މެދުރާއްޖެތެރޭގެ މަސްވެރިކަން ރަނގަޅުވެ މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން 56 ޓަނުގެ މަސް ގަނެފި އެވެ.
މިފްކޯއިން ބުނީ މެދުތެރޭގެ ސަރަޙައްދުތަކުގައި، ޚާއްޞަކޮށް މ. އަތޮޅުގެ މަސްވެރިކަން ރަނގަޅުވެފައިވާ ކަމަށެވެ. މިކަމުގެ ސަބަބުން އެ ކުންފުނީގެ އިތުރު އުޅަނދުތައް މާލެ ސަރަހައްދާއި މ. އަތޮޅަށް ފޮނުވަން ވަނީ ނިންމައިފަ އެވެ.
އަދި ރާއްޖޭގެ އުތުރާއި ދެކުނުގެ ސަރަޙައްދުތަކުގެ މަސްވެރިކަން ވަރަށް އަވަހަށް ރަނގަޅުވާނެކަމަށް އެކުންފުނިން ލަފާކުރެއެވެ.
މިފްކޯއިން މިދިޔަ ބުދަ ދުވަހު 56 ޓަނުގެ މަސް ގަނެފައިވާއިރު އޭގެ ތެރޭގައި އައްޑޫ ފިޝަރީޒް ކޮމްޕްލެކްސްގައި ބަނދަރުކުރި ބޯޓުތަކުން 25 ޓަނުގެ މަސް ހިމެނެއެވެ.
އެ ކުންފުނިން ބުނީ މިއީ ދާދި ފަހުން އައި ލުއިކަމަށް ބަލައި ރަނގަޅު އަދަދެއް ކަމަށެވެ.
މިފްކޯއިން ބުނީ ފާއިތުވި ދެ ދުވަހު 20 ޓަނާއި 30 ޓަނާ ދެމެދުގެ އަދަދަކަށް ގަނެފައިވާ ކަމަށެވެ.
މިފްކޯއިން މިހާރު މަސް ކިލޯއެއް ގަންނަނީ 16 ރުފިޔާގެ ރޭޓުންނެވެ.
މަސްވެރިކަން ރަނގަޅުވާނެ ކަމުގެ ނިޝާންތައް ފެނިފައި މިވަނީ ފާއިތުވި ހަފުތާތަކުގައި ވަރަށް ބޮޑަށް ދަށަށް ގޮސް، ބާޒާރުގައި މަހުގެ ދަތިކަން ވަރަށް ބޮޑަށް ކުރިމަތިވެފައި ވަނިކޮށެވެ.
Leave a Reply