ނޫނު އަތޮޅު ފޮއްދޫ އަކީ ދިވެހިރާއްޖޭގެ ތާރީޚީ އަދި އަސާރީ ގޮތުން ފާހަގަކޮށްލެވޭ ފަދަ ގިނަ ކަންތައްތަކެއް އެކުލެވިގެންވާ ރަށެކެވެ. މި ގޮތުން ފޮއްދޫގެ ނަން އިވުމާއެކު ކޮންމެ މީހެއްގެ ހިތަށްވެސް އެންމެ ފުރަތަމަ ސިފަވެގެންދާނީ އެ ރަށުގައި ހުރި މަޝްހޫރު “ފޮއްގަސް” އެވެ. މިއީ އެ ރަށުގެ ރައްޔިތުންނަށް ވަރަށް ޚާއްޞަ، އަދި ރާއްޖޭގެ އެހެން އެއްވެސް ރަށަކުން ފެންނަން ނެތް ފަދަ ތަފާތު ގަހެކެވެ.
ފޮއްދޫގައި މި ފޮއްގަސް ހުރި ޒަމާނަކީ ރާއްޖޭގެ ރަސްރަސްކަލުންނާއި ބޮޑުން އެ ރަށަށް ޒިޔާރަތްކޮށް، މި ގަހުގެ ތަފާތުކަން ބައްލަވައި އުޅުއްވި ޒަމާނެކެވެ. މުޅި ރާއްޖޭގައި ވެސް ފޮއްދޫގައި އިން ކަހަލަ ފޮއްގަހެއް އެހެން އެއްވެސް ތަނެއްގައި ނެތުމީ، މި ގަހަށް ލިބިފައިވާ އެންމެ ބޮޑު ޝަރަފެވެ. މިކަމުގެ ސަބަބުން ފޮއްދޫއަށް ވަނީ ދިވެހި ތާރީޚުގެ ތެރެއިން ޚާއްޞަ މަޤާމެއް ލިބިފައެވެ.
ފޮއްދޫ ފޮއްގަހާ ގުޅުވައިގެން ދެކެވޭ ތުއްތުއްމަތީ ވާހަކަތަކުގެ ތެރޭގައި، މަޝްހޫރު މިސާލު ބަހެއް ވެސް އުފެދިފައިވެއެވެ. އެއީ “ފޮއްގަހަށް އެރި މީހާއަށް ވީ ގޮތް” ވުމެވެ. މި ބަހުގެ މާނައަކީ، އުސް ތަނަކަށް އެރި ގޮތަކަށް، އެ ތަނަކުން ފައިބާން ނޭނގި ހާސްވުމެވެ. މީގެ އިތުރުން، މި ގަހާ ގުޅުވައިގެން ކިޔާ އުޅޭ ހަ ބަހުގެ ރައިވަރަކީ މިއަދުގެ ކުދިންގެ ދޫމަތީގައި ވެސް ހަރުލާފައިވާ މަޝްހޫރު ރައިވަރެކެވެ. އެ ރައިވަރުގައި ބުނެފައިވެއެވެ:
“މިޔޮއް ފޮއްދޫ ގަހަކު ފޮއްގަ”
“މިޔަށް ފަހު ތިން އަހަރު ވީނަމަ”
“ރިޔަން ސަތާރަ ހަމަ ވީނަމަ”
މި ރައިވަރުން އެނގިގެންދާ ގޮތުގައި، މި ގަހުގައި އަޅާ މޭވާއަށް ކިޔަނީ “ފޮނގަ” އެވެ. އަދި އެ މޭވާ ގަހުން ނުވެއްޓި ތިން އަހަރު ދުވަހު އޮވެއްޖެ ނަމަ، އޭގެ ދިގުމިން ސަތާރަ ރިޔަނަށް އަރާނެ ކަމަށް ވެސް މި ރައިވަރުގައި ބަޔާންކޮށްފައިވެއެވެ. މިއީ މި ގަހުގެ އަޖައިބުކުރުވަނިވި ސިފައެއްގެ ގޮތުގައި ދެކެވޭ ވާހަކައެކެވެ.
ޒަމާނުއްސުރެ އަވައްޓެރި ރަށްރަށުގެ މީހުން ފޮއްދޫ މީހަކާ ބައްދަލުވެއްޖެ ނަމަ، “ފޮއްގަ ފޮއްދޫ” އޭ ކިޔައި ސަމާސާކޮށް ދިމާކޮށް ހަދައެވެ. ނަމަވެސް މިއަދު ފޮއްދޫގެ ކޮންމެ ދަރިއަކު ވެސް މިކަމާ މެދު ފަޚުރުވެރިވެއެވެ. އެއީ ފޮއްދޫ ފޮއްގަހާ ބެހޭ ގޮތުން އެތަކެއް ތާރީޚީ ވާހަކަތަކެއް ރަށުގައި ހުރުމުންނެވެ. “ފޮއްދޫ ފޮއްގަ” އޭ ބުނުމަކީ ފޮއްދޫގެ މީހުންނަށް މިއަދު ލިބޭ ބޮޑު އުފަލެކެވެ. އެއީ އެ ރަށުގެ އަމިއްލަވަންތަކަމާއި، ތާރީޚީ މުއްސަނދިކަން ރަމްޒުކޮށްދޭ އެންމެ ބޮޑު ނިޝާނަށް ވާތީއެވެ
Leave a Reply