ބަނގުލަދޭޝްގެ ބޮޑުވަޒީރު ކަމަކީ ދުވަހަކުވެސް ދެކުނު ހުވަފެނެއްވެސް ނޫން ކަމަށް ވަގުތީ ގޮތުން ބަނގުލަދޭޝް ސަރުކާރު އެކުލަވާލުމަށް ޙަވާލުވެފައިވާ ޕްރޮފެސަރ މުޙަންމަދު ޔޫނުސް ވިދާޅުވެއްޖެއެވެ. އޭނާ މިހެން ވިދާޅުވީ ޖަމޫނާ ސްޓޭޓް ހައުސްގައި ނޫސްވެރިންނާ ވާހަކަފުޅު ދައްކަވަމުންނެވެ. ޕރ ޔޫނުސް ވިދާޅުވި ގޮތުގައި އެދުވަހު (ޝައިޚް ޙަސީނާ އިސްތިއުފާ ދެއްވި ދުވަހު) ލިބުނީ ދަރިވަރެއްގެ ފޯނު ކޯލެއް ކަމަށާއި އެފޯނަށް ވަގުތުން ޖަވާބު ދޭން ޖެހުނު ކަމަށެވެ. ކޮށްދެވެން އޮތް ކަމެއް ކޮށްދޭނެ ކަމަށް އެދުވަހު ދެންނެވި ކަމަށް އުމުރުފުޅުން 84ގެ ޕރ ޔޫނުސް ވިދާޅުވިއެވެ. ޕރ ޔޫނުސް ވިދާޅުވީ ” އަޅުގަނޑު މިކަން މިކުރަނީ ޒުވާނުން ބޭނުންވި ކަމެއް ކަމަށް ވާތީ، އަދި އެކަން ކުރުމަށް އެހީތެރިވާން ބޭނުންވި” ކަމަކަށް ވާތީއެވެ. އިތުރަށް ޕްރޮފެސަރ ޔޫނުސް ވިދާޅުވި މިއީ އޭނާގެ ހުވަފެނެއް ނޫން ކަމަށާއި އެއީ އެމީހުން (ޒުވާނުން)ގެ ހުވަފެނެއް ހަޤީޤަތަކަށް ހަދައި ދިނުމަށް މަސައްކަތް ކުރާނީ ކަމަށެވެ. ޕރ ޔޫނުސް ވިދާޅުވި ގޮތުގައި އެންމެ ކަންބޮޑުވަނީ މިހަމަ ނުޖެހުމުގެ ތެރޭގައި 400 މީހުން ދުނިޔެ ދޫކޮށް ދިއުމާއި އެތައް ޕޮލިސް ސްޓޭޝަނަކާ އާއްމުންގެ އެތައްތަނެއް އަނދާ ހުލިވެފައި ވާތީ ކަމަށެވެ.
Leave a Reply