މާލެ ސަރަޙައްދުގައި ޤަވާއިދާ ޚިލާފަށް ވިޔަފާރިކޮށް ސައްޙަ ވިސާއެއް ނެތި އުޅެމުންދާ ބިދޭސީން ބަލައި ފާސްކުރުމަށް ޚާއްޞަ ހަރަކާތެއް މޯލްޑިވްސް އިމެގްރޭޝަން އިން މިއަދު ފަށައިފިއެވެ. 52 ގްރޫޕަކަށް ބަހާލައިގެން ކުރިއަށްގެންދާ މިހަރަކާތުގައި 211އޮފިސަރުން ބައިވެރިވެއެވެ. މާލެ ސަރަޙައްދު 26ޒޯނަކަށް ބަހާލައިގެން ފާސްކުރުމަށް ހަމަޖެހިފައި ވެއެވެ. މިޚާއްޞަ ޙަރަކާތުގެ ބޭނުމަކީ މާލެ ސަރަހައްދުގައި ޤަވާއިދާ ޚިލާފަށް ކުދި ކުދި މެދު ފަންތީގެ ވިޔަފާރި ކުރަމުން އަންނަ ބިދޭސީން ދެނެގަތުމުގެ އިތުރުން އެފަރާތްތަކަށް އިމްގްރޭޝަނަށް އެންގުމަށާއި ޤަވާއިދާ ޚިލާފަށް އުޅޭ ބިދޭސީން ލައްވާ މަސައްކަތް ކުރުވާ ދިވެހިންނަށް ލިޔުމުން ނަޞޭހަތް ދިނުމެވެ. މިހަރަކާތުގެ ސަބަބުން މާލެ ޞަރަޙައްދުގައި ޤަވާއިދާ ޚިލާފަށް އުޅޭ ބިދޭސީން ބެހޭ މަޢުލޫމާތު ދެނެގަނެވޭނެ ކަމަށް އިމްގެރޭޝަނުން ފާހަގަ ކުރެވެއެވެ.
ޤަވާއިދާ ޚިލާފަށް އުޅޭ ބިދޭސީންގެ މައްސަލަ ޙައްލު ކުރުމަށްޓަކައި މިއަހަރު ސަރުކާރުގެ ފަރާތުން ފައްޓަވާފައިވާ ޙަރަކާތުގެ ސަބަބުން ގިނަ އަދަދެއްގެ ބަޔަކު މިއަހަރު ޑީޕޯޓް ކޮށްފައިވާ ކަން ފާހަގަ ކުރެވެއެވެ. މިމައްސަލަ 5އަހަރު ދުވަހުގެ ތެރޭގައި މުޅިން ޙައްލު ކުރައްވާނެ ކަމަށް ސަރުކާރުން ފާހަގަ ކުރައްވައެވެ. އިބްރާހީމް މުޙަންމަދު ޞާލިޙްގެ ސަރުކާރުން ވެސް މިކަން ޙައްލު ކުރުމަށް އެދުވަސް ވަރު މަސައްކަތްތަކެއް ކުރެއްވިއެވެ. ނަމަވެސް ދައުރު ހަމަވިއިރު މައްސަލަ ޙައްލު ވެފައި ނުވާކަން ފާހަގަ ކުރެވެއެވެ.
Leave a Reply