަސްތަކެއް ނުވެއެވެ. ސިޔާސީ ޕާޓީތަކުގެ ބެލެނިވެރި ފަރާތް ކަމުގައިވާ އިލެކްޝަން ކޮމިޝަންގެ ވެބްސައިޓުން އެގޭ ގޮތުގައި މިހާރު ރާއްޖޭގައި 11ސިޔާސީ ޕާޓީ ރަޖިސްޓްރީ ކުރެވި ދަފްތަރު ކުރެވިފައި ވެއެވެ
ސިޔާސީ ޕާޓީ އުފައްދާ ޙަރަކާތްތެރި ވަނީ ސިޔާސީ މަސައްކަތް ކުރުމަށެވެ. އެއީ ވެރިކަމަށް އައުމަށާއި ނުވަތަ އެވަގުތު އޮންނަ ސަރުކާރުގެ ސިޔާސަތުތަކަށް ފާރަވެރި ވެ ސަރުކާރުގެ ސިޔާސަތުގައި ހުންނަ ނުރަގަޅު ކަންތައް ރައްޔިތުންނަށް ތިލަ ކޮށްދިނުމަށެވެ. ރައްޔިތުންގެ ތާއީދު ހޯދާ އިންތިޚާބީ މަޤާމަށް އައުމަށް މަސައްކަތް ކުރުމެވެ. ވޭތުވެ ދިޔަ ތަނުގައި އެނގިގެން ދިޔަ ހަޤީޤަތަކީ ރާއްޖޭގެ ސިޔާސީ ރޭހުގައި އަބަދުވެސް ވާދަ ކުރަނީ މައިގަނޑު ދެޕާޓީކަމެވެ.
ބައެއް ކުދި ޕާޓީތަކުން ރައްޔިތުންގެ ތާއީދު އޮތް މިންވަރު ޗެކް ކޮށްލަން ނަމަވެސް ރިޔާސީ ރޭހަށް ނުކުމެ ވާދަ ކުރަން ވެސް ނުކެރެއެވެ. އުމަރު ނަސީރު ކުރައްވާ މިންވަރަށް އެފަދަ ސިޔާސީ ޕާޓީތަކުން މަސައްކަތެއް ކުރާކަށް ނުކެރެއެވެ. އުމަރަށް ރިޔާސީ ރޭހުގައި ލިބި ވަޑައިގެންނެވި ނަތީޖާ ސިޔާސީ ޕާޓީ ތަކަށް ވުރެ މާ ބޮޑަށް ވެސް ރަގަޅެވެ. ސިޔާސީ ޕާޓީތައް މަސަކަތައް “ޒީރޯ” ލިބޭ އިރު ޢުމަރުގެ މަސައްކަތަށް ސިޔާސީ ގޮތުން ސަތޭކަ ދޭން ޖެހެއެވެ. ނަމަވެސް ޖުމުހޫރީ ޕާޓީ ތަފާތެވެ. އެއްދުވަހުން އަނެއް ދުވަހަށް ޖުމުހޫރީ ޕާޓީއަށް އޮތް ތާއީދު ދައްވަމުން ދިޔަ ނަމަވެސް ކޮންމެ ރިޔާސީ ރޭހަކަށް ނުކުންނަވާ “ކަމޯން” އޭ ވިދާޅުވެ ލީޑަރ ވާދަ ކުރައްވައެވެ. ރައްޔިތުން ވޯޓް ދިނުމާއި ނުދިނުން އެއީ އެހެން ކަމެކެވެ. ލީޑަރަށް ސާބަސް ދޭން ޖެހެއެވެ. ނަމަވެސް ގިނަ ދުވަސް ވެފައިވާ އެހެން ސިޔާސީ ޕާޓީތައް ކަމަށްވާ އެމްޑީއޭ އަދާލަތު ފަދަ ޕާޓީތަކުން ރިޔާސީ ރޭހަށް ނުކުމެ، ވާދަކޮށްލަން ވެސް ނުކެރެއެވެ ކުރައްވާ ހާ ވެސް ކަމަކީ ވެރިކަން ލިބިދާނެހެން ހީވާ ބައެއްގެ ފަހަތުން ދުވުމެވެ. ހަޤީޤަތަށް ބަލާއިރު އެޕާޓީތަކަށް ރައްޔިތުންގެ ތާއިދެއް ނެތެވެ. ވެރިކަމަށް ވާދަ ކުރައްވައިފިނަމަ ބާތިލް ވޯޓަށް ވުރެ ލިބޭ ވޯޓު މަދުވާނެ ކަން އެޕާޓީގެ އިސްބޭފުޅުންނަށް އެނގެއެވެ. އެންމެ ފަހުން ބޭއްވި ރައްޔިތުންގެ މަޖިލީހުގެ އިންތިޚާބުގެ ނަތީޖާއިން މިކަން ރަގަޅަށް އެނގެއެވެ.
ވީމާ، ކުދި ޕާޓީތަކުން ކުރާ ކަމަކީ، ވެރިކަން ލިބިދާނެ ކަމަށް ފެންނަ ޕާޓީއެއްގެ ފަހަތަށް އަރާ ޘަނާ ކިޔުމުގައި އުޅުއްވުމެވެ. މިކަން ފާއިތުވި އަހަރުގެ ރިޔާސީ އިންތިޚާބުގައި ވެސް ފެނުނެވެ. ކެންޑިޑޭޓްގެ ގައިކޮޅުން ނުކުންނަނީ މާމުއި ކަމަށް ވިދާޅުވެ ތައުރީފު ކުރެއްވުމަށް ފަހު، މާމުއި ރައްޔިތުން ބޭނުން ނުވާ ކަން ހަމަ އެގުމުން ކޮޅު ބަދަލު ކުރައްވާ އިދިކޮޅު ޕާޓީއާއި އެކު ކޯލިޝަން ހެދިކަން އިޢުލާން ކުރިއެވެ. މިފަދަ ސިޔާސީ ޕާޓީތަކުގެ މަސައްކަތަކީ އެވަގުތެއްގައި ވެރިކަމުގައި އޮންނަ ބަޔަކާ ގުޅިގެން ޕާޓީތަކުގެ ލީޑަރުގެ އަންބޮޑި ބޮޑު ކުރެއްވުމާއި، ޕާޓީގައި އުޅޭ ދޮޅަހަކަށް މީހުންނަށް ސަރުކާރުގެ ސިޔާސީ މަޤާމު ހޯދައި ދިނުމެވެ. އަޅުގަނޑުގެ ޚިޔާލަކީ، ދެ ޕާޓީގެ ޑިމްކޮރަސީއަށް ރާއްޖެ ފައްކާ ވަމުން ދާއިރު ކޮންމެ ދެމަފިރިއަކަށް ސިޔާސީ ޕާޓީ ހެދޭ ގޮތަށް ޤާނޫނު ބަދަލްކޮށް ބޮޑެތި ޕާޓީ ތަކުގެ ހާލީގައި ބިސް އެޅޭނެ މަގު އެންމެންނަށް ފަހިކޮށް ދިނުމެވެ. ހަމަ އެންމެ ބޭނުމެއްގައެވެ.
Leave a Reply