މިއުޒިކްގެ ރަސްގެފާނު މައިކަލް ޖެކްސަންގެ ހަޔާތުގެ މައްޗަށް ބިނާކޮށް އުފައްދާފައިވާ ބައޮޕިކް “މައިކަލް” ތިއޭޓަރުތަކުގައި ދައްކަން ފެށުމާއެކު، އޭނާގެ ކުރީގެ މަޝްހޫރު ލަވަތަކާއި އަލްބަމްތައް ބިލްބޯޑް ޗާޓުތަކުގެ ކުރި ހޯދަން ފަށައިފިއެވެ.
މައިކަލް ޖެކްސަންގެ ހަޔާތުގެ ކުރީކޮޅާއި އޭނާގެ ކެރިއަރުގެ ބޮޑު ބައެއް ދައްކުވައިދޭ މި ފިލްމަކީ ދުނިޔޭގެ އެކި ކަންކޮޅުތަކުން ބައި ބިލިއަން ޑޮލަރަށް ވުރެ ބޮޑު އާމްދަނީއެއް ހޯދާފައިވާ ކާމިޔާބު ފިލްމެކެވެ. މިހާރު މި ފިލްމުގެ ކޮމާޝަލް އިމްޕެކްޓް ބޮކްސް އޮފީހަށް ވުރެ ވެސް ބޮޑަށް ފެންނަމުންދަނީ މިއުޒިކް ޗާޓުތަކުންނެވެ.
ދިޔަ ހަފުތާގައި ބިލްބޯޑް ޗާޓުތަކުން ފެނުނު ބޮޑު ކުރިއެރުމަށް ބަލާއިރު، ޖެކްސަންގެ 1982 ވަނަ އަހަރުގެ ކްލެސިކް އަލްބަމް “ތުރިލާ” ވަނީ ބިލްބޯޑް 200 އަލްބަމް ޗާޓުގެ ގަދަ ފަހެއްގެ ތެރެއިން ޖާގަ ހޯދާފައެވެ. އަދި އޭނާގެ އެންމެ ކާމިޔާބު ލަވަތައް ހިމެނޭ “ނަމްބަރު ވަންސް” ފުރަތަމަ ފަހަރަށް ގަދަ 10 އެއްގައި ހިމެނުނުއިރު، “ދަ އެސެންޝަލް މައިކަލް ޖެކްސަން” ވަނީ ޗާޓުގެ 158 ވަނައިން 88 ވަނައަށް ޖެހިލާފައެވެ. މީގެ އިތުރުން “އޮފް ދަ ވޯލް” އަދި “ޑޭންޖަރަސް” ވެސް ވަނީ އަލުން ބިލްބޯޑް 200 ޗާޓަށް ވަދެފައެވެ.
ލަވަތަކަށް ބަލާއިރު، މި ހަފުތާގައި “ބިލީ ޖީން” ވަނީ ހޮޓް 100 ސިންގަލްސް ޗާޓުގެ ގަދަ 10 އެއްގެ ތެރެއިން ޖާގަ ހޯދާފައެވެ. މިދިޔަ ހަފުތާގައި މި ލަވަ އޮތީ 38 ވަނައިގައެވެ. މީގެ އިތުރުން “ހިއުމަން ނޭޗާ”، “ބީޓް އިޓް” އަދި “ޑޯންޓް ސްޓޮޕް ޓިލް ޔޫ ގެޓް އިނަފް” މި ތިން ލަވަ ވެސް ވަނީ ޗާޓުގެ ގަދަ 50 ގެ ތެރެއަށް އަލުން ވަދެފައެވެ. ފިލްމު ރިލީޒްކުރިތާ ދެވަނަ ހަފުތާގައި މިފަދަ ބޮޑު ކުރިއެރުމެއް ލިބުމަކީ ބެލުންތެރިންގެ މެދުގައި މައިކަލްގެ މިއުޒިކަށް އޮތް ޝައުގުވެރިކަން އާވެގެން ދިޔަ ކަމެއްގެ ގޮތުގައި މިއުޒިކީ މާހިރުން ސިފަކުރެއެވެ.
އެހެނިހެން އަލްބަމްތަކުގެ ކާމިޔާބީ:
މި ހަފުތާގެ އަލްބަމް ޗާޓުގެ އެއްވަނައިގައި އޮތީ ނޯއާ ކަހާންގެ “ދަ ގްރޭޓް ޑިވައިޑް” އެވެ. މި އަލްބަމްގެ ސްޓްރީމިން ނަމްބަރުތައް 35 އިންސައްތަ ދަށަށް ދިޔަ ނަމަވެސް، އެލާ ލެންގްލީގެ “ޑަންޑެލިއަން” އަށް ވުރެ ކުރީގައި މި އަލްބަމް ވަނީ ހިފަހައްޓާފައެވެ. ތިންވަނައިގައި އޮތް ކޭސީ މުސްގްރޭވްސްގެ “މިޑްލް އޮފް ނޯވެއާ” ވަނީ 64,500 ކޮޕީ ވިކިގެން އޭނާގެ ކެރިއަރުގެ އެންމެ މޮޅު ހަފުތާ ތަޖުރިބާކޮށްފައެވެ.
ލަވަތަކުގެ ވާދަވެރިކަން:
ހޮޓް 100 ޗާޓުގެ އެއްވަނައިގައި އަދިވެސް އޮތީ އެލާ ލެންގްލީގެ “ޗޫސިން ޓެކްސަސް” އެވެ. މި ލަވަ އެއްވަނައިގައި އޮންނާތާ މިހާރު ނުވަ ހަފުތާ ވެއްޖެއެވެ. ނަމަވެސް މި ހަފުތާގައި އޮސްޓްރޭލިއާގެ ޓޭމް އިމްޕާލާގެ “ޑްރެކިއުލާ” ވަނީ 18 ވަނައިން 10 ވަނައަށް ޖެހިލާފައެވެ. މިއީ ބްލެކްޕިންކްގެ ޖެނީ ހިމެނޭ މި ލަވައިގެ ރިމިކްސްއަކާއެކު ލިބުނު ކުރިއެރުމެކެވެ. މިއީ ޓޭމް އިމްޕާލާ އާއި ޖެނީގެ ފުރަތަމަ ޓޮޕް 10 ހިޓެވެ.
މައިކަލް ޖެކްސަންގެ ބައޮޕިކްގެ މި ކާމިޔާބީއާއެކު، ކުރިއަށް އޮތް ތަނުގައި އުފައްދާ މިއުޒިކް ބައޮޕިކްތަކުން ވެސް މިފަދަ ބޮޑު ކޮމާޝަލް ކުރިއެރުމެއް ލިބޭނެ ކަމަށް ބެލެވެއެވެ.
Leave a Reply