މޯލްޑިވްސް އިމިގްރޭޝަނުން ބުނީ އެ މީހުންގެ ނަމުގައި ވަޓްސްއެޕް މެދުވެރިކޮށް ސްކޭމް ކޯލްތައް ކުރަމުން ދަނީ މީހުންގެ ފޭސް އައިޑީ ތައް އަތުލުމަށް އަމާޒުކޮށްގެން ކަމަށެވެ.
އިމިގްރޭޝަނުން މިއަދު ބުނީ މޯލްޑިވްސް އިމިގްރޭޝަނަށް ނިސްބަތްވާ ކަމަށް ބުނެ ބައިނަލްއަގުވާމީ ނަމްބަރަކުން ވަޓްސްއެޕް މެދުވެރިކޮށް ވީޑިއޯ ކޯލް ކުރަމުން އަންނަ ކަމަށެވެ. މި ކޯލްތަކަކީ އިމިގްރޭޝަންގެ ޔުނީފޯމާ އެއްގޮތް ކަމަށް ފެންނަ ގޮތަށް ހެދުން އަޅައިގެން ތިބި މީހުންނާއި މާސްކު އަޅައިގެން ތިބޭ މީހުން ކަމަށް އެ މީހުން ބުނެ އެވެ.
އިމިގްރޭޝަނުން ބުނީ ކޯލްކުރާ ފަރާތްތަކުގެ ކައުންޓަރުގެ ފަހަތުގައި އިމިގްރޭޝަން ބެކްޑްރޮޕް ވެސް ހުންނަ ކަމަށާއި އެ ކައުންޓަރުން ކޯލްތަކުގައި ހާޒިރުވާ ކަމަށެވެ.
“އިމިގްރޭޝަން އޮފިސަރުން އެކަން ނުކުރާކަމުގެ ޔަގީންކަން އަރުވަން. މިފަދަ ސްކޭމް ކޯލްތަކަށް ހޭލުންތެރިވުމަށް އިލްތިމާސްކުރަން،” އިމިގްރޭޝަނުން އެކްސްގައި ކުރި ޕޯސްޓެއްގައި ބުނެފައިވެ އެވެ.
އެ މީހުން ބުނީ އެ ކޯލްތައް ކުރަނީ ޕާކިސްތާނުގެ ފޯން ނަމްބަރެއް ކަމަށްވާ +92348107783 އިން ކަމަށެވެ. އެ ކޯލްތަކުގައި ހިޔާނާތްތެރިން އެދެނީ އައިޑެންޓިޓީ ކާޑުގެ ތަފްސީލާއި ބޭންކް އޮފް މޯލްޑިވްސްގެ ކާޑުގެ ތަފްސީލެވެ.
އެ ނަންބަރުތަކުން އާންމުންނަށް ގުޅައި އެމީހުންގެ ޒާތީ މައުލޫމާތާއި ބޭންކު ކާޑުގެ މައުލޫމާތު ހޯދަމުންދާ ކަމަށް ވެސް އިމިގްރޭޝަނުން ބުންޏެވެ.
Leave a Reply