އިރާނުގައި މަރުގެ ހުކުމް ތަންފީޒުކުރާ މިންވަރު މިދިޔަ މަހު ކުއްލިއަކަށް އިތުރުވެ، މި އަހަރުގެ މިހާތަނަށް މަރާލި މީހުންގެ އަދަދު 400 އަށް ވުރެ މައްޗަށް އަރާފައިވާ ކަމަށް ބުނެ އދ.ގެ ކަމާގުޅޭ ތަޖުރިބާކާރުން ކަންބޮޑުވުން ފާޅުކޮށްފިއެވެ.
އެގާރަ މެމްބަރުންގެ މައްޗަށް އެކުލެވޭ އދ.ގެ ތަޖުރިބާކާރުންގެ ޓީމަކުން ނެރުނު ބަޔާނެއްގައި ބުނެފައިވަނީ، މިދިޔަ މަހު އެކަނި 81 މީހަކަށް މަރުގެ ހުކުމް ތަންފީޒުކޮށްފައިވާ ކަމަށެވެ. އަދި މި އަހަރުގެ މިހާތަނަށް މަރުގެ ހުކުމް ތަންފީޒުކޮށްފައިވާ މީހުންގެ އަދަދު 400 އަށް ވުރެ މައްޗަށް އަރާފައިވާ އިރު، އޭގެ ތެރޭގައި 15 އަންހެނަކު ހިމެނޭ ކަމަށް ވެސް އެ ބަޔާނުގައި ފާހަގަކޮށްފައިވެއެވެ.
އދ.ގެ އިންސާނީ ހައްގުތަކާބެހޭ ކައުންސިލަށް ނިސްބަތްވާ ތަޖުރިބާކާރުންގެ ޓީމުން ބުނެފައިވަނީ، ”މަރުގެ ހުކުމް ތަންފީޒުކޮށް، މަރާލި މީހުންގެ އަދަދު މި މިންވަރަށް އިތުރުވުމަކީ ވަރަށް ބޮޑު ކަންބޮޑުވުމެއް“ ކަމަށެވެ.
މީގެ އިތުރުން، މިދިޔަ މަހު މަރުގެ ހުކުމް ތަންފީޒުކުރި މީހުންގެ ތެރެއިން 41 މީހަކު މަރާލާފައިވަނީ މަސްތުވާތަކެއްޗާ ގުޅޭ ހުކުމްތަކުގައި ކަމަށާއި އެއީ ބައިނަލްއަގުވާމީ ގާނޫނުތަކާ މުޅިން ހިލާފު ކަމެއް ކަމަށް ވެސް އެ ބަޔާނުގައި ބުނެފައިވެއެވެ.
އދ.ގެ ތަޖުރިބާކާރުންގެ ޓީމުން ފާހަގަކޮށްފައިވާ ގޮތުގައި، ޝަރީއަތްތަކުގެ އިންސާފުވެރިކަމާ މެދު ސުވާލު އުފެދޭ އިރު، މަރުގެ ހުކުމް ތަންފީޒުކޮށްފައިވާ މީހުންގެ ތެރޭގައި މައުސޫމް މީހުން ވެސް ހިމެނޭ ކަމަށް ބެލެވެއެވެ. އެހެންކަމުން، މަރުގެ ހުކުމް ތަންފީޒު ނުކުރުމަށް ތަޖުރިބާކާރުންގެ އެ ޓީމުން ވަނީ އިރާނަށް ގޮވާލައިފައެވެ.
Leave a Reply