ލޯކަލް ކައުންސިލްގެ ބައި-އިލެކްޝަންގައި ދެ ގަޑިއިރު ތެރޭގައި 669 މީހުން ވޯޓުލައިފި

މިއަދު ކުރިއަށްދާ ލޯކަލް ކައުންސިލްގެ ބައި-އިލެކްޝަންތަކުގައި ފުރަތަމަ ދެ ގަޑިއިރު ތެރޭގައި 669 މީހުން ވޯޓުލާފައިވާ ކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.

އެ ކޮމިޝަނުން އާންމުކޮށްފައިވާ ތަފާސްހިސާބުތައް ދައްކާ ގޮތުގައި މި އިންތިޚާބުގައި 13،112 މީހުންނަށް ވޯޓުލުމުގެ ޙައްގު ލިބެއެވެ. މީގެ ތެރެއިން މިހާތަނަށް ވޯޓުލާފައިވަނީ 5.1 އިންސައްތަ މީހުންނެވެ. އެއީ 234 އަންހެނުންނާއި 435 ފިރިހެނުންނެވެ.

ބައި އިލެކްޝަނުގެ ވޯޓުލުން މިއަދު ހެނދުނު 8:00 ފަށާފައިވާއިރު ގަޑިއަށް ވޯޓުލުން ފަށާފައިވަނީ 25 ފޮށީގެ ތެރެއިން 18 ފޮށީގައެވެ. މާލޭގެ 7 ފޮއްޓެއްގައި ވޯޓުލާން މީހުން ނުދިއުމުގެ ސަބަބުން ގަޑިއަށް ވޯޓުލުން ފެށިފައެއް ނުވެއެވެ.

މި ބައި އިލެކްޝަނުގައި ވާދަކުރާ ކެނޑިޑޭޓުންނަކީ:

މައްޗަން ގޮޅި މެދު ދާއިރާ

• ފާތިނަތު އިޝާން އަލީ، އައިނާއެޑަމްސް/ ޕީއެންސީ
• ހައްވާ ޝިފާނާ، މއ. ރިހިރާޅު/ އެމްޑީޕީ

ހެންވޭރު ހުޅަނދު ދާއިރާ

• ފާތިމަތު ޝައުފާ ސަލީމް، ހ. އިސްފަހާން/ ޕީއެންސީ
• މުހައްމަދު ޢަލީ ޖިނާދު، ހ. ގްރީންޒެސްޓް/ އެމްޑީޕީ

ހުޅުމާލެ ދާއިރާ

• އަލީ އައިމަން، ހ. ފުޖޭރާ/ ޕީއެންސީ
• އަހުމަދު ރަޝީދު (ތުތީ)، ހުޅުމާލެ. މާވަހަރު 3/ އެމްޑީޕީ

މި އިންތިޚާބުގައި ވޯޓުލުން ކުރިއަށްދަނީ މާލެ ސިޓީ، ކުޅުދުއްފުށި ސިޓީ، ރ. ރަސްމާދޫ އަދި ފ. ބިލެތްދޫ ކައުންސިލްގެ ހުސްވެފައިވާ ގޮނޑިތަކަށް މެންބަރުން އިންތިޚާބު ކުރުމަށެވެ.