މަގު ހެދުމަށް ދައުލަތުން ބޮޑު ހޭދައެއް ކުރަނީ ހަމައެކަނި ރޭސިންއަށް ބޭނުންކުރާ މަގުތަކަށް ނޫން ކަމަށް ކޮމިޝަނާ އޮފް ޕޮލިސް އަލީ ޝުޖާއު މިއަދު ވިދާޅުވެއްޖެ އެވެ.
ފުވައްމުލަކު ސްކޫލުގެ ދަރިވަރުންނަށް އަމާޒުކޮށްގެން ބޭއްވި 100 ވަނަ ޓްރެފިކް މޮނިޓަރިން ޓްރެއިނިން ނިންމުމުގެ ރަސްމިއްޔާތުގައި ޝުޖާއު ވިދާޅުވީ މަގުމަތީގެ އެކްސިޑެންޓްތައް މަދުކުރެވޭނީ ގާނޫނާއި ގަވައިދުތަކަށް އެންމެން ބޯލަނބައިގެން ކަމަށެވެ.
ޝުޖާއު ވިދާޅުވީ މަދު ބައެއްގެ އަމަލުތަކުގެ ސަބަބުން ގާނޫނުތަކާއި ގަވާއިދުތަކަށް ބޯލަނބާ މީހުންނަށް ވެސް މިހާރު ނުރައްކާތައް ކުރިމަތިވަމުންދާ ކަމަށެވެ.
އޭނާ ވިދާޅުވީ މަގުމަތީގެ ސަލާމަތާއި ރައްކާތެރިކަން ކަށަވަރު ކުރެވޭނީ ޑްރައިވަރުން ބާރު ސްޕީޑުގައި ދުއްވުމާއި ފަރުވާކުޑަކޮށް ދުއްވުމުން ދުރުހެލިވެގެން ކަމަށެވެ.
“އަޅުގަނޑު ގަބޫލުކުރާ ގޮތުގައި މި ކުދިން ބޮޑުވުމުން ޓްރެފިކް ފުލުހަކު ނުފެނުނު ކަމުގައި ވިޔަސް ގާނޫނުތަކާއި ގަވާއިދުތަކަށް ބޯލަނބާނެ. ނަތީޖާއަކަށް ވާނީ އެކްސިޑެންޓްތައް މަދުވެ، އަނިޔާ ލިބޭ މީހުން ވަރަށް ބޮޑަށް މަދުވުން،” ޝުޖާއު ވިދާޅުވި އެވެ.
ޝުޖާއު ވިދާޅުވީ މި ވޯކްޝޮޕްގެ މައިގަނޑު މަގުސަދަކީ ޓްރެފިކް ގައިޑްލައިންތަކަށް އިހުތިރާމް ކުރާ ޖީލެއް ބިނާކުރުން ކަމަށެވެ.
Leave a Reply