މިހާރު ކުރަމުންދާ ވިއްސާރައިގެ ސަބަބުން މިއަދު ތިލަދުންމަތީ ދެކުނުބުރީ ނާވައިދޫން ރުކެއް ވެއްޓި ފުރާޅުގައި ޖެހި ފުރާޅަށް ގެއްލުންތަކެއް ލިބިއްޖެ ކަމަށް ނާވައިދޫ ކައުންސިލްގެ ރައީސް ޢަލީ ރަޝީދު ވިދާޅުވެއްޖެއެވެ. “ކިޔާލާ ” ނޫހަށް މަޢުލޫމާތު ދެއްވަމުން ރައީސް ޢަލީ ރަޝީދު ވިދާޅުވީ އެގެއަކީ މީހަކު ދިރިއުޅޭ ގެއެއް ނޫން ކަމަށާއި، މިހާދިޘާގެ ސަބަބުން އެއްވެސް މީހަކަށް ގެއްލުމެއް ލިބިފައި ނުވާ ކަމަށެވެ. ކުރިއަށް 24ގަޑިއިރު ވެސް ވިއްސާރަ ކުރާނެ ކަމަށް މޫސުމާ ބެހޭ އިދާރާއިން ލަފާ ކޮށްފައި ވާތީ ރައްޔިތުން ރައްކާތެރިވެ ތިއްބެވުމަށާއި ކޮންމެހެން ކުރަން ޖެހޭ ދަތުރެއް ފިޔަވާ އިތުރު ދަތުރެއް ނުކުރެއްވުމަށާއި ދަތުރެއް ކުރައްވާ ނަމަ ފުރިހަމަ މައުލޫމާތު ޙިއްސާ ކުރުމަށް ކައުންސިލުން އެދި ލައްވައެވެ.
ކުރިއަށް އޮތް 24ގަޑިއިރުވެސް ރާއްޖޭގެ ބޮޑުބަޔަކަށް ބޯކޮށް ވާރެވޭނެ ކަމަށާއި ކަނޑުތައް ގަދަވެ ވައި ގަދަވާނެ ކަމަށް ޤައުމީ މޫސުމާ ބެހޭ އިދާރާއިން ލަފާ ކުރައްވައެވެ. މިރޭ 9.00ން ފެށިގެން ހއ އަތޮޅާއި ލއަތޮޅާ ދެމެދު ވަނީ ރީނދޫ ސަމާލު ވެސް ނެރެފައިވާ ކަން ފާހަގަ ކޮށްލެވެއެވެ.
މިހާރު ކުރަމުން ދާ ވިއްސާރައާއި ގުޅިގެން މާދަމާ އަކީ ސަރުކާރު ބަންދު ދުވަހެއް ކަމުގައި ރައީސުލް ޖުމުހޫރިއްޔާ ކަނޑައަޅުއްވާފައި ވެއެވެ.
Leave a Reply