ޣައްޒާގެ ދެކުނުގައިވާ ޚާން ޔޫނިސް ސިޓީއަށް އިސްރާއީލުން ދިން ހަމަލާގައި މަދުވެގެން 70 ފަލަސްތީނުން މަރުވެ، 200 އަށްވުރެ ގިނަ މީހުން ޒަޚަމްވެފައިވާ ކަމަށް ބްލޮކޭޑްގައިވާ އެ ސަރަޙައްދުގެ ޞިއްޙީ ވުޒާރާއިން ބުނެފިއެވެ.
ހޯމަ ދުވަހު އެ ވުޒާރާއިން ބުނެފައިވަނީ ޒަޚަމްވި ބައެއް މީހުން ތިބީ “ނުރައްކާތެރި ޙާލަތެއްގައި” ކަމަށެވެ.
މީގެ ކުރިން އަންގާފައިވަނީ އެ ސިޓީގެ އިރުމަތީ ހިސާބުތަކަށް އިސްރާއީލުން ދިން ހަމަލާގައި 37 މީހުން މަރުވެ، 120 މީހުން ޒަޚަމްވެފައިވާ ކަމަށެވެ.
ޚާން ޔޫނިސްގެ އިރުމަތީ ހިސާބުތަކުގައި ދިރިއުޅޭ ފަލަސްތީނުންނަށް ވަގުތުން އެ ސަރަޙައްދު ދޫކޮށް ދިއުމަށް އިސްރާއީލު ސިފައިންގެ ބާރުން އަމުރުކޮށްފައިވާ ކަމަށާއި، އިސްރާއީލުގެ ބޮންގުޑުވުމުގެ ތެރޭގައި ރައްޔިތުން ހިނގާފައާއި ކާޓުތަކުގައި އެ ސަރަޙައްދުތަކުން ފިލަން ފެށި މަންޒަރު ފެނިފައިވާ ކަމަށް ފަލަސްތީނުގެ ރަސްމީ ނޫސް އޭޖެންސީ ވަފާއިން ރިޕޯޓުކޮށްފައިވެއެވެ.
އެ ސިޓީގައިވާ ނަސަރ މެޑިކަލް ކޮމްޕްލެކްސްއިން ލޭގެ ޔުނިޓްތައް ބޮޑަށް މަދުވެފައިވާތީ، ޒަޚަމްވެފައިވާ މީހުންނަށް “އަވަސް ގޮތެއްގައި ލޭ ހަދިޔާކުރުމަށް” ރައްޔިތުންނަށް ގޮވާލައިފިއެވެ.
އިސްރާއީލުގެ އަސްކަރިއްޔާގެ ތަރުޖަމާނު އަވީޚައި އަދްރައީ ނެރުނު ބަޔާނެއްގައި ބުނެފައިވަނީ “ޚާން ޔޫނިސްގެ އިރުމަތީ ސަރަޙައްދުގައި ގިނަ އަސްކަރީ ޙަރަކާތްތަކެއް ހިނގަމުންދާތީއާއި ރޮކެޓް ދޫކުރަމުންދާތީ އެތަނުގައި ހުރުމަކީ ނުރައްކާތެރި ކަމެއް” ކަމަށެވެ.
ސޯސް: ޓީއާރްޓީ ވޯލްޑް
Leave a Reply