ކިޑްނީ ފެއިލްވުމުގެ ސަބަބުން ފަރުވާއަށް ބޭނުންވާ މާލީ އެހީތެރިކަމަށް އެދިފައިވާ، ރާއްޖެއާއި ބައިނަލްއަޤްވާމީ މައިދާނުގައި އެންމެ ފާހަގަކޮށްލެވޭ ދިވެހި ބޮޑީބިލްޑަރުންގެ ތެރެއިން އެކަކު ކަމަށްވާ މުޙައްމަދު ޔާމީން (ޔާންބެ) އަށް، އިއްޔެ ރޭ ޓިކްޓޮކްގައި ބޭއްވުނު ލައިވް ސްޓްރީމިންގ އިވެންޓެއްގައި ދެ ލައްކަ ރުފިޔާއަށްވުރެ އިތުރު އަދަދެއްގެ އެހީ ލިބިފައިވެއެވެ.
ގާތްގަނޑަކަށް އެއް ގަޑިއިރު ދެމިގެންދިޔަ މި އިވެންޓުގައި 210,000 ރުފިޔާއާއި 1,300 އެމެރިކާ ޑޮލަރު ހޯދައިފައިވެއެވެ. މިއީ ޓިކްޓޮކް މެދުވެރިކޮށް މިފަދަ ބޭނުމަކަށް ކުރިއަށްގެންދެވުނު އެންމެ ކާމިޔާބު ފަންޑްރެއިޒިންގ އިވެންޓުތަކުގެ ތެރެއިން އެކެއް ކަމުގައި ބެލެވެއެވެ.
މިހާރުގެ މިސްޓަރ މޯލްޑިވްސްގެ މަޤާމު ފުރަމުންދާ އަދި އެ މަޤާމު ހަތަރު ފަހަރު ހާސިލުކޮށްފައިވާ ޔާންބެ ވިދާޅުވި ގޮތުގައި، ކިޑްނީ ބަލީގެ އެންމެ ފަހު މަރުޙަލާގައި އޭނާ ހުރިކަން އެނގުނީ މީގެ މަހެއްހާ ދުވަސް ކުރިން ކަމަށާއި، ޑޮކްޓަރުންގެ ލަފާގައި ވަނީ ކިޑްނީ ޓްރާންސްޕްލާންޓް ހެދުމަށެވެ.
”ޑޮކްޓަރުންގެ ބަސްފުޅުގައި، މިހާރު އަޅުގަނޑު މިހުރީ ފަސްވަނަ ސްޓޭޖުގައި. އެއީ މި ބަލީގެ އެންމެ ފަހު މަރުޙަލާ. މިއީ އަނބުރާ ރަނގަޅުކުރެވޭނެ ބައްޔެއް ނޫން. މިވަގުތު ކުޅިވަރުގެ ދާއިރާއިން އެއްކޮށް ދުރުގައި މިހުރީ. މިހާރު އަޅުގަނޑުގެ މައިގަނޑު އަމާޒަކީ މި ހާލަތުން އަރައިގަތުން،“ ޔާންބެ ވިދާޅުވިއެވެ.
ޓްރާންސްޕްލާންޓް ހެދުމާއި އެހެނިހެން ފަރުވާގެ ޚަރަދުތަކަށް ބޮޑު އަދަދެއްގެ ފައިސާ ބޭނުންވާނެތީ، ޔާންބެގެ އުފަން ރަށް ކަމުގައިވާ ށ. ފުނަދޫގެ ރައްޔިތުން ވެސް ވަނީ ފަންޑް ހޯދުމުގެ މަސައްކަތް ފަށައިފައެވެ.
ޔާންބެ އެންމެ ފުރަތަމަ މިސްޓަރ މޯލްޑިވްސްގެ މަޤާމު ހާސިލުކުރެއްވީ 2017 ވަނަ އަހަރުއެވެ. އޭގެ ފަހުން 2021، 2022، އަދި 2023 ވަނަ އަހަރުތަކުގައި ވެސް މި މަޤާމު ހޯއްދަވައި، ޖުމުލަ ހަތަރު ފަހަރު މި ޝަރަފުވެރި މަޤާމު ކާމިޔާބުކުރައްވާފައިވެއެވެ. މީގެ އިތުރުން، އޭނާ ވަނީ ބައިނަލްއަޤްވާމީ ފެންވަރުގައި ވެސް ފާހަގަކޮށްލެވޭ ކާމިޔާބީތަކެއް ހޯއްދަވާފައެވެ.
Leave a Reply