ޙައްޤުތަކާއި މިނިވަންކަން ކަށަވަރު ކޮށްދީފައިވާ “ފެހި” ޤާނޫނު އަސާސީން އުފައްދަން ލާޒިމްކޮށްފައިވާ އެއް ކޮމިޝަނަކީ ހިއުމަން ރައިޓްސް ކޮމިޝަން އޮފް މޯލްޑިވްސް އެވެ. ގިނަ ދިވެހިން ޤަބޫލު ކުރާ ގޮތުގައި ހިއުމަންރައިޓްސް ކޮމިޝަނުން އަބަދުވެސް އުޅެނީ ކުށްވެރިން ހިމާޔަތް ކުރެވޭތޯއެވެ. ރަގަޅެވެ. ކުށްވެރިންނަކީ ވަކި ތަނެއްގައި ބަންދުކޮށްފައި ތިބޭ ބައެއް ކަމަށް ވުމުން އެމީހުންގެ އިންސާނީ ކަރާމަތަށް އުނިކަން އަންނަފަދަ ކަމެއް ހިނގުމަކީ ވަރަށް ގާތުގައި އޮންނާނެ ކަމެވެ. ނަމަވެސް ކުށެއް ނުކުރާ އާއްމު ނިކަމެތި ރައްޔިތު މީހާގެ އިންސާނީ ހައްޤު ކަށަވަރު ވޭތޯ ވެސް ހިއުމަން ރައިޓްސް ކޮމިޝަނުން ބަލައިލަން ވެސް ޖެހޭނެ ކަމަށް ދެކެމެވެ.
ދާދި ފަހުން އަޑު އިވުނު އެއް ވާހަކައަކީ ބަގުލަދޭޝްގައި ހިންގި މުޒާހަރާއާއި ގުޅިގެން ރާއްޖޭގައި ތިބި ބަނގުލަދޭސް ރައްޔިތުން އަތޮޅު ތެރޭގެ ރަށެއްގައި މުޒާހާރާ ކުރުމުން އެމީހުން ޑިޕޯޓް ކުރާނެ ކަމަށް ސަރުކާރުން ހާމަ ކުރުމުން އެކަމާ ހިއުމަންރައިޓްސް އޮފް މޯލްޑިވްސްއިން ކަންބޮޑުވުން ފާޅު ކުރި ވާހަކަ އެވެ. ޤަވާއިދާ ޚިލާފަށް އުޅޭ ބިދޭސީންގެ ސަބަބުން ދިވެހި ރާއްޖެއަށް ލިބެމުން ދާ ގެއްލުމަކަށް ހިއުމަންރައިޓްސް އިން ކަންބޮޑުވުން ފާޅު ކުރާތަނެއް ނުފެނެއެވެ. ބޭސް ކުރަން މާލެއައި އުމުރުން ދުވަސްވެފައިވާ މީހެއްގެ އަތުން ފައިސާ ފޭރުނު ވާހަކަ އާއި މަގުތަކުގައި ހިންގާ ފޭރުމާއި ނުރައްކާތެރި މާރާމާރިގެ ސަބަބުން މައޫޞޫމް ރައްޔިތުންނަށް ލިބޭ ނަފްސާނީ އަދި ޖިސްމާނީ އަނިޔާތަކުގެ ވާހަކަ ހިއުމަންރައިޓްސް ގެ ލޮލުގައި އަޅައި ގަނެގެން ނޫޅެއެވެ. ޑްރަގާއި ގޭންގުގެ ހައްޔަކަށް ދިވެހި ރާއްޖެ ވެފައިވާއިރު އެކަމުން ރައްޔިތު މީހާ ސަލާމަތް ކުރުމަށް ހިއުމަން ރައިޓްސް ކޮމިޝަންއިން ކުރާ ކަންތައް ޢާއްމު ވެފައި ނުވެއެވެ. ނިކަމެތި މައުޞޫމް ރައްޔިތުންގެ އިންސާނީ ހައްޤު ކަށަވަރު ވެފައި ވަނީ ކިހާ ވަރަކަށްތޯ ބަލައިލަން ޖެހޭނެއެވެ. އިންސާނީ ޙައްޤަކީ ހަމަ އެކަނި އެއްލޮލުން ބަލަން ވެއްޖެނަމަ، މާދަމާ އުސްފަސްގަޑުގައި ބިދޭސީންގެ ބަޔަކު ފައްޅިއެއް އަޅާ އެތަނުގައި އަޅުކަން ކުރުމުން އެކަން ހުއްޓުވައިފި ނަމަ، އެއީ އިންސާނީ ހައްޤަކަށް އަރައިގެން ކަމަށް ވެ ހިއުމަންރައިޓްސް އިން ބަޔާން ނުނެރި އެއް ނުވާނެއެވެ.
Leave a Reply