ޕާކިސްތާނުގެ ފޮރިން މިނިސްޓްރީން ހޯމަ ދުވަހު ނެރުނު ބަޔާނެއްގައި ބުނެފައިވަނީ، އީރާނުގެ ބަނދަރުތަކަށް އެމެރިކާއިން ކުރިމަތިކޮށްފައިވާ ދަތިކުރުމުގެ ފިޔަވަޅުތަކަށް އަމަލުނުކުރި ކަމަށް ބުނެ އެމެރިކާގެ ބާރުގެ ދަށަށް ގެނައި ‘އެމް.ވީ ޓޫސްކާ’ ނަމަކަށް ކިޔާ އީރާނުގެ މުދާ އުފުލާ ބޯޓުން ހިފެހެއްޓި 22 ފަޅުވެރިން މިހާރު ޕާކިސްތާނަށް ގެނެސްފައިވާ ކަމަށެވެ. މިއީ ދެގައުމުގެ ދެމެދުގައި އިތުބާރު ގާއިމުކުރުމުގެ ގޮތުން އެމެރިކާއިން އެޅި ފިޔަވަޅެއް ކަމަށްވެސް އެ ބަޔާނުގައިވެއެވެ.
މި މީހުން އާދީއްތަ ދުވަހުގެ ރޭ ވައިގެ މަގުން ޕާކިސްތާނަށް ގެނެސްފައިވާއިރު، މިއަދުގެ ވަގުތެއްގައި އެމީހުން އީރާނުގެ ކަމާބެހޭ ފަރާތްތަކާ ހަވާލުކުރާނެ ކަމަށް ޕާކިސްތާނުން ބުނެއެވެ.
މީގެ އިތުރުން، ބޯޓަށް ބޭނުންވާ މަރާމާތުތައް ކުރުމަށްފަހު، އޭގެ އަސްލު ވެރިފަރާތާ ހަވާލުކުރުމަށްޓަކައި ޕާކިސްތާނުގެ ކަނޑުގެ ސަރަހައްދަށް ބޯޓު ގެނައުމަށް ހަމަޖެހިފައިވާ ކަމަށްވެސް އިސްލާމްއާބާދުން ހާމަކުރެއެވެ. މި ކަންކަން ކުރިއަށްދަނީ އީރާނާއި އެމެރިކާގެ އެއްބާރުލުމާއެކުގައެވެ.
ޕާކިސްތާނުގެ ފޮރިން މިނިސްޓްރީގެ ބަޔާނުގައި އިތުރަށް ބުނެފައިވަނީ، މިފަދަ އިތުބާރު އުފެއްދުމުގެ ފިޔަވަޅުތަކަށް އެގައުމުން މަރުހަބާ ކިޔާ ކަމަށާއި، ސަރަހައްދީ ސުލްހައާއި އަމާންކަން ދެމެހެއްޓުމަށްޓަކައި ކުރެވޭ މެދުވެރިއެއްގެ ދައުރު އަދާކުރުމާއި ހާރިޖީ މަސައްކަތްތަކުގައި އެގައުމުން ދެމިއޮންނާނެ ކަމަށެވެ.
އެމެރިކާގެ އޭބީސީ ނިއުސްއިން ރިޕޯޓްކޮށްފައިވާ ގޮތުގައި، ފަޅުވެރިން ބަދަލުކުރުމުގެ މި މަސައްކަތުގައި އެމެރިކާގެ ސެންޓްރަލް ކޮމާންޑުން (ސެންޓްކޮމް) ވަނީ އެހީތެރިވެދީފައެވެ. ސެންޓްކޮމްގެ ތަރުޖަމާނު ކެޕްޓަން ޓިމް ހޯކިންސްއާ ހަވާލާދީ އެ ނޫހުން ބުނެފައިވަނީ، އެމް.ވީ ޓޫސްކާގެ 22 ފަޅުވެރިން ޕާކިސްތާނަށް ބަދަލުކުރުމުގެ މަސައްކަތް އެމެރިކާގެ އަސްކަރިއްޔާއިން މިހާރު ނިންމާލާފައިވާ ކަމަށެވެ.
މީގެ އިތުރުން، މިދިޔަ ހަފުތާގައި ބޯޓުގައި ތިބި އެހެން 6 ފަސިންޖަރަކުވެސް އެނބުރި ގައުމަށް ފޮނުވާލުމަށްޓަކައި ސަރަހައްދީ އެހެން ގައުމަކަށް ބަދަލުކޮށްފައިވާ ކަމަށް އޭނާ ވިދާޅުވިއެވެ. އީރާނުގެ ދައުލަތުގެ މީޑިއާތަކުން ރިޕޯޓްކޮށްފައިވާ ގޮތުގައި، އެ 6 މީހުންނަކީ ބޯޓުގެ ބައެއް ފަޅުވެރިންގެ އާއިލާގެ މީހުންނެވެ.
Leave a Reply