މުޙަންމަދު ޢާދިލް
ރާއްޖޭގެ އިޤްތިޞާދުގެ މުހިންމު ރޯލެއް އަދާކުރަމުންދާ ބައެއް ކަމުގައިވާ ކުދި އަދި މެދު ފަންތީގެ ވިޔަފާރިތަކަށް ސަރުކާރުގެ އަޅާލުން ކުޑަވެފައިވާކަމަށް ޕުރައިވެޓް ސެކްޓަރގައި މަސައްކަތް ކުރައްވާ ގިނަ ފަރާތްތަކުން ފާހަގަކުރަމުންދެއެވެ. އަދި ކުދި އަދި މެދުފަންތީގެ ވިޔަފާރިތަކަށް ލޯނު ލިބުމުގައި ވަރަށް ބޮޑެތި ދަތިތަކެއް ކުރިމަތިވަމުންދާ ކަމަށާއި، ލޯނެއް ލިބޭއިރު އެލޯނުގެ އިންޓުރަންސްޓް ރޭޓް ވަރަށް ބޮޑަށް މަތިކަން ފާހަގަކޮށް އެކަންތަކަކީ މިފަދަ އިޤުތިޞާދީ ނާޒުކު ވަގުތުތަކުގައި ކުދި އަދި މެދު ފަންތީގެ ވިޔާފާރިކުރާ ފަރާތްތަކަށް ތަހައްމަލު ކުރެވޭ ވަރަށް ވުރެ ވޭން ހުރި ކަމެކެވެ.
އިޤްތިޞާދީ މާހިރުންގެ ބަހުން، ކުދި އަދި މެދު ފަންތީގެ ވިޔަފާރިތަކަކީ ޤައުމުގެ އިޤްތިޞާދުގެ ބުރަކަށްޓެވެ. މިފަދަ ވިޔަފާރިތައް ފުނޑިއްޖެނަމަ، މުޅި ޤައުމުގެ އިޤްތިޞާދަށް ނޭދެވޭ އަސަރުތަކެއް ކުރާނެކަމަށް އެ ފަރާތްތަކުން ވިދާޅުވެއެވެ. ނަމަވެސް، މި ދާއިރާ ރަނގަޅުކުރުމަށް ސަރުކާރުން އެކަށީގެންވާ މަސައްކަތްތަކެއް ކުރަމުންދާތަން ނުފެންނަކަމަށް ވިޔަފާރިވެރިން ފާހަގަކުރެއެވެ. މިފަދަ ވިޔާފަރިތަކުން ކުރާ ސަރުކާރުގެ މަސައްކަތްތަކަށް ފައިސާލިބުން އެތައްދުވަހެއް ލަސްވެވެގެން ދިއުމަކީ އާންމު ނިކަމެތި ކަންމަތީ މީހުންގެ ވިޔާފާރި ބަނގުރޫޓްކުރުވަން ސަރުކާރުން ކުރާ ކަމެއް ކަމަށް މިފަދަ ވިޔަފާރިކުރާ ފަރާތްތަކުން ދެކެވެ. އެހެނީ ސަރުކާރުން އެފަދަ ފަރާތްތަކުން ކުރާ މަސައްކަތަށް ފައިސާ ނުދޭނަމަ، މުވައްޒަފުންގެ މުސާރަ ދިނުމާއި، ދުވަހުން ދުވަހަށް ކުރަން ޖެހޭ ޚަރަދުތައް ކުރުމަށް އުނދަގޫވާނެއެވެ. މީގެތެރޭގައި ވިސާފީއާއި އިންޝުއަރެންސް ފީވެސް ހިމެނޭކަން ފާހަގަކުރަމެވެ.
އިކޮނޮމިކް މިނިސްޓްރީއާއި ފިނޭންސް މިނިސްޓްރީން މިކަމާ ގުޅޭގޮތުން ދެއްވި މަޢުލޫމާތުގައި، ކުދި އަދި މެދު ފަންތީގެ ވިޔަފާރިތަކަށް އެހީތެރިވުމަށް ގިނަ މަސައްކަތްތަކެއް ކުރަމުންދާކަމަށް ވިދާޅުވެއެވެ. ނަމަވެސް، މި މަސައްކަތްތަކުގެ ނަތީޖާ ފެންނަން އަދި ވަގުތު ބޭނުންވާ ކަމަށްވެސް އެ ފަރާތްތަކުން ފާހަގަކުރެއްވިއެވެ.
ޕްރައިވެޓް ސެކްޓަރ ފުންޑިގެން ދިއުމަކީ ޤައުމުގެ އިޤްތިޞާދަށް ލިބޭނެ ވަރަށް ބޮޑު ގެއްލުމެއްކަމަށް އިޤްތިޞާދީ މާހިރުން ފާހަގަކުރެއެވެ. ޤައުމުގެ އިޤުތިޞާދު ރަގަޅުކުރަން ވިސްނާނަމަ ސަރުކާރުން ޖެހޭނީ ފުރަތަ ޚާއްސަ ފިޔަވަޅެއްގެ ގޮތުގައި ކުދި އަދި މެދު ފަންތީގެ ވިޔާފާރިތަކަށް ޚާއްސަ ސްޓިމިއުލަސް ޕެކެޖްތަކެއް ތަޢާރަފްކޮށް އެމީހުން ހަލާކުވެގެން ދިއުން ހުއްޓުވާށެވެ. 2019 ގައި މުޅި ދުނިޔެއަށް ކުރިމަތިވި ކޮވިޑްގެ އާލަމީ ވަބާއިން ގެއްލުންވެން ދިޔައީ ހަމައެކަނި ބޮޑެތި ވިޔަފާރިއަށް ކަމަށް ދެކި އެފަރާތްތަކުން ސަރުކާރަށް ދައްކަންޖެހޭ ޖޫރިމައިނާތައް މާއާފްކުރި ގޮތަށް ކުދި އަދި މެދުފަންތީގެ ވިޔަފަރިތަކަށް ދެވުނު ލުޔަކީ ނުވަތަ ފޯރުވާލަދިން އެހީއަކީ ކޮބާތޯއެވެ؟ އެހެންކަމުން، ކުދި އަދި މެދު ފަންތީގެ ވިޔަފާރިތަކަށް އިތުރު އަހައްމިއްޔަތުކަމެއް ދީ، އެ ދާއިރާ ކުރިއެރުވުމަށް ސަރުކާރުން އަވަސް ފިޔަވަޅުތަކެއް އަޅާ ނުލާ ދޫކޮށްލައިފިނަމަ ޤައުމުގެ ގިނަ ބަޔަކު އިޤުތީޞާދީ ޚާއްސަ ހާލަތްތަކާއި ކުރިމަތިވެ އެކަމުގެ ދަތިކަން މުޅި ގައުމަށް ފޯރުމަކީ ވަރަށް ގާތްކަމެކެވެ. އަދި މިކަން ހައްލުކުރަން ފިޔަވަޅު ނާޅާ ލަސްވާ ކޮންމެ ދުވަހަކީ އިތުރަށް ކުދި އަދި މެދުފަންތީގެ ވިޔާފާރީތައް ފުނޑި ބަނގުރޫޓު ވުމުގެ އިތުރުން ބޮޑެތި ވިޔަފާރިތަކަށް ވެސް ގެއްލުން ކުރިމަތި ކުރާނެ ކަމެކެވެ. އެހެނީ ބޮޑެތި ވިޔަފާރިތައް ދެމެހެއްޓޭނީ ކުދި ވިޔާފާރިތައް ވުޖޫދުގައި ދެމި ތިބެގެން ކަމަށް ވާތީ އެވެ.
Leave a Reply