2026 ވަނަ އަހަރުގެ ފީފާ ވޯލްޑް ކަޕް ފެށުމަށް އެންމެ ހަފްތާއެއްހާ ދުވަހަށް ވެފައިވާއިރު، މުބާރާތުގެ 104 މެޗު ކުޅޭނެ ދަނޑުތަކުގެ ފެންވަރު ހިފެހެއްޓުމަށްޓަކައި ސައިންސްވެރިން ވަނީ ފާއިތުވި ދިހަވަރަކަށް އަހަރު ބުރަ މަސައްކަތްތަކެއް ކޮށްފައެވެ. މުބާރާތުގެ ފޯރިގަދަ މެޗުތައް ކުޅޭ ޗަސްބިމަކީ (ޓާފް) ކުޅުންތެރިންގެ ކުޅުމާއި ސަލާމަތަށް ވަރަށް މުހިންމު ދައުރެއް އަދާކުރާ އެއްޗެކެވެ.
ސައިންސްވެރިން ވަނީ އެންމެ ފުރިހަމަ ޓާފް ހޯދުމަށްޓަކައި އެތައް މޭލެއްގެ ދަނޑުތަކުގައި ދިރާސާކޮށް، ގަސްތަކަށް ބޭނުންވާ ކާނާ ދީ، ކޮށައި، އަދި ބޯޅަ ބައުންސްވާ މިންވަރު ޓެސްޓްކޮށްފައެވެ. މި މަސައްކަތުގެ މައިގަނޑު ބޭނުމަކީ ކުޅުންތެރިންނަށް އެންމެ އެކަށީގެންވާ “ނެޗުރަލް ކާޕެޓެއް” ފަދަ އޮމާން ދަނޑެއް ފޯރުކޮށްދިނުމެވެ.
ދަނޑުގެ ފެންވަރުގެ މުހިންމުކަން: ކޮޕާ އެމެރިކާގެ ތަޖުރިބާ
ދަނޑުގެ ފެންވަރު ދަށްވުމުން ކުރިމަތިވާ މައްސަލަތައް 2024 ވަނަ އަހަރުގެ ކޮޕާ އެމެރިކާ މުބާރާތުން ފެނިގެންދިޔައެވެ. އާޖެންޓީނާ އާއި ކެނެޑާ ބައްދަލުކުރި މެޗުގައި، އާޖެންޓީނާގެ ތަރި އެންޖެލް ޑި މާރިއާ އަށް ލިބުނު ރަނގަޅު ފުރުސަތެއް ބޭކާރުވީ ދަނޑުގެ ފެންވަރުގެ ސަބަބުން ބޯޅަ ކޮންޓްރޯލް ކުރަން އުނދަގޫވުމުންނެވެ.
މެޗަށްފަހު އާޖެންޓީނާގެ ކޯޗާއި ކުޅުންތެރިން ވަނީ އެމެރިކާގެ އެޓްލާންޓާ ދަނޑުގެ ޝަކުވާކޮށްފައެވެ. އާންމުކޮށް އާޓިފިޝަލް ޓާފް އޮންނަ އެ ދަނޑުގައި މުބާރާތަށްޓަކައި ވަގުތީ ގުދުރަތީ ޗަސްބިމެއް ޖެހި ނަމަވެސް، ކުޅުންތެރިން ބުނީ ބޯޅަ ފުންމަނީ “ސްޕްރިންގްބޯޑެއް” ފަދައިން ކަމަށާއި އެއީ “މުސީބާތެއް” ކަމަށެވެ.
ސައިންސްވެރިންގެ ބުރަ މަސައްކަތާއި ދިރާސާ
2026 ވަނަ އަހަރުގެ ވޯލްޑް ކަޕް ބާއްވާ އެމެރިކާ، ކެނެޑާ އަދި މެކްސިކޯ އިން ބޭނުންވަނީ މިފަދަ ޝަކުވާތަކުން ދުރުހެލިވުމަށެވެ. މިކަމަށްޓަކައި ފީފާއިން ވަނީ ޔުނިވާސިޓީ އޮފް ޓެނެސީގެ ޕްރޮފެސަރު ޖޯން ސޮރޮޗަން އާއި މިޝިގަން ސްޓޭޓް ޔުނިވާސިޓީގެ ޕްރޮފެސަރު ޓްރޭ ރޮޖާސްގެ އެހީތެރިކަން ހޯދާފައެވެ.
މި ޓީމުން ވަނީ ފާއިތުވި އަށް އަހަރު ތެރޭގައި 170 އަށް ވުރެ ގިނަ ތަޖުރިބާތައް ކޮށްފައެވެ. އެމީހުން ވަނީ ތަފާތު މޫސުންތަކަށް ކެތްކުރާނެ ޗަސްބިމުގެ ބާވަތްތައް ހޯދާފައެވެ. އެގޮތުން ހޫނު ސަރަހައްދުތަކަށް “ބަރްމޫޑާ ގްރާސް” އަދި ފިނި ސަރަހައްދުތަކަށް “ކެންޓަކީ ބްލޫގްރާސް” ބޭނުންކުރުމަށް ވަނީ ނިންމާފައެވެ.
ލޮޖިސްޓިކްސް އަދި އާ އުފެއްދުންތައް
މި މުބާރާތުގެ އެންމެ ބޮޑު ގޮންޖެހުމަކީ ގިނަ ދަނޑުތަކަކީ ނިވާކޮށްފައިވާ (ޑޯމް) ދަނޑުތަކަށް ވެފައި، އިރުގެ އަލި އެކަށީގެންވާ ވަރަށް ނުލިބުމެވެ. މިކަމަށް ހައްލެއް ހޯދުމަށްޓަކައި ޒަމާނީ އެލްއީޑީ ގްރޯ ލައިޓްތައް ބޭނުންކޮށްގެން ގަސްތައް ހެއްދުމުގެ މަސައްކަތް ދަނީ ކުރަމުންނެވެ.
ވޯލްޑް ކަޕަށް ބޭނުންވާ މިލިއަނަކަށް ވުރެ ގިނަ އަކަފޫޓުގެ ޗަސްބިން އުފައްދަނީ ޚާއްޞަ ފާމްތަކުގައެވެ. މި ޗަސްބިންތައް ކަނޑައި، ރޯލްކޮށް، ފިނިކުރި ޓްރަކްތަކުގައި ދަނޑުތަކަށް އުފުލާނީ މެޗު ފެށުމުގެ އެންމެ 10 ދުވަސް ކުރިންނެވެ.
ފީފާއިން ވަނީ މި ދިރާސާތަކަށް ފަސް މިލިއަން ޑޮލަރަށް ވުރެ ގިނަ ފައިސާ ހޭދަކޮށްފައެވެ. ސައިންސްވެރިންގެ އުންމީދަކީ މި މަސައްކަތުގެ ސަބަބުން 2026 ވަނަ އަހަރުގެ ވޯލްޑް ކަޕަކީ ދަނޑުގެ ފެންވަރުގެ ގޮތުން އެންމެ ފުރިހަމަ މުބާރާތަށް ވެގެންދިއުމެވެ.
Leave a Reply