ކެތްތެރިކަން: ދެދުނިޔޭގެ ކާމިޔާބީގެ ތަޅުދަނޑި

ކެތްތެރިކަމަކީ އިސްލާމްދީނުގެ އެންމެ މަތިވެރި ސިފަތަކުގެ ތެރޭގައި ހިމެނޭ ސިފައެކެވެ. އަދި އެއީ އީމާންކަމުގެ ދެބައިކުޅަ އެއްބައެވެ.ދިރިއުޅުމުގެ އެކި މަރުޙަލާތަކުގައި ދިމާވާ ގޮންޖެހުންތަކާއި، މުޞީބާތްތަކާއި، އަދި ހިތްނޭދޭ ކަންކަމުގައި ނަފްސު ހިފަހައްޓައި، މާތްﷲގެ މިންވަރުފުޅަށް ރުހިގެން ހުރުމަކީ ކެތްތެރިކަމުގެ އަސާސެވެ.
ކީރިތި ޤުރުއާނުގައި މާތްﷲ ވަނީ ކެތްތެރިންނަށް އިންތިހާއަށް ގިނަގުނަ ސަވާބާއި ދަރަޖަ ހުރިކަން ބަޔާންކުރައްވާފައެވެ. ސޫރަތުލް ބަޤަރާގެ 153 ވަނަ އާޔަތުގައި މާތްﷲ ވަހީކުރައްވާފައިވެއެވެ. “يَا أَيُّهَا الَّذِينَ آمَنُوا اسْتَعِينُوا بِالصَّبْرِ وَالصَّلَاةِ ۚ إِنَّ اللَّهَ مَعَ الصَّابِرِينَ” މާނައީ: “އޭ އީމާންވެއްޖެ މީސްތަކުންނޭވެ! ކެތްތެރިކަމާއި ނަމާދުން ތިޔަބައިމީހުން އެހީތެރިކަން ހޯދާށެވެ! ހަމަކަށަވަރުން، ﷲ ވޮޑިގެންވަނީ ކެތްތެރިންނާ އެކުގައެވެ.” މާތްﷲ ކެތްތެރިންނާ އެކު ވޮޑިގެންވުމަކީ އެމީހުންނަށް ލިބޭނެ އެންމެ ބޮޑު ނަޞްރާއި ހިތްހަމަޖެހުމެވެ.
ދީނީ ނަޒަރަކުން ބަލާއިރު ކެތްތެރިކަން މައިގަނޑު ތިން ބަޔަކަށް ބެހިގެންވެއެވެ:

މާތްﷲއަށް ކިޔަމަންތެރިވުމުގެ މަތީގައި ކެތްތެރިވުން: މިއީ އަޅުކަންތައް ކުރުމުގައި ދިމާވާ ދަތިތަކަށް ކެތްކޮށް، ދާއިމީގޮތެއްގައި އެކަންކަންމަތީ ސާބިތުވެ ހުރުމެވެ.
ފާފަތަކަށް އަރައިނުގަނެ ނަފްސު ހިފެހެއްޓުމުގައި ކެތްތެރިވުން: ނަފްސާނީ އެދުންތަކާއި ޝައިޠާނާގެ ވަސްވާސްތަކުން ދުރުހެލީވެ، ޙަރާމް ކަންކަމުން ދުރުވުމަށް ކުރާ ހިތްވަރެވެ.
މުޞީބާތްތަކުގެ ވަގުތުގައި ކެތްތެރިވުން: ބަލިމަޑުކަމެއް، މުދަލަކަށް ލިބޭ ގެއްލުމެއް، ނުވަތަ ލޯބިވާ މީހަކު ވަކިވެދިއުން ފަދަ ކަންކަމުގައި މާތްﷲގެ މިންވަރުފުޅަށް އިޢުތިރާޒެއް ނެތި ކެތްކުރުމެވެ.

ކައު އިތުރު ރަސޫލާ ﷺ ޙަދީޘްކުރައްވާފައިވަނީ “ކެތްތެރިކަމަކީ އަލިކަމެއް” ކަމުގައެވެ. ދިރިއުޅުމުގެ އަނދިރި ދަނޑިވަޅުތަކުގައި ކެތްތެރިކަން އިސްކުރުމުން، މާތްﷲ އެމީހަކަށް ކަންކަން ފަހިކޮށްދެއްވައި، ހިތަށް ފިނިކަން ދެއްވައެވެ. އަދި ކެތްތެރިންނަށް ދެއްވާ ޘަވާބަކީ އެއްވެސް ހިސާބެއް ނެތް މިންވަރަށް ދެއްވާނެ ޘަވާބެއްކަން ޤުރުއާނުން އެނގެއެވެ.
ކެތްތެރިވުމަކީ ބަލިކަށިކަމެއް ނޫނެވެ. އޭގެ ބަދަލުގައި އެއީ ނަފްސުގެ ވަރުގަދަކަމާއި، މާތްﷲއަށް އޮތް އިތުބާރުގެ ބޮޑުކަމެވެ. ކޮންމެ ދަތިކަމަކަށްފަހު ފަސޭހަކަމެއް ވާނެކަމުގެ ފުރިހަމަ ޔަޤީންކަން މުސްލިމެއްގެ ހިތުގައި އޮންނަންޖެހެއެވެ. އެހެންކަމުން، ދިރިއުޅުމުގެ ކޮންމެ ޙާލަތެއްގައިވެސް ކެތްތެރިކަން އިސްކުރުމަކީ ދުނިޔޭގައި ހިތްހަމަޖެހުން ލިބި، އާޚިރަތުގައި މަތިވެރި ނިޢުމަތް ލިބުމުގެ ސަބަބެކެވެ.

އަރީން ( އެޑީ )