ބައިނަލްއަގުވާމީ މައިދާނުގައި ފާހަގަކޮށްލެވޭ ފަދަ ކުރިއެރުމެއް ހޯދަމުން، މަޝްހޫރު ފިލްމު އުފެއްދުންތެރިޔާ ކަރަން ޖޯހަރް، މެއި މަހުގެ 5 ވީ އަންގާރަ ދުވަހު ބޭއްވި އަހަރީ ‘މެޓް ގާލާ’ ގައި ފުރަތަމަ ފަހަރަށް ބައިވެރިވެއްޖެއެވެ. އޭނާ ރެޑް ކާޕެޓުން ފެނިގެންދިޔައީ ރާޖާ ރަވީ ވަރުމާގެ ކުރެހުންތަކުން އިންސްޕިރޭޝަން ހޯދައިގެން މެނިޝް މަލްހޯތުރާ ފަރުމާކޮށްފައިވާ ހެދުމެއްގައެވެ. ޝާހީ ފާޑުވެރިކަމާއި ޒަމާނީ ގޮތްތައް އެކުލެވޭ މި ހެދުމާއެކު، ކަރަން ވަނީ ދުނިޔޭގެ އެންމެ ޝަރަފުވެރި އަދި ވިދުންގަދަ ފެޝަން އިވެންޓުގައި އޭނާއަށް ޚާއްސަވެފައިވާ ތަފާތު ސްޓައިލާއި ޝަޚުސިއްޔަތު ދައްކާލައި އެންމެންގެ ސަމާލުކަން ހޯދާފައެވެ.
ކަރަން ޖޯހަރް މެޓް ގާލާގައި ބައިވެރިމިވީ، އޭނާގެ ގާތް އެކުވެރިޔާ އަދި ބޮލީވުޑްގެ ސުޕަސްޓާ ޝާހްރުކް ޚާން 2025 ވަނަ އަހަރު މި އިވެންޓުގައި ބައިވެރިވިތާ އެއް އަހަރު ފަހުންނެވެ. ނިއުޔޯކްގެ މެޓްރޯޕޮލިޓަން މިއުޒިއަމް އޮފް އާޓްގައި ބޭއްވި މިއަހަރުގެ ހަފުލާގައި ‘ކިންގް ޚާން’ ބައިވެރިނުވި ނަމަވެސް، ކަރަން ވަނީ ޝާހްރުކްގެ މުހިންމުކަމާއި އޭނާގެ ދިރިއުޅުމަށް ކުރި އަސަރުތަކުގެ ވާހަކަ ހިއްސާކޮށް، އެ ހަފުލާގައި ޝާހްރުކްގެ ހަނދާންތައް އާކޮށްދީފައެވެ.
އޭނާގެ ކެރިއަރު ބައްޓަންކުރުމުގައި ޝާހްރުކް ޚާން އަދާކޮށްފައިވަނީ ނުހަނު ބޮޑު ދައުރެއްކަން ފާހަގަކުރަމުން ކަރަން ބުނީ، ޝާހްރުކްގެ ފިޔަވަޅުމަތިން ހިނގައި މެޓް ގާލާއަށް އައުމަކީ އޭނާއަށް ލިބުނު ވަރަށް އަސަރުގަދަ ތަޖުރިބާއެއް ކަމަށެވެ. ބީބީސީ ނިއުސްއަށް ދިން އިންޓަވިއުއެއްގައި ކަރަން ބުނީ، “މިއީ އަހަރެންނަށް ވަރަށް އަސަރުގަދަ ވަގުތެއް. އަހަރެންގެ ފިލްމީ ދަތުރުގެ ވަރަށް ބޮޑު ބައެއް ހިއްސާކުރަނީ ޝާހްރުކް. އަހަރެންގެ ފުރަތަމަ ފަސް ފިލްމު އުފެއްދީ އޭނާއާއެކު. މިއަދު އަހަރެން މިހުރި މަގާމަށް އާދެވުނު ސަބަބަކީ އޭނާ. އެހެންކަމުން މިދިޔަ އަހަރު އޭނާ އަދި މިއަހަރު އަހަރެން މިތަނަށް އައުމުން، ދިރިއުޅުމުގެ ބައެއް ފުރިހަމަވެއްޖެ ކަމުގެ އިހުސާސް ކުރެވޭ،” ކަމަށެވެ.
ކަރަން ޖޯހަރް، ޝާހްރުކް އަދި އަދިތްޔާ ޗޯޕްޅާއަކީ އޭނާގެ ‘ދިރިއުޅުމުގެ ތަނބުތައް’ ކަމަށް ސިފަކުރުން
ކަރަންއަކީ މަޝްހޫރު ޕްރޮޑިއުސަރު ޔަޝް ޖޯހަރްގެ ދަރިފުޅު ކަމަށްވީ ނަމަވެސް، އޭނާ އަބަދުވެސް ބުނަމުން އަންނަނީ ޝާހްރުކް ޚާން އަދި ފިލްމު އުފެއްދުންތެރިޔާ އަދިތްޔާ ޗޯޕްޅާއަކީ އޭނާގެ ދިރިއުޅުމުގެ “ތަނބުތައް” ކަމަށެވެ. ކަރަންގެ ކެރިއަރުގެ މިސްރާބު ބަދަލުވެގެންދިޔައީ 1995 ވަނަ އަހަރު އަދިތްޔާ ޗޯޕްޅާ ޑައިރެކްޓްކުރި ފުރަތަމަ ފިލްމު “ދިލްވާލޭ ދުލްހަނިޔާ ލޭޖާއޭންގޭ” (DDLJ) ގައި އެސިސްޓަންޓް ޑައިރެކްޓަރެއްގެ ގޮތުގައި މަސައްކަތް ކުރުމުންނެވެ. ޝާހްރުކް ޚާން އަދި ކާޖޮލް މުހިންމު ރޯލުތަކުން ފެނިގެންދިޔަ މި ފިލްމަކީ މިއަދުވެސް އިންޑިއާގެ އެންމެ މަގުބޫލު ފިލްމުތަކުގެ ތެރޭގައި ހިމެނޭ ފިލްމެކެވެ.
2024 ވަނަ އަހަރު ނިއުދިއްލީގައި ބޭއްވި ހަފުލާއެއްގައި ވާހަކަދައްކަމުން ކަރަން ބުނީ، “އަދިތްޔާ ޗޯޕްޅާ އާއި ޝާހްރުކް ޚާނާ ބައްދަލުވުމަކީ އަހަރެންގެ ނަސީބު. މިއަދު އަހަރެން މިހުރި ހިސާބަށް އާދެވުނު ދެ ސަބަބަކީ އަދި ދެ ތަނބަކީ އެއީ. އަހަރެންގެ އަމިއްލަ ނަފްސަށްވެސް ފާހަގަނުކުރެވޭ ކަންތައްތަކެއް އެމީހުން އަހަރެންގެ ކިބައިން ދެނެގަތް. އެކަމަށްޓަކައި އަބަދުވެސް އެމީހުންނަށް ޝުކުރުވެރިވާނަން. ބާރުގަދަ މަގާމުތަކުގައި ތިބި އެފަދަ ބައެއްގެ އެހީތެރިކަން ނުލިބުނު ނަމަ، ހަމައެކަނި މަސައްކަތުގެ ތެދުވެރިކަމުން މިހިސާބަށް އައުމަކީ ދަތި ކަމަކަށް ވީސް،” ކަމަށެވެ.
ފެޝަނަކީ އަހަރެންގެ ސިނަމާގެ ވަރަށް ބޮޑު ބައެއް‘
މެޓް ގާލާ 2026 ގެ ރެޑް ކާޕެޓުގައި ކަރަން ފެނިގެންދިޔައީ ކަޅު ކުލައިގެ ފުރިހަމަ ޝޭރްވާނީއަކާއި، ބިމުގައި ކޭތޭހާ ދިގު ހިތްގައިމު ކޭޕެއްގައެވެ. މި ކޭޕްގައި ރަންކުލައިގެ ފަރުމާތަކާއި، ރާޖާ ރަވީ ވަރުމާގެ ކުރެހުންތަކުން އިންސްޕިރޭޝަން ހޯދައިގެން އިންޑިއާގެ ސަގާފީ މަންޒަރުތަކާއި ގަނޑުވަރުތަކުގެ ތަސްވީރުތައް ވަރަށް ފުރިހަމައަށް ކުރަހާފައިވެއެވެ.
ފެޝަނާ ބެހޭގޮތުން ވާހަކަދައްކަމުން ކަރަން ބީބީސީއަށް ބުނީ، “ފެޝަނަކީ އަހަރެންގެ ފިލްމުތަކުގެ ވަރަށް މުހިންމު ބައެއް. އެއީ އަހަރެން ވަރަށް ކުރާހިތްވާ ކަމެއްވެސްމެ. އަހަރެން އަބަދުވެސް މަސައްކަތް ކުރަނީ ފިލްމުތަކުގެ ވާހަކައިގެ ތެރެއިންނާއި ކެރެކްޓާތަކުގެ ޒަރީއާއިން ފެޝަން ދައްކުވައިދޭން. ‘ފެޝަނަކީ އާޓް’ ނުވަތަ ފަންނުވެރިކަން ކަމަށް ކަނޑައަޅާފައިވާ މި ތީމްގެ ދަށުން، މެޓް ގާލާގައި އިންޑިއާ ތަމްސީލުކޮށްލަން ލިބުމަކީ އަހަރެން ނުހަނު އުފާކުރާ ކަމެއް،” ކަމަށެވެ.
Leave a Reply