ރައީސް ޑރ. މުޙައްމަދު މުޢިއްޒު ވިދާޅުވެފައިވަނީ މިނިސްޓަރ އޮފް ޔޫތު އެމްޕަވަރމަންޓް، އިންފޮމޭޝަން އެންޑް އާޓްސްގެ ބަޖެޓުން 25 މިލިއަން ރުފިޔާ ވަކި ގައިޑްލައިންތަކަކާ އެއްގޮތަށް ރާއްޖޭގެ އާޓިސްޓުންގެ މަސައްކަތްތަކަށް އެހީތެރިވުމަށް ކަނޑައަޅާނެ ކަމަށެވެ. މިވާހަކަ ވިދާޅުވެފައިވަނީ “އަންވެއިލިންގ ވިޝަންސް 2024” ރާއްޖޭގެ ޒަމާނީ އާޓް އެގްޒިބިޝަންގައި ވާހަކަފުޅު ދައްކަވަމުންނެވެ.
ނޭޝަނަލް އާޓް ގެލަރީގައި ބޭއްވުނު މި ހަފްލާގައި ވާހަކަފުޅު ދައްކަވަމުން ރައީސް ވިދާޅުވީ މެނިފެސްޓޯގައި ބަޔާންކޮށްފައިވާ ގޮތަށް ރާއްޖޭގެ އާޓިސްޓުންގެ ހުނަރާއި މަސައްކަތް ކުރިއެރުވުމަށް ސަރުކާރުން ފުރިހަމައަށް އެހީތެރިވެދޭނެ ކަމަށެވެ. އަދި އާޓިސްޓުންނަށް އެމީހުންގެ މަސައްކަތް ދައްކުވައިދީ މާކެޓްކުރުމަށް ފުރުޞަތު ހޯދައިދިނުމަށް ސަރުކާރުން މަސައްކަތް ކުރާނެ ކަމަށްވެސް ވިދާޅުވިއެވެ.
ރައީސް އަދި ކަށަވަރުކޮށްދެއްވީ އާޓިސްޓުންގެ ހުނަރު ތަރައްޤީކުރުމަށް ސަރުކާރުން މާލީގޮތުން އެހީތެރިވެދޭނެ ކަމަށެވެ. އަދި ހުޅުމާލޭގައި އާޓިސްޓުންގެ ހުނަރު ދައްކުވައިދިނުމަށް ޚާއްޞަ ތަނެއް ޤާއިމްކުރެވޭނެ ކަމަށްވެސް ވިދާޅުވިއެވެ. މީގެ އިތުރުން، ރާއްޖޭގެ އެކި ރަށްރަށުގައި އެގްޒިބިޝަންތައް ބޭއްވުމަށް މަގުފަހިކޮށްދީ، ބައިނަލްއަޤްވާމީ ފޯރަމްތަކުގައި އާޓިސްޓުންނަށް އެމީހުންގެ ހުނަރު ދެއްކުމަށް ހިތްވަރުދޭނެ ކަމަށްވެސް ވިދާޅުވިއެވެ.
އަންވެއިލިންގ ވިޝަން އެގްޒިބިޝަން ވަނީ ވޭތުވެދިޔަ 7 އަހަރު ވެސް ރާއްޖޭގެ އާޓިސްޓުންގެ ހުނަރު ދައްކުވައިދީފައެވެ. މިއަހަރުގެ އެގްޒިބިޝަނަށް މޯލްޑިވިއަން އާޓިސްޓް ކޮމިއުނިޓީ (އެމްއޭސީ) އިން ވަނީ 200 އަށްވުރެ ގިނަ ފަރާތުގެ ތެރެއިން 105 އާޓިސްޓުން ޝޯޓްލިސްޓްކޮށްފައެވެ. މީގެ ތެރޭގައި ކުރެހުމާއި، ކުލަޖެހުމާއި، މިކްސްޑް މީޑިއާ އަދި ކެލިގްރަފީ އަދި އިންސްޓޮލޭޝަން ކެޓަގަރީތައް ހިމެނެއެވެ.
Leave a Reply